Diosan unikama tëmëramikëbë ka uíxbi ië́tima 'ikë kikë bana
9
Usokin a ñukama istankëxun kana Dios. Anuxun ñuina xaroti rapasu nikë isan, iskëxun ka ësokin 'ë kaxa:“Anuxun 'ë rabiti xubu akamina aín 'irakantikama manámi 'ikë a tinkati 'ain,
usakin 'akëbë ka anu nankë ikama ax shaíkiti 'ikën;
¡shaíki ka ikama ax túukibuti ka unin maxkánu aín sanikama pakëti 'ikën!
Usokin 'akëbëa bamakëmakama atux abáti sinanx kuaniabi kana manë xëtokën 'akin rëtëti 'ain:
usokin 'akëbë ka axa abáti sinanx abákë axbi achúshirabi ië́tima 'ikën;
2 'imainun kana me 'ukëmëu unë́ti
sinanx unëtiabi anuabi chikínti 'ain;
'anan kana naíkamë 'ëonu kuaruti
sinanx kuarukë abi ubunun 'imiti 'ain ënuax ka uíxbi ië́tima 'ikën.
3 'Ianan kana aín bashi Carmelo kakë aín rëbu anu unë́ti sinánkëbi,
'ënbi anua bari kuanti 'ain;
'ianan kana 'ëmi unë́ti sinanx parúmpapa 'ukëmëu kuankë 'ikëbia,
anu 'ikë ñuinakan 'ëo an masókin këñuanan 'atima oti xuti 'ain;
4 'imainun kana axa ami nishkë unikaman ñatanbiankin buánkë 'ikëbia,
anuabi manë xëtokën 'akin rëtënun 'amiti 'ain.
¡Usa 'ain ka 'ën atu iskë ax upíokin 'akinti kupí iskëma 'ikën!”
5 Diosan ka ax kushiira 'ixun,
me axa tukibuti pankabunun 'imia
usai 'ikëbë ka kamabi unikama anu 'ikë ax inia.
Usai 'ikëbë ka mex kuaruanan kuabutia, Nilo kakë baka ax 'ë tankëx kuabúkë usaribiti 'ia.
6 Diosan ka naíkamë 'ëonu aín xubu 'akëxa
'anan ka an me tuinti kamaribi menu 'akëxa;
an ka parúmpapa 'umpax timë́tankëxa me chabói 'ibúnun 'imia.
Ax ka Nukën 'Ibu Dios, kamabi kushiñu kakë a 'ikën.
7 Ësai ka Dios kia:
“¿Mitsun kaina upí unibuisamina 'ai kixun sinánkanin? Israel kama mitsux kamina, etíope unikamasaribi 'ain.
'Ën kana Egipto menua mitsu bëakën,
usaribi okin kana Creta menua filisteo unikama bëanan,
Quir kakë anuaribi arameo unikamaribi bëakën usa 'aínbi kamina mitsux atukamasama 'ain.”
8 'Ën kana ënë ëmanu 'ikë unikama 'uchañu isan, usa 'ain kana ësai kin:
“'Ën kana ënë menua atu këñuti 'ain,
usa 'aínbi kana Jacobnën rëbúnkikama kamaira këñutima 'ain.
'Ëx Dios 'aish kana, ësai kin.
9 'Ën kana 'ën uni Israelkama bëtsi ëma kamanua bëkin
anun tuanti 'akë anun ñu tuankëxa ñu bëru pakëkëma usaribi okin uinu 'ikë ax kara inutia isti 'ati 'ain
'aínbi ka uinu 'ikë axbi inútima 'ikën.
10 'Imainun ka kamabi uni 'uchañukama ax 'ën unikamabë tsókëkama:
ax ka manë xëtokën 'akëx bamati 'ikën.
'Imainun ka axa usa ñuka nunu: inútima kianan,
'aisama ñu kananuna nux 'inutima 'ai kikë akamaxribi bamati 'ikën.
Diosan ka aín uni Israelkama birukin mëníokanun 'imitëkënti 'ikë kikë bana
11 A nëtë 'ikëbëtan kana 'ën David 'apu 'ain 'asaribiokin Israel unikama 'apuñu 'inun 'imiti 'ain. 'Imikin kana kamabi ñukama anu 'ikë akama 'atëkënun 'amiti 'ain, 12 usa 'ain ka axa Edom menu bërua 'imainun bëtsi ëmakamanu bërua akamax amiribishi Israel menubi kuantëkënti 'ikën.” Usai ka Dios kiaxa usa 'ain ka aín bana kikësabi oi 'iti 'ikën.
13 “'Ianan ka anun trigo bimi bikin këñúkë 'aímabi anu ñu 'apáti me tukati nëtë 'iti 'ikën, 'ianan ka anun uvas aín baka biti chakakin sënë́onkë 'aímabi anun trigo 'apáti nëtëribi 'iti 'ikën. Usai 'ikëbë ka aín bashikama 'imainun matákamanu 'umpax chikutia iskësaira uvas baka 'iti 'ikën. 14 Usai 'ikëbëtan kana ñatanbiankin ami nishkë unikaman aín menu buan Israel unikama bëtëkënti 'ain. Bëkëxun ka amiribishi anuax kaikin atun ëmakama birutëkënkin 'atankëx anu tsókin; uvakama 'apáti 'ikën 'apáxun ka aín baka xëati 'ikën; 'anan ka aín xubu rapasu ñu 'apáxun bimia aín bimi piti 'ikën. 15 Usokin 'imikëx aín menubi tsotia ka uínsaranbi amiribishi axa ami nishkë unikaman aín me 'ën 'inan anua buántëkëntima 'ikën.” Ësai ka Dios kiaxa.