JONÁS
Jonás kakë uni Diosan kakësokin 'aisamatani abá ñuikë bana
1
Achúshi nëtën ka Diosan Israel menu 'ikë uni, Amitainën bakë bëchikë Jonás a kakëxa:2 Anu kuanxun kamina, chaiira ëma Nínive kakë Asiria menua bukukë unikama 'ëx kikë bana ñuixunkin kai kuanti 'ain, 'ënbi kana atun ñu 'atima 'aia isan usa 'ain kana a ëma këñuti 'ain.
3 Ësokin kakëxbi ka Jonás Diosan kakësabiokin 'aíma, uisaxira kara abáti 'ikë kixun pain sinántankëx, anuaxa manë nunti Jope kakë ëmanu kuani chikiti anu kuankinbi ka, achúshi manë nunti 'uraira menu 'ikë ëma Tarsisnu kuanti 'uramashi 'ikë mërakëxa; mëraxun ka anun kuanuxun kupíokëxa, kupíotankëx ka anun kuani 'iruakëxa.
4 'Irukiani kuankëbëtanbi ka Diosan suñúan kushiira bëkinun 'imiakëxa, usakin 'imikëx 'ikuatsinkin suñuanën bëkakëxun ka parúmpapa bëchunan manë nunti kushiira bëchukin tukapatisa okin 'akëxa.
5 Usai 'ikëbë ka an manë nunti nikinkë unikamax 'itsaira rakuë́akëxa, rakuëkin ka atun dios achúshi achúshixun atuisa 'akinun kixun ñukákankëxa. 'Aínbi ka atun diosan 'akianma 'ikën, usai 'urainra 'ikëbëtan ka manë nuntisa bëspúrui urutanun kixun anua 'ikë ñukama parúmpapanu puakëxa. Usakin 'akamainun ka Jonás manë nunti kataitsi 'ukëmëu anu ñu puruti 'akë anu kuabúax 'aímai napëkëti 'uxkë 'iakëxa.
6 Usai 'ikëbëtan ka manë nuntinu 'ikë aín kushi an, anu kuanxun Jonás kakëxa:
—¿'Uxkënan tapun min kaina añu ënuxun 'ain? ¡Nirukin kamina min Dios munuma banakin ñukati 'ain! Usakin mi ñukákëxun ka numi sinánkin nu 'akinti 'ikën.
7 Usa 'ain ka an manë nuntinuxun bërúankë unikama anua Jonás kuankë 'ain, bëtsibë bëtsibë kánani kikankëxa:
—Bërí kananuna uixira 'uchakë 'ain karanuna ësa ñu inuti kixun 'unánti 'ai kiax kanankëxa.
Kananxun ñuratsukun tankëxbi ka anúan tankë ñura ax Jonásmi ki pakëakëxa.
8 Usakin 'akëbëtan ka kakëxa:
—Nukama kamina kati 'ain. ¿Añu ñu maruti bëi kaina ënë manë nuntin uan? ¿Uinuax kaina aín? ¿Uinu 'ikë menu 'ikë kaina mix 'ain? ¿Uisa ñakánu 'ikë uni kaina mix 'ain?
9 Ësokin kakëxun ka Jonásnën atu kakëxa:
—'Ëx kana Israelkama 'ain, usa 'ixun kana 'ën 'Ibu Dios naínu 'ikë a rabin, an ka parúmpapa 'imainun me uniokëxa.
10-11 Usakin kakin ka Jonásnën manë nunti chaiira anu tëkë unikama 'ëx kana Dios kikësokin 'aisama tani abati uá kixun atu kakëxa, kakëxun kuati 'itsaira rakuë́kin ka atun kakëxa:
—¿Uisa kupín kaina min usokin ñu 'an? Ësokin kakëxun iskinbi parúmpapa 'aisamaira bëchunia isi rakuë́kin ka atun Jonás ñukákëxa: ¿Uisa karanuna mi parúmpapa 'ain bëchunkë bukubutanun oti 'ain?
12 Kixuan kakankëxun ka Jonásnën —'ën kana asérabi upíokin 'unanin Diosan kakësabi oi 'ëx 'ikëma kupín ka nëtë masákuatsinkëbë parúmpapa 'aisamaira bëchunia, usa 'ain kamina 'ë aín bëchunkëa bukubutanun parúmpapanu niti 'ain —kixun ka Jonásnën kakëxa.
13 Usai 'imainun ka an manë nunti nikinkë unikaman atun kushibëtanbi me 'urama oti sinánxun inákankëxa 'ixunbi ka 'akanma 'ikën, usakin 'akëbëbi ka parúmpapa atiainra aín bëchun tuki kushiakëxa. 14 Usai 'ikëbëtan ka munuma banakin an 'akinun kixun ñukákin Dios ësokin kakankëxa: Dios nukamina ënë unin 'ucha kupín bamanun 'imitima 'ain. 'Ianan kamina axa ñu 'atima 'akëma 'aish bamakëbëtan, nukamaxnu anun 'uchakësa 'inun 'imitima 'ain, usa 'ixun kamina mix Dios 'ixun uisakin kaina 'aisatani usakin ñu 'ain.
15 Ësai pain kitankëxun ka Jonás bitankëxun parúmpapanu nikankëxa, usokin 'akëbëshi ka parúmpapa aín bëchunkë nëtë́akëxa. 16 Usai 'ia isi ka an manë nunti nikinkë unikama 'itsaira rakuë́ti asérabi ka Jonásnën rabikë Dios anu 'ikë kixun sinani 'itsaira rakuë́kankëxa, rakuë́ti ka ñuina kananuna xaroxunti 'ai kixun xaroxuankëxa 'axuni ka ënëx kuni ka asérabi a rabiti Dios a 'ikë kiax kikankëxa.
17 'Aínbi ka Diosan bakanu 'ikë ñuina chaiira bainanmë 'ëo achúshi an Jonás éti nankë 'iakëxa. Usokian 'akëx ka Jonás rabë́ 'imainun achúshi nëtë 'ianan rabë́ 'imainun achúshi imë́ ñuina chaiira bainanmë 'ëo aín pukunu 'iakëxa.