Ìkitap ubọk ìnyi bọn Nte kinyi, ikakikeek lek kinyi gaalek
15
Îgbe ibe eji ebi ìkekeke inye me ichechieek ekeme nrọ-nlọ òkup me emen ebi kpekeke inye me ichechieek,
me ekakeekge ubelejit eyi akpalek kiji.
2 Ene geelek me etete kiji ikirọ inyi ejit ibele ogwu melek kan̄,
mè ikirọ ene ya ata inu,
mè inama ichechieek ene ya ibene.
3 Mije,
Jisọs Karais me lek kan̄ ìkaweek ubelejit eyi lek kan̄ gaalek,
kubọk egebe me Ikpa Mbuban ibe:
“Otutuuk unyechieen̄ ebi ene ekinyi owu ìnikikeme emi.”a
4 Mije,
inu geelek egebe me Ikpa Mbuban me ukot ikaan̄,
ege isasa ijeen̄ eji inu eyi òbokikat eji ejit,
mè ikitap eji efuuk me emen,
inyi eji esa me ikeya ekaan̄ ikpọchieen̄.
5 Kè Awaji ogwu òkikat ene ejit,
mè ikitap ene efuuk me emen,
irọ inyi enyi otutuuk ene egbaan̄ eluk me ejit ge me mgbọ keyi enyi ekigọọk Jisọs Karais,
6 inyi enyi otutuuk ene egbaan̄ esa ejit ge,
mè ida ge etọn̄ Awaji ogwu òrere Nte Okaan̄ kiji Jisọs Karais.
7 Me mgbọ yi,
ìbọkọ ebi melek kinyi ìtap,
kubọk Jisọs Karais obọkọbe enyi itap,
inyi itọn̄ ikup inyi Awaji.
8 Mije,
ǹkitumu atikọ inyi enyi ibe ke Karais îkana gwun̄ ikwaan̄ inyi ebi Ju,
inenirọ use Awaji ochieekbe ebi nte nte kiban̄ ukot ikaan̄ inye,
inyi ema esa eriọọn̄ ibe ke Awaji ìre ogwu atikọ.
9 Sa me ikeyi ebi kpere ebi Ju mêtọn̄ Awaji mije ejit nsan kan̄,
kubọk Ikpa Mbuban otumube ibe,
“Mije keyi,
mâtọn̄ owu me etete ebi kpere ebi Ju;
mâkọt okwa itọn̄ erieen̄ kwun̄.”b
10 Ofifi si,
Ikpa Mbuban îtumu ibe,
“Enyi ebi kpere ebi Ju,
ìgọọk ebi eyi Awaji ìnwọọn̄ unwọọn̄.”c
11 Ikpa Mbuban îtumu me ofifi ere si ibe,
“Otutuuk kinyi ebi kpere ebi Ju,
ìtọn̄ Okumugwem,
mè ìkọt okwa ìtọn̄ ọmọ,
enyi ebi otutuuk ido geelek.”d
12 Ofifi si,
Awaji îtumu me otu kè Asaya ogwu nriran ibe,
“Gwun̄ owot iman kè Jesi ge mônan̄a isibi;
ọmọ ore ogwu òbonikpulu ebi ido geelek me linyọn̄.
Ebi ido geelek me linyọn̄ ebekaan̄ ikpọchieen̄ me lek kan̄.”e
13 Kè Awaji ogwu òkinyi ene ikpọchieen̄,
inyi enyi òjot òjot unwọọn̄ mè esuuk,
mè irọ inyi ikpọchieen̄ enyi ekaan̄be me lek kan̄ ikpọkpọ ikimin,
sa me unye eyi Ekwukwu Mbuban.
Pọọlu ìre gwun̄ ikwaan̄ kè Karais me etete ebi kpere ebi Ju
14 Bọn Nte n̄a,
emi me lek n̄a nchieek ibe ke enyi me lek kinyi mîkaan̄ ata ejit,
mè inwọn me ugwem,
mè ikaan̄ òjot òjot ifuk-ibot.
Nriọọn̄ si ibe ke enyi mîso ebi mêkọtbe ikijeen̄ lek kinyi inu.
15 Ire,
ǹge ikpa keyi ijet enyi,
inyi ǹsa irek keyi ǹkpọk ǹkeek enyi usini ikọ òkup me uyọt,
eyi mwuukbe lek itumu inyi enyi.
Ǹkatet ukpook,
ǹnyenye otu ikitumu ikọ keyi,
mije atata nnwọn eyi Awaji onyibe emi,
16 mè isa emi irọ ogwu ikwaan̄ kè Jisọs Karais me etete kinyi ebi kpere ebi Ju.
Ǹkirọ ikwaan̄ ilolook ata etip me etete kinyi,
kubọk ogwu ngwugwa eyi Awaji,
inyi enyi ekana inu esabe igwa ngwugwa òkibele Awaji ejit,
mije,
Ekwukwu Mbuban îgwọk enyi itana,
mè isun̄ enyi me mbuban.
17 Mije keyi,
ǹkisa ikwaan̄ nkisi inyi Awaji ibaan̄ alọm mije kè Jisọs Karais.
18 Me atikọ,
emi m̀kpatumu ofifi ikọ geege ilọ me lek ikọ ofolek ikwaan̄ Karais osabe emi irọ me etete ebi kpere ebi Ju,
mè irọ inyi ema enesiki ibot enyi Awaji.
Karais ìrọ inu yi sa me ikọ otu n̄a,
mè irọrọ n̄a,
19 mè unye esese inu ukechieen̄,
mè uyeke inu,
mè sa me unye eyi Ekwukwu Mbuban.
Ikeya ke mbene me Jeruselem ijijen̄e ikana otutuuk ere isi igwook me agan̄ ekigwen Ilirikum,
mè ilook ata etip kè Karais iso otutuuk ere cha.
20 Ulọk òmimin emi me ejit ichit bene me ibebene ìre isasa ata etip kè Jisọs Karais isi ilook me ere ebi ene kpewuuk lek ilook,
inyi nkatumu ikọ Awaji me ere ofifi ene owuukbe lek itọbọ ọdọ.
21 Ire,
ege me Ikpa Mbuban ibe,
“Ebi kpekpa inu ofolek kan̄ inyi,
mêmun̄,
ebi kpewuuk lek inọ ikọ kan̄ mêgobo itet.”f
22 Me atikọ,
eyiyi ore inu òtetet emi ikaan̄ owuwa mgbọ,
inyi nkakọt ìnu ìnimun̄ enyi.
Pọọlu îtọt isisi Rom
23 Ire,
îwuuk lek ikilọlọk emi imumun̄ enyi karake owuwa acha òraraka.
Eya orọ,
mgbọ keyi nkayakage ìkaan̄ ikwaan̄ geege irọrọ me agba agan̄ kechi,
ǹkiweek inunu inimun̄ enyi.
24 Ǹkitọt igbagba ikpọ enyi mgbọ mbaraka isi Sipen.
Me oniin̄ ije n̄a,
mâgba Rom inigọọk enyi ikup sọnja mgbọ.
Nsinwọọn̄ enyi isan̄a,
mânenije ije n̄a isi Sipen.
Ǹkikpọ chieen̄ ibe ke enyi mêtap ubọk inyi emi,
inyi ije ya ifet.
25 Ire,
me mgbọ keyi,
ǹkup me oniin̄ ije,
m̀basa inu ijet bọn Awaji ìkup me Jeruselem.
26 Mije,
ebi ntitiin̄ Awaji ìkup me agan̄ Mesidonia mè agan̄ Akaya mîsa me ata ejit ititiin̄ inu iria ibe esa esi eche enyi ebi ìkup me una me etete ebi ntitiin̄ Awaji ìkup me Jeruselem.
27 Ema gaalek etumu ifieek me ejit kiban̄,
mè irọ.
Me atikọ,
îgbe ibe ema etap ubọk enyi ebi ugbọọn̄ ìkup me ntitiin̄ Awaji me Jeruselem.
Mije,
ire ebi Ju iche usini ugbana Awaji eyi ema ekaan̄be inyi ebi kpere ebi Ju,
îgbe si ibe ebi kpere ebi Ju eche usini ugbana linyọn̄ keyi eyi ema ekaan̄be enyi ebi Ju.
28 Nsirọ ikwaan̄ keyi isan̄a,
mè imun̄ ibe ke nkana uche ikpoko yi itap ema me ubọk,
mânibene ije isi Sipen,
mè igba itọp enyi amọn.
29 Nriọọn̄ ibe,
mgbọ mânube,
ke mâsa òjot òjot ugbana kè Jisọs Karais igbaalek inu.
30 Bọn Nte n̄a,
nsa me erieen̄ Okaan̄ kiji Jisọs Karais,
mè imumechieen̄ eyi Ekwukwu Mbuban okinyi,
iriaak enyi ibe,
soso,
ìgọọk emi ìriaak uriaak ìnye me ibot n̄a,
ìsa ìtap ubọk ìnyi emi me emen ufialek n̄a.
31 Ìriaak Awaji ibe inyan̄a emi isibi me ubọk ebi kpechieek me lek kè Jisọs Karais me Judia,
mè Awaji irọ mè bọn Awaji ìkup me Jeruselem ebọkọ inu chi nkisa ijet ema me atata.
32 Ire ineme Awaji,
nsikana uche chi inyi ema isan̄a,
mgbọ ya ke mbanikọt ije me unwọọn̄ inu me lek kinyi,
inyi enyi melek n̄a egbaan̄ ebele ejit,
mè ekaan̄ aya efuuk.
33 Awaji ogwu òkinyi ene esuuk ikup melek kinyi otutuuk ene.
Ikup ikeya!