Awaji îsulu Antiọkus osusut
(I Makab 6:1-13; II Makab 1:11-17)
9
Me ike mgbọ ya, Antiọkus onenilibi inan̄a me isi akọn̄ me agan̄ Pesia. 2 Me Pesia ya, Antiọkus înin̄ ama ekigwen Pesepolis, mè iweek ichichiin̄ inu me uwu yọk cha òkup me ama ya, mè ibọkọ ama ya ikaan̄. Ire, ebi ama ya eteteen̄ nroon̄ akọn̄ isibi igọọk ọmọ, mè inyan̄a lek kiban̄, mè itim ikpan̄ ọmọ, mè irieen̄ ọmọ isibi. Antiọkus osasa esip me isi ilibi inan̄a. 3 Mgbọ îrebe Ekibatana, ineninọ etip inu òrọrọ Nikanọ melek urum akọn̄ kè Timọti. 4 Inọnọ etip ya, inanaan̄ ejit ijo ijo, mè itumu ifieek ibe ke ọmọ môsa ebi Ju ikpe useen̄ esip ebi ìrerieen̄ ọmọ ikpebe etapbe ọmọ me isi. Eya orọ, inyinyi ogwu òkikọp uji akọn̄ kan̄ ida ibe ikọp isi ge, ikatet ubọk ìkaan̄ mege mêrebe Jeruselem. Ikekitumu me ugumulek ibe, “Nsire, mâsa Jeruselem irọ udọn̄-ufuun̄ otutuuk ebi Ju.” Ire, ìkariọọn̄ ibe ke oyerebet Awaji ogwu òkup me akpabin inyọn̄ otipbe ọmọ òkigọọk ọmọ ije.5 Ire, Okumugwem, Awaji ebi Ijeren, ogwu òkimọọn̄ inu geelek, osusulu ọmọ akpọ eyi kpesa chieen̄ imun̄, mè inyi ọmọ orukan̄ eyi kpekikọt igwa. Ikọ ya òkitata ọmọ me otu, ufiak owot eyi kpunube igwagwa ochichim ọmọ, otutuuk emen lek kan̄ okekichichiin̄ ọmọ unan unan. 6 Ufialek cha òsisibi inyi ọmọ ìre unen oyerebet, mije, ọmọ ifufuku owuwa ebi ene emen owot me esese esese oniin̄ ikpak. 7 Ire, eya ìkarọ inyi ọmọ itele unyechieen̄ kan̄, ire, ìkpọkpọ itet lek inye ikigumu lek, unaan̄-ejit kan̄ me lek ebi Ju okekiyok ukan̄, ikekinyi ida ibe elibi uji enye egak ubọk ekilibi. Ike uji ya okilibi unye unye, inanan̄a me emen uji akọn̄ kan̄ irọn̄ ikikat me ijọn̄. Irọn̄ ya înye enenen, mè ifiak ọmọ otutuuk otu ukwuuk me lek iso. 8 Sa me ikeya, ogwu ene ya, ogwu òkigugo lek iraka ikeke eyi ebilene sọntiik mgbọ òraraka, mè ikikeek ibe ke ọmọ môkọt itọ ikọ inyi ekoon̄ me okwaan̄, mè ikeek si ibe ke ọmọ môkọt itoon̄ ebi kè ilile ogoon̄ me inyọn̄ okwukwut itọ iriọọn̄ ulobo kiban̄, ìyaka inimun̄ lek kan̄ me ijọn̄ olaakbe inyana. Ebeben ọmọ itoon̄ me inyọn̄ m̀kpata. Eyiya okekijeen̄ otutuuk ebilene ibe ke Awaji îkaan̄ unye.
9 Mgbọ yaage, mkput okekitim isibi me otutuuk akpalek ogwu ene yi, ogwu ikariọọn̄ge Awaji. Akpalek kan̄ ojọjọ ita, me ọmọ me ògat ugwem. Olu njijọ akpalek kan̄ olililaba otutuuk urum ebi akọn̄ kan̄ isan̄a.
10 Kpunu ene geege òkọkọt ije inin̄ lek isi iben, bak me lek olu kan̄, ọmọ ogwu òkekeek, sọntiik mgbọ òraraka, ibe ke ọmọ môkọt ichak ubọk me lek ntoronyan̄ me akpabin inyọn̄.
Antiọkus înyan̄a ibot inyi Awaji
(I Makab 6:8-17)
11 Efuuk onenitet ọmọ, itotolek ibene ikitele ugumulek kan̄ ya, mè ininọ lek me irak ubọk osusut Awaji îkupbe ya, mije, ìkpọkpọ ikup me ujaralek mgbọ geelek.
12 Mgbọ olu njijọ lek kan̄ gaalek otetbe ọmọ ire lek ọmọ me lek kan̄ ìkayaka ìkọt ìbeme, inenitumu ibe, “Îgbe ibe ene isiki lek inyi Awaji. Ogwu ebilene geege ikakeek ibe ke ọmọ ìre ìkike melek Awaji.”
