—'Ën 'Ibu Dios ësa ñu ka 'iti 'ikë, kiax kana 'ën menuaxi 'ëx kian. Usa 'ain kana bënëtishi Tarsis menu abáti sinánkë 'ian, 'ën kana mix kamina achúshi Dios nuibanairakë 'aish bënëtishi nishkëma a 'ai kixun 'unánkë 'ian, usa 'ain kamina 'ën sinánkëxun 'itsaira uni nuibakin 'atimokin tëmëramikatsi kixunbi mimia sinanatia 'akëma 'ain kixun ka munuma banai ami nishkin Dios kakëxa. 3 Usa 'ain kana 'ëmi bamanun 'iminun mi ñukatin 'Ën 'Ibu Dios. Usa 'ain kana 'uran tsókë 'imainun bamakë 'iti 'ain.

4 Ësai kikian ñukákëxunbi ka Diosan Jonás kakëxa:

—¿Usaími nishkë ax kara min sinánkëx asábi 'ik?

5 Usokian kakëx ka a ëmanuax Jonás kuankëxa, kuani ka amiaxa bari urukë ami kikiani kuantankëx; anuxun Nínive ëma istisabi anu mapanati okin 'atankëx a tëmú tsóakëxa, anu ka uisa kara a ëma Diosan oia isnuxun kaini 'iakëxa. 6 Usa 'ain ka Diosan achúshi itsi 'ain pëchi chabu anua Jonásnën aín mapanati okin 'akë anu koonun 'imiakëxa, usokëxun aín pëi tupënkë an Jonásnëa xanaira tanima 'itánun tupë́onkëxa. Usakian tupëonkëx ka Jonás 'itsaira kuëëankëxa. 7 'Aínbi ka a 'iónkë bëtsi nëtë pë́karakë anun Diosanbi unimikëxun xënan aín pëi pikin aín xoribi pikëx chushiakëxa. 8 Usa 'ain ka amiaxa bari urukë auküax bari urukëbëa suñu xanaira bëkinun Diosan 'imiakëxa, 'imikëbë ka ami katamëti 'aíma 'aia aín maxkámixun barin xarokëxa bënainsatankë anunbi Jonás bamatisa tankëxa.

—Usai 'ika 'uran tsókë 'imainun kana bamakë 'iti 'ai —kixun sinani kiakëxa.

9 Usai 'iabi ka Diosan kakëxa:

—¿Usaími an mi tupë́onkë itsi barin aín pëikëñunbi ë́skan nishkë ax kara asábi 'ik?

—¡'Ën sinánkëx ka asábi 'ikën! —kixun ka Jonásnën kakëxa. ¡'Ën nishkënbi kana bamatisa tanin kixun ka kakëxa!

10 Usa 'ain ka Diosan kakëxa:

—Min 'apákëx koókëma ka a itsi 'iaxa; achúshi imë́ kotankëxun mi tupëonbaitibi ka a pëkaratëkënkë anun chushikë 'iaxa. Usa 'aínbi kamina min 'itsaira a sinanin. 11 Usamaira okin kana 'ën Nínive kakë ëma a nuibatin, a ëma chaiira anu ka ciento veinte mil unikama an uisa ñux kara upí 'ikë kixun 'unánan, uisa ñux kara 'atima ñu 'ikë kixun 'unánkëma unikama 'aisamaira 'imainun, 'itsaira ñuina 'arakakë 'ikë kixun ka Diosan kakëxa.