2
Ësai ka Nukën 'Ibu kia:Moabnu 'ikë unikama atúnribi ka 'itsaira ñu 'aisama 'axa,
usa 'ain kana 'aimama 'ikinma atu tëmëramiti 'ain;
atun ka Edomnu 'ikë 'apun xokama 'aímai chimaputanun xarokëxa.
2 Usa 'ain kana Moab kakë me a tsin në́ntanun 'amiti 'ain,
'amikëxun ka a tsinbi Queriotnu 'ikë 'apun xubukama xaroti 'ikën;
usakin 'akëbë 'akanani sharákë a nëbë́tsinuxun,
manë banañu banoia kuakë anunbi ka
Moabnu 'ikë unikama këñuti 'ikën.
3 ¡'Ën kana aín unikaman nëbëtsi orakë 'ikëbi ain 'apu 'ati 'ain;
akëñun kana aín unikama ñu 'unanbu akamaribi 'ati 'ain!
Usai ka Nukën 'Ibu kiaxa:
4 Ësai ka Nukën 'Ibu kia:
“Judánu 'ikë unikaman ka 'itsaira ñu 'akin 'aisama ñuira 'axa,
usa 'ikë kana 'atima oti ëntima 'ain,
atun ka Diosan 'unánmisa tankë ñukama ënkin ax kikësaibi 'iti banakama a tanima 'iakëxa,
usai 'ikin ka atun papan rabia
abi 'axuan unin a rabia ñukama rabikankëxa.
5 Usa 'ain kana Judá ëma tsin bimiti 'ain,
bimikëxun ka a tsinbi Jerusalénnu 'ikë 'apun xubukama a në́nkin xaroti 'ikën.”
Dios Israel unikama tëmëramikatsi kia bana
6 Ësai ka Nukën 'Ibu kia:
“Israel unikaman ka 'aisama ñu 'akin 'atima ñuira 'axa,
usa 'ain kana 'aimama 'ikinma atu tëmëramiti 'ain;
atun ka uni upí bëtsi ñu 'akëmabi kuríki bianan bëtsi uni 'inánan,
ñuñuma uni aribi ñu kupímara 'akësokin rabë́ taxaka kupín bëtsi uni maruia.
7 'Anan ka ñuñuma unikamaribi 'atima okin tëmëramikin,
atun ñu 'akëkama mëníoxuntisama tania.
'Ianan ka aín papan aín nami 'akë xanu aribi, aín bëchikënën aín nami 'aia,
usakin 'akin ka 'ën bana upí 'ikëbi 'aisama bërumia.
8 Usakin 'anan ka kuríkiñuma 'ikëa aín chupa ñuñuma uni bikuankë a 'apáxun atúnribi dioskama rabikin pianan añu kara 'akania anuribi atúxribi 'ikania;
'anan ka ati kupíoti nankë a inumikian uni mëkamakin bikë kuríki anun uvas baka maruxun anuxun atun dios rabiti xubu anuxun xëakania.
9 Usa 'aínbi kana 'ën mitsúxmi anun unun, amorreo unikama kamabi këñukin 'akën;
atux ka kushiirabu 'aishi kunxantibu atun chaxkë́ 'ianan roble kakë i chaxkë́ tëmú 'iakëxa.
10 'Aínbi kana Egipto menua chikínbëtsinkin,
cuarenta baritia anu uni 'ikëma menu, 'imibëtsinkin atun me 'inánuxun bëakën.
11 Usa 'ain ka israel unikama mitsunu an Dios kikë bana ñuikë unikama 'ianan Diosan aín uni 'iti kaiskë unikama 'aíma 'iakëxa kiax kisama 'ikën. 'Ëx min 'Ibu 'aish kana asérabi ësai kin.
12 'Aínbi kamina mitsun uvas baka paëokin 'akë a nazareo unikama abi ubioxun xëamianan
an 'ën bana ñuikë unikama 'ën bana ñuixuma 'anun kixun kakankën.
13 Usa 'ain kana 'anu ñu puruti taë rabë́ okin 'akë anu trigo purukë 'ain me
banamibiankë usaribi mitsun xo shimú inumiti 'ain.
14 Usa 'ain ka axa abáti 'unainra axi abátima 'ikën;
'imainun ka uix kara kushi 'ikë ax kushiñumasa 'iti 'ikën,
'ianan ka axa 'akánanti 'unáinra axi ië́tima 'ikën.
15 'Imainun ka axa pian 'akánanti 'unairakë axi aín pia ëbiani abatibi ëñëtima 'ikën,
'ianan ka axa taën abáti 'unáinra suntáru axi abátima 'ikën,
'imainun ka axa caballonën niti 'unáinra axbi abatibi ië́tima 'ikën.
16 A nëtën ka axa 'akánanti 'unáinra uni axbi abáti 'ikën,
'imainun ka suntáru 'akánanti 'unainrakama axi atun chupa pëbiani chupañuma abáti 'ikën,”
Usai ka Dios kia.