13 Ogwu filafila ene yi onenichieek use inyi Ogwukaan̄-ene, ogwu ìkpoyaka ikaan̄ ọmọ nsan me lek, ibe, 14 ke ama mbuban ya, eyi ọmọ okilibi ugwat ugwat isi ibosi igwak igwook me ijọn̄, mè isa irọ ere ifuun̄-ene ebi Ju, ke ọmọ ìkibe ama ya ikup me utelelek. 15 Ire ebi Ju, ebi ọmọ obe ke kpesoso inu ebelelep, mè itọt isasa ema mè bọn kiban̄ inyi ebi kè anam oron mè ebi kè ofut etaka, ke ọmọ môrọ otutuuk kiban̄ ere ìkike me lek bọn owot ama Atens.
16 Uwu Mbuban ya eyi ọmọ ofumbe, ke ọmọ môche inu òjajaan̄ inyi esa ebala, mè iyaka otutuuk nroon̄ ikwaan̄ mbuban cha inyi, mè inyi iwa iraka; ke ọmọ môsa ikpoko eyi akpalek kan̄ gaalek ikikpe ikpoko geelek ekifiat me lek ngwugwa.
17 Ògak ge, ke ọmọ môkana ire ogwu Ju, mè ikisi ama geelek ebilene elukbe isi ikitumu unye Awaji isibi.
Antiọkus îge ikpa ijet ebi Ju
18 Mgbọ îmun̄be ibe ke ufiak kan̄ ìkanyi ọmọ irek, mije, osusut unen oyerebet Awaji ònunu inyi ọmọ, itetele otutuuk ikpọchieen̄ îkaan̄be, mè inige ikpa keyi, òbet lek ikpa uriaak, ijet ebi Ju, ibe:
19 “Emi, Antiọkus ogwu ubọọn̄ kinyi mè ogwu isi akọn̄ kinyi, nkitọp enyi amọn me ijọn̄ ijọn̄ ejit n̄a, enyi ebi Ju ebi ido n̄a, ebi ìsisibi isi, ikibe kè ata lek ikup inyi enyi, mè inu ije ijaan̄ enyi me lek.
20 “Ire enyi mè bọn kinyi ikup me unye-lek, mbubek kinyi okekije ijaan̄ ubọk enyi eweekbe, eya îbele emi ejit. Ikpọchieen̄ n̄a ìkup me lek Awaji ogwu òkup me akpabin inyọn̄.
21 “Ǹkekikeek ulibi mè ata ejit enyi ekaan̄be me lek n̄a. Mgbọ nkinan̄a me agan̄ Pesia ika, ijo lek îtet emi ikọọk enenen. Eya orọ, mbene ikikaan̄ ekiket ofolek ubọk otutuuk ene mêkupbe me utelelek.
22 “Ìkare ibe ke ejit n̄a ìkanye me lek irek nkupbe, nkaan̄ ikpọchieen̄ ònyenye ibe ke mânwọnọ orukan̄ n̄a.
23 “Ire, mmun̄ ibe ke nte n̄a, mgbọ geelek îkisi akọn̄ me ido echi agan̄ inyọn̄, ìkitoto ogwu môrakabe irek kan̄, 24 inyi, ire inu ge irọ, mè ìre ijo etip onu, ebi ene me ido echi ọmọ okikpulu ekasisaak ugwem kiban̄, mije, ema mêriọọn̄ ogwu eyakabe mkpulu itap me ubọk.
25 “Ogak ge, nriọọn̄ ubọk ebi isi me ido ebi melek kiji egbaan̄be ikaan̄ okike ijọn̄, mè ebi ìluluk iriaak eji me lek, ekitap chieen̄ ikpọ ibe irek isibi inyi ema, mè ikup ikikpọ inu òborọ. Eya orọ, nto gwun̄ n̄a, Antiọkus, ibe inire ogwu ubọọn̄. Owuwa mgbọ, ọmọ ke nkiyaka itap enyi me ubọk, mè ikibene si inyi owuwa kinyi, mgbọ geelek nkisi ido agan̄ inyọn̄ cha. Nra ige inu yaage ngebe me emen ikpa ikeyi ijet ọmọ si.
26 “Eya orọ, ǹkitumu inyi enyi, mè ikibeek enyi, ibe ekeek ata inu nrọbe mgbọ òraraka inyi ido kinyi, mè irọ si inyi enyi ene me ene. Ìsa me ikeya ìkikaan̄ ata ejit ya enyi ekaan̄be mgbọ keyi ìfo isi me lek n̄a mè lek gwun̄ n̄a.
27 “Mije, ejit n̄a înye ibe ke ọmọ môkaan̄ ata ejit me lek kinyi, mè ikirọ enyi me lek ususuk kubọk emi nrọbe.”
28 Sa me ikeya ke ogwu òkikpan̄ ene mè ikinye chieen̄ inyi Awaji, obọkọ atalek uyok uyok ujaralek ike îrọbe ibe ebi ofifi ife ebọkọ, mè imun̄ ikpele ukwook ògbegbe ibe eto njijin, mè ikup me agbagba ogoon̄ me ofifi ido ikwu mkpa.
29 Filip, ene ge me etete ebi unene kan̄ ìrariaak ọmọ me lek, obeben nkwukwu kan̄ isa ika. Ire, bak me lek ukpook gwun̄ kè Antiọkus, ililibi isi lek kè Tolemi Filometọ me Ijipiti.