Jonásnën Dios ñuká ñuikë bana
2
Usa 'ain ka Jonásnën aín 'Ibu Dios bainanmë 'ëo chaiira aín puku 'ukëmëuxunbi ñukákin, 2 ësokin kakëxa:'itsaira tëmërakin kana mix 'ën Dios 'ikë 'akinun mi ñukan,
ñukákëxun kamina anuax bamatisa anuabi 'ën bana kuakin 'ë 'akian.
3 Min kamina an manë nunti nikinkë unikaman parúmpapa nëbëtsi aín nëminra anu 'ë ninun 'amian,
'amikëxun nikë ka parúmpapa xobukë an 'ë biaxa.
Bitsia ka aín bëchunkë chaiirabu an 'ë nanë́nkin mapuaxa.
4 Usakin 'akëxun kana mi 'ura 'inunmi 'ë ënkësa tankin;
uínsaranbi kana anuxun mi rabiti xubunu atsíntëkëntima 'ai kixun sinan.
5 Parúmpapa 'umpaxan ka chikítisama okin 'ë nanë́nkin bëarakë 'iaxa;
'ianan kana parúmpapa nëmin 'ukëmëu 'ikë ñu koókëkaman 'ën maxká këñunbi 'ë ranëarukësa tan.
6 Usai 'i kana me kini 'ukëmëuira nipakëkësa 'ixun;
¡ënuax kana uínsaranbi chikítima 'ai kixun sinan!
'aínbi kamina mix 'ën 'Ibu Dios 'ixun, bamatisa 'ikëbi 'ë ië́mian.
7 Usa 'ain kana kushiñumasa tani kana bamati 'ai kixun sinani,
mimi sinan;
sinánkin ñukákëxun kamina mix Dios 'ixun anuxun, mi rabiti xubu upíira anuxun 'akësokin naínuxunbi 'ën mi ñukákëxun kuan.
8 Uin kara unínbia a rabinuxun bëtsi ñukama 'akë a rabikin,
Dios axa ië́mianankë a ëanxa;
9 'aínbi kana 'ën mi asábi ka kai kuëënkin rabiti 'ain rabikin,
kana ñuina 'atankëxun xaroxunti 'ain;
usakin 'akin kana uisokin 'axunuxun karana mi ka usabi okin 'ati 'ain:
¡Mixëshi kamina axa ië́mianankë Dios a 'ain!
10 Usa 'ain ka Diosan bakanu 'ikë bainanmë 'ëo chaiira axa parúmpapa kuëbí me 'urama anu Jonás ëni anákin chikinun 'imiakëxa.