MIQUEAS
Diosan ka Samaria 'imainun Jerusalén ëmanu tsókë unikama atun 'uchakë kupí masóti 'ikë kixun ñuikë bana
1
Ënë bana ka Nukën 'Ibun Miqueas kakë uni Moréset kakë ëma chukúma anuxun namákësokin uisa kara Samaria ëma 'imainun Jerusalén oti 'ikë kixun a nëtëkaman Jotam, Ahaz 'imainun Ezequías Judá menu 'apu 'ain bana 'ikën.2 Kamabi unikama mitsun kamina ënë banakama upíokin kuakanti 'ain;
'imainun ka kamabi menu 'ikë ëmakamanu 'ikë unikamanribi bëmë́kin kuati 'ikën:
Diosan ka anua 'ikë naíkamë 'ëo anuxunbi,
mitsun 'atima ñu 'akë kupí uisa kara oti 'ikë usokin mitsu 'ati 'ikën.
3 Nukën 'Ibu ax ka anua 'ikë anuaxbi ai aín bashi
rëbukaman nikuatsini uti 'ikën.
4 Aín taë shimuküax ka aín bashikamax unin xara tsinu 'arukëx charákësa usaribiti 'inun 'iti 'ikën,
'imainun ka me sapankamaxribi bakan kushiira 'ëkin panarabëtanun tukakësa usaribiti 'iti 'ikën.
5 Ënë ñukamax ka usai 'iti 'ikën Israel unikama Jacobnën rëbúnki atun Diosan kakësabiokin 'akëma kupín,
'imainun ka Israel unikamax anua atux tsókë me anuaxbi 'uchakë 'ain ka usai 'iti 'ikën.
¿Uinuxun kara Jacobnën rëbúnkikaman aín bana kuaisama tanin?
¡Ax ka Samaria kakë ëma anu 'ikën!
¿'Imainun kara uinu Diosmabi atun uniokë ñu rabikankë Judá menua 'ikë ax 'it?
¡Ax ka Jerusalén kakë ëma anubi 'ikën!
6 Usa 'ain ka ësai Nukën 'Ibu kia:
'Ën kana Samaria kakë ëma rurupakëx bukukiankë 'ain.
A me kana anu uvas 'apátisa 'inun 'imiti 'ain.
Usokin 'akin kana anu 'ikë maxáxkama me sapan amiokin puti 'ain
usokin 'akin kana amibirukin 'ati nitsínkë akamaribi uisokin 'akë kara kixun 'unánti 'ain.
7 Usokin 'akëbë ka atun rabikë ñukama ax tukapakin masókë 'iti 'ikën,
'ianan ka tëakëkama upíirabu a 'inánti nankëkama axribi nëënkëx këñuti aín chimapuishi 'iti 'ikën.
Akamax ka bëtsi bëtsi unibëa 'ikë xanukaman aín nami uni 'amixuan bikë kuríkinën 'amikë 'ikën,
'ianan ka a rabinuxun ñu tankin 'akanxa, usa 'ain kana a kuríki charotankëxun amiribishi kuríki 'inun 'imitëkënti 'ain.
Miqueas usai Israel unikamax 'iti ñuikë bana kuati nitë́xëti masá nuituti ian ñuikë bana
8 Usa 'ain kana usokin ñu 'akankëbë anun 'itsaira masá nuituti nitë́xëti inti 'ain;
usai 'i kana 'ën taxakabi ëchiax nianan 'ën chupa pëaxribi niti 'ain,
ñuina raëkëma an nami paxa pikë axa masánuitukë usaribiti 'iti 'ain, 'ianan kana ñuina pëchiñu avestruz kakë aín tuakëxa banai sharákësaribi 'inun 'iti 'ain.
9 Usa 'ain kana 'ëx ësai kin: Samaria ëmanu tsókë unikamax ka 'ën 'atimanun 'imikëx unix chankun 'ikë rontisama usaribi atun 'ucha 'ikën,
usa 'ixun ka Judánu 'ikë unikama 'axa.
'Anan ka Jerusalén ëmanu 