Uriaak mgbọ ufialek
43
Jei Awaji, fieek oyerebet nwọn emi;tumu ikọ ibot n̄a me isi ebi ido
ebi kpekaan̄ ukpook kwun̄;
nyan̄a emi me ubọk ebi ijo ife,
mè ebi otu alọm iba.
2 Owu ore Awaji ogwu òkibem emi.
Owu òjeje ijit emi itele?
Keke orọ mâkupbe me lek ifefieek ejit
bak me lek ebi ochicha ìkisisaak emi?
3 Ria utoon̄ kwun̄ mè atikọ kwun̄ jet emi;
sa ema jeen̄ emi oniin̄;
tele ema esa emi esi ogoon̄ mbuban kwun̄,
mè Uwu Mbuban kwun̄.
4 Mgbọ ya, mâje isi lek ntook kwun̄,
jei Awaji, ogwu òkinyi emi unwọọn̄,
mâkwak uneen̄ eyi sọntiik isa itọn̄ owu,
jei Awaji ogwu òre Awaji n̄a.
5 Keke orọ ejit okifieek emi ikeyi?
Sà ìre keke orọ nkisisaak lek n̄a?
Mâtoon̄ Awaji ejit me lek,
mije mâkpọk itọn̄ ọmọ,
ogwu unyan̄a n̄a mè Awaji n̄a.