AMÓS
Nukën 'Ibun Amós kuëan ñuikë bana
1
Ënë banax ka Amós kakë uni an ñuina bërúankë Tecoanu 'ikë uni a Diosan usokin ka Israel kama 'ati 'ikë kixun, rabë́ baritia anúan me shaíkiti 'isama pain 'ain ká bana 'ikën, usa 'ain ka a barikaman Ozías ax Judá menu 'apu 'imainun Jeroboam Joásnën bëchikë axribi Israel menu 'apu 'iakëxa.2 Uínsaran kara Nukën 'Ibu Dios ax Sión kakë aín bashi anuax banaia anun ka
Jerusalénnuax kaná banakësaribi banai kiti 'ikën,
kia kuakëbë ka an ñuina bërúankë unikaman anuxun aín ñuina pimikë pasto
'imainun ka Carmelo kakë ain bashi rëbunua 'ikë xëxá rëbukama axribi ëskiti 'ikën.
Dios Jerusalén rapasu 'ikë ëmakama 'atima okatsi kia bana
3 Ësai ka Dios kia:
“Damasconu 'ikë unikaman ka 'itsaira 'atima ñuira 'axa,
usa 'ain kana atu 'aimama 'ikinma 'atima oti 'ain;
atun ka Galaadnu 'ikë 'ën unikama trigo bimi manë xon tákakin rishkikësa okinra tëmëramiakëxa.
4 Usa 'ain kana Hazael kakë 'apu kamabi aín aintsikama 'ia a 'imainun bërí 'ikë akamaribi 'aíma 'itánun tsin këñuti 'ain,
usakin 'akëxun ka a tsinbi Ben-hadad kakë 'apu ain xububi xarokin këñuti 'ikën.
5 'Anan kana atux kuëënkëbëtamabi Damasco ëma masókin ain xëpútikama xëputisama 'itánun chánkapati 'ain;
usokin 'anan kana Bicat-avén, 'ikëbi,
Bet-edén kakinribi anëkë anu 'ikë 'apu 'ati 'ain,
usakin 'akëbëtan ka sirionu 'ikë unikaman Quirnu 'ikë unikama ñatanbiankin buankanti 'ikën.”
Usai ka Dios kiaxa.
6 Ësai ka Dios kiaxa:
“Gazanu 'ikë unikaman ka 'itsaira 'atima ñuira axa,
usa 'ain kana 'aimama 'ikinma atu tëmëramiti 'ain;
atun ka achúshi ëmanu 'ikë uni kamabi ñatanbiankin buánxun,
tëmëramikin ñu mëëmikë unisa 'ikë Edomnu 'ikë unikama maruakëxa.
7 Usa 'ain kana anun Gaza kakë ëma kënëara a pain tsin bimiti 'ain,
'akëxun ka a tsinbi 'apun xubukama këñukin në́nti 'ikën.
8 Usokin 'anan kana Asdodnu 'ikë unikama 'akin,
Ascalón 'ikë aribi masókin 'anan kana,
¡Ecrón nu 'ikëkama aribi masókin këñuti 'ain,
këñukëx ka filisteo unikama ax achirabi bërútima bamati 'ikën!” Ësai ka Nukën 'Ibu kiaxa.
9 Ësai ka Nukën 'Ibu kia:
“Tironu 'ikë unikaman ka 'itsaira ñu 'akin 'atima ñuira 'axa,
usa 'ain kana 'aimama 'ikinma atu tëmëramiti 'ain;
atun ka 'ain 'aintsisa 'aish abë nuibanankë 'ixunbi achúshi ñu 'á ami manukuainxun Edomnu 'ikë unikama bëtsi uni 'akësokin 'inankëxa.
10 Usa 'ain kana anun Tiro kënëara kënë a tsin bimiti 'ain, 'akëxun ka a tsiinbi 'apun xubukama a këñukin xaroti 'ikën.”
11 Ësai ka Nukën 'Ibu kia:
“Edomnu 'ikë unikaman ka 'itsaira 'aisama ñu axa,
usa 'ikë kana 'aimama 'ikima atu tëmëramiti 'ain;
atun ka nuibakinma aín manë xëtokë tuínxun aín xukë́n Israel unikama nuibianxun 'akëxa.
Usakin 'ai ka kana nuibati 'ai kixun sinanima atumi nishakëxa.
12 Usa 'ain kana Temán kakë ëma tsin bimiti 'ain,
usakin 'akëxun a tsinbi Bosrá kakë ëmanu 'ikë 'apun xubukama aribi mënukin xaroti 'ikën.”
13 Ësai ka Nukën 'Ibu kia:
Amónnu 'ikë unikaman ka 'atima ñu 'akin 'itsaira 'aisama ñuira 'axa,
usa 'ain kana 'aimama 'ikinma atu tëmëramiti 'ain;
atun ka Galaad menu 'ikë Israel unibunën xanu tuñukama atun me chaiira a bisatankin,
panárabë okin tukapakëxa.
14 Usa 'ain kana anun Rabá kakë ëma kënëara kënë a tsin bimiti 'ain,
bimikëxun ka a tsinbi 'apun xubukama nënkin xaroti 'ikën,
usakin 'akëx ka anun 'akánanti nëtë 'ianan, nëtë masákuatsini kaná banakë usaribiti i amami amamiax unikama 'akánanti 'ikën.
15 'Imainun ka aín 'apu aín menua chikínbiankin bëtsi menu buánkin,
aín 'apu 'imainun aín kushibu akëñunbi buánkë 'iti 'ikën.
Usai ka Nukën 'Ibu kia.