3 Kakëx ka Jonás Nínive kakë ëmanu Diosan kakësabiokin 'ai kuankëxa. Nínive kakë ax ka chaiira ëma 'aish, rabë́ 'imainun achúshi nëtë 'imi anun kuainsa 'iakëxa. 4 Usa 'ain ka Jonás kuanx a ëmanu atsíntankëx munuma banakin Diosan kakë banakama anu 'ikë unikama kai achúshi nëtë 'imi niakëxa. Nikin ka ësokin kakëxa, ënuax cuarenta nëtë 'ikëbë ka Nínive kakë ëma ënëx Diosan 'atimokin masókë 'ianan 'aisama okë 'iti 'ikë kixun ka kakëxa.

5 Usokian ñuixunkëxun kuati ka a ëmanu 'ikë unikama ñuñu 'imainun ñuñuma unikamabë, kamabi uni axa a ëmanu tsókë akamax Diosmi sinani kamáxbi kananxun, añu ñubi pima samáti atun chupa xëni pañuanan chupan mapúkankëxa.

6 Usaia 'ikankë a ka Nínivenu 'ikë 'apun kuakëxa, kuati ka anua tsókë anuax nirukiani kuanxun ax 'apu 'ixuan pañukë chupa a pëtankëxun anribi chupa xëni a pañubiani kuantankëx anua chimapu bukúnkë menu tsóbuakëxa, usai ka Diosan ka 'apun ñu 'atima 'akëkamaribi mëníoxa kixuan 'unánun 'iakëxa. 7 Usai 'itankëxun ka 'apu 'imainun aín suntárunën kushikaman a ëmanuaxa usai 'ikanti achúshi bana nankëxa: Uínbi ka ënë nëtëkaman pitima 'ikën. 'Ianan ka uínbi aín ñuina 'arakakëkama pimianan 'umpaxbi 'amitima 'ikën. 8 'Ianan ka kamáxbi chupan mapuanan atun ñuinakamaribi chupan mapukanti 'ikën, atun ñu 'atima 'akë a sinani bënë́kin chupa xëni pañuxun ka ami sinánkin Dios aín kushibëtanbi ñukákanti 'ikën. Usakin 'akin ka achúshi achúshi unin bëríbia 'atima ñu 'akë akama ënkanti 'ikën; 9 usakin nun 'akëbë sapi ka Diosan nukamami 'atimakin sinania nishkë a tupubuti 'ikën, usai 'ikin sapi ka nu bamamitima 'ikën.

10 Usakin atun ñu 'atima 'akë ënia a mi sinania iskin ka Diosan Nínivenu 'ikë unikama, uisabi kana atu otima 'ai kixun sinánkin an usakin 'akatsi kikë usakin uisabi oma 'ikën.