Imaman kè Jisọs
2
Me ike mgbọ ya,
Ọgọsitọs,
ogwu Sisa òkikpulu ido Rom,
oneninyi ikan ibe efuk otu ifuk ene me otutuuk ido geelek ebi Rom ekikpulu.
2 (Eyi ore adasi mgbọ efukbe ene.
Ifuk-ene yi ìmọnọ irek me mgbọ Kwiriniọs orebe ogwu ibot mkpulu me ido Siria.)
3 Otutuuk ene efofon ama kiban̄ igọọk isi itap erieen̄ me ikpa.
4 Ikeya si ke Josefu onan̄a me Najeret òkup me Galili ifo Beteleyem,
ama iman kè Debit òkup me ido Judia,
mije,
ọmọ ìre gwun̄ owot iman kè Debit.
5 Josefu osasa Meri,
ogwu ìbodo,
igbaalek ije.
Mgbọ ya owot îmin me lek kè Meri.
6 Mgbọ ema ekupbe me Beteleyem ya,
mgbọ uman kan̄ okekem.
7 Imaman adasi gwun̄ kan̄,
gwun̄ enerieen̄,
mè isa ekwut ikat-gwun̄ ikat gwun̄ ya,
mè iben imaan̄ me uwu anam,
me emen okwa ekisa itap inorie inyi anam,
mije,
ema kpekaan̄ irek me uwu ebi ichen igọọk ikup.
Ebi osat mîlook ebi òkpukpo arọọn̄ etip imaman kè Jisọs
8 Îkaan̄ ebi òkpukpo arọọn̄ ìkup me ere ema ekikpukpo anam,
me agba lek ama ya,
ikibem arọọn̄ kiban̄ me eririeen̄.
9 Ogwu osat Okumugwem okakana isibi me etete kiban̄,
utoon̄ eyi umin Okumugwem ototoon̄ ikana ere ya,
ukpook otetet ema.
10 Ire,
ogwu osat ya obebe ema,
“Ikatet ukpook,
mije,
îre ata etip eyi òborọ inyi otutuuk ene enwọọn̄ unwọọn̄ enenen ke nsa ijet enyi.
11 Cherekeyi,
me emen ama kè Debit,
mîman Ogwu Unyan̄a inyi enyi.
Ogwu Unyan̄a yi ìre Karais Okaan̄-ene.
12 Inu enyi ebesa iriọọn̄ ìre ke enyi mêmun̄ gwun̄ esabe ekwut ikaan̄-gwun̄ ikat,
mè iben imaan̄ me emen okwa ekisa inyi anam inorie.”
13 Mgbọ yaage,
ogbogbo ebi osat enanan̄a me emen inyọn̄ isibi inu inigọọk adasi ogwu osat ya ikeke,
mè ikikọt okwa itọn̄ Awaji ibe,
14 “Itọn̄ mè umin ikup inyi Awaji me emen inyọn̄
ere òbebene ichit.
Esuuk ikup me linyọn̄ inyi ebilene ebi
Awaji okaan̄be ata ejit me lek.”
15 Mgbọ ebi osat cha enan̄abe itele ema,
mè ifo emen inyọn̄,
ema etọtọt ibe mè ema enesi Beteleyem esi ekpọ inu ya òrọrọ,
eyi Okumugwem otumube inyi ema.
16 Ema enenilibi ekot ekot isi,
mè isi imun̄ Meri mè Josefu,
mè imun̄ si gwun̄ ya olaakbe me emen okwa.
17 Mgbọ ema emun̄be gwun̄ ya,
ema ekpakpa otutuuk inu ogwu osat ya otumube inyi ema ofolek gwun̄ ya inyi ebi ene me ere ya.
18 Ukpatu ya okeke otutuuk ebi ìnọnọ chieen̄ enenen.
19 Ire,
Meri otetet otutuuk inu cha ikaan̄ me ejit,
mè ikikeek inu ikọ chi osibibe.
20 Ebi òkpukpo arọọn̄ cha egwugwu ikom ifo ere ema enan̄abe,
mè ikitọn̄ Awaji,
mè ikinyi ọmọ umin,
mije otutuuk inu ema enọbe,
mè isa chieen̄ kiban̄ isi imun̄,
kubọk ogwu osat ya otumube inyi ema.
Mîsa Jisọs isi Uwu Mbuban
21 Òso egwe jeeta,
mgbọ ebefieek gwun̄ ya afi,
enenisan̄a ọmọ erieen̄,
Jisọs,
òrere erieen̄ eyi ogwu osat Awaji onyibe ọmọ sabum enin̄be owot kan̄.
22 Mgbọ Meri okupbe iso otu ifuk usen mfaka igwọk-lek,
igọọk me lek Ikan kè Mosis,
ema eneniben gwun̄ ya isa isi Jeruselem isi iyaka itap me ubọk Okumugwem,
23 kubọk egebe me Ikan Okumugwem ibe esa gwun̄ uchili-owot geelek òrere enerieen̄ eyaka enyi Okumugwem kubọk ngwugwa.a
24 Ema enenisi Jeruselem ya isisi igwa ngwugwa igwọk-lek kubọk egebe me Ikan Okumugwem.
Ngwugwa ya,
ekisa ekerekwukwu iba,
mè ìre bọn elesia iba igwa.b
25 Me ike mgbọ ya,
îkaan̄ ogwu enerieen̄ ge òkup me Jeruselem,
ekigwen Simiọn.
Ogwu enerieen̄ yi ìre ogwu ata irọrọ òkekeke inye melek Awaji enenen,
mè ikikpọ chieen̄ mgbọ Awaji mônyan̄abe ebi Ijeren isibi.
Ekwukwu Mbuban òwa si melek kan̄.
26 Ekwukwu Mbuban îwuuk lek itumu inyi ọmọ ibe ke ogwugwu ìkpokwu,
îtata ìsasa chieen̄ kè ogwugwu imun̄ ogwu Awaji otọkọbe aran̄ me ibot ya,
ogwu Okumugwem oboria inu.
27 Ekwukwu Mbuban onenisa ogwu enerieen̄ yi isi oyet egep Uwu Mbuban.
Josefu mè Meri enenisa Jisọs inu me Uwu Mbuban inenirọ orọmijọn̄ eyi Ikan kiban̄.
28 Simiọn obọbọkọ gwun̄ ya ikaan̄ me ubọk kan̄,
mè inyi Awaji itọn̄ ibe,
29 “Okumugwem,
owu ora irọ use kwun̄ iso.
Eya orọ,
mgbọ yi,
tele mè emi
ogwu usun̄ kwun̄ m̀fo me esuuk.
30 Mije,
nra isa chieen̄ n̄a imun̄ unyan̄a kwun̄,
31 eyi owu oneen̄be isun̄ me isi ebi otutuuk ido geelek,
32 inyi inire utoon̄ eyi òbonichili
oniin̄ unyan̄a kwun̄ inyi ebi ekarege ebi Ju,
mè irọ inyi ebi kwun̄ Ijeren ekaan̄ umin.”
33 Inu chi Simiọn otumube ibak Jisọs okeke nte kan̄ mè nga kan̄ chieen̄ enenen.
34 Simiọn onenigbana ema,
mè itumu inyi Meri ogwu uga ibe,
“Kpọ,
Awaji ìria gwun̄ yi inu ibe inirọ inyi owuwa ene me etete ebi Ijeren enan̄a erọn̄,
mè irọ si inyi owuwa ene enan̄a ekeke,
me Ijeren.
Gwun̄ yi môre inu ijejeen̄ ònan̄a me ubọk Awaji,
eyi ebi ene ebekitumu ikọ ikeme.
35 Sa me ikeyi,
owuwa nlelet nkeek òkup ebi ene me emen ejit môkpọk mbum.
Owu me lek kwun̄ si,
ikpele ufieejit ibot gwun̄ yi môchim owu ejit igwak kubọk oge akọn̄.”
36 Me usen ya,
ogwu nriran enenwaan̄ ge ekigwen Ana,
òwa si me Uwu Mbuban ya.
Ọmọ ìre gwun̄ kè Fanuwen ogwu ònan̄a me owot iman kè Ase.
Ogwu enenwaan̄ ya îkan enenen.
Îbat olom,
mè igọọk ogwu olom iluk acha jaaba gaalek,
ogwu olom okwukwu.
37 Ogwu enenwaan̄ ya oluluk kubọk nwakpa ire mgbọ yi îsobe akọp acha jeeta mè ini.
Otutuuk mgbọ ya,
ìkanan̄a ìsibi ìtele Uwu Mbuban.
Ìkup me ere ya ikisi ikwaan̄,
mè ikitọbọ ebum inyi Awaji,
eririeen̄ mè ikarek,
me uriaak mè ijin-otu.
38 Ogwu enenwaan̄ ya onenichichini Simiọn mè gwun̄ ya mè Meri mè Josefu mgbọ ya,
mè itọn̄ Awaji mije gwun̄ ya,
mè itumu si ikọ ofolek gwun̄ ya inyi otutuuk ebi ìkikpọ chieen̄ mgbọ Awaji obonyan̄a ebi Jeruselem isibi.
39 Mgbọ Josefu mè Meri erọbe otutuuk inu iso igọọk me lek Ikan Okumugwem onyibe,
ema egwugwu ikom inan̄a me Jeruselem ika Najeret ama kiban̄,
me Galili.
40 Gwun̄ ya okekimin,
mè inye lek,
mè ikaan̄ iriọọn̄-inu enenen.
Awaji ogbagbana ọmọ si me agan̄ geelek.
Jisọs îtumu ikọ melek ebi ìjeen̄ Ikan
41 Acha geelek,
mgbọ ijọk Iraraka isikem,
nte kè Jisọs mè nga kè Jisọs mîkigọọk isi Jeruselem.
42 Mgbọ Jisọs osobe akọp mè acha iba,
ema egọgọọk isi irie ijọk Iraraka ya si,
igọọk me lek orọmijọn̄ kiban̄.
43 Mgbọ ijọk ya otabe,
ogwu ute mè ogwu uga enenigwu ikom ikije ifo ama kiban̄.
Jisọs obabia me Jeruselem.
Ire,
ema kperiọọn̄.
44 Ubọk ema ekikeek ibe ke Jisọs melek kiban̄ ekije,
ema mîje ije otutuuk egwe ge sabum enibene ikiweek ọmọ me etete ebi otoko kiban̄ mè ebi unene kiban̄.
45 Mîweek ọmọ igak,
kpemun̄.
Ema egwugwu ikom isi Jeruselem isi iweek.
46 Òso egwe ita,
ema eneniweek ọmọ imun̄ me Uwu Mbuban ike îkweekbe irek me etete ebi ìjeen̄ Ikan,
mè ikigban̄ inu ife cha ekitumu,
mè ikido si ema ikọ.
47 Ufọọk-otu kè Jisọs,
mè ubọk îsabe ikigobo inu itet îke otutuuk ebi ìnọnọ chieen̄ enenen.
48 Mgbọ ogwu ute mè ogwu uga enube inimun̄ ọmọ me etete ife cha,
îkwu ema lek.
Ogwu uga onenibe ọmọ,
“Gwun̄,
ìre keke ire eyi owu orọbe eji ikeyi?
Nte kwun̄ melek n̄a mîfieek owot,
mè inyinya ikana ere iweek owu igak,
eji kpemun̄ owu.”
49 Jisọs onenido ema ibe,
“Ìre keke orọ enyi ekiweek emi?
Ìre enyi kperiọọn̄ ibe ke mâkup me uwu Nte n̄a?”
50 Ire,
nte kan̄ mè nga kan̄ kpekọt itet ibot me lek ikọ ya îtumube.
51 Jisọs idodo ema ikọ ya isan̄a,
inanan̄a ikeke,
mè igọọk ema ije ifo Najeret,
mè ikisiki ibot inyi ema.
Ire,
ogwu uga otetet otutuuk inu cha ikaan̄ me ejit.
52 Jisọs okekimin isibi,
mè iriọọn̄ inu,
mè inwọn isi me isi Awaji melek ebilene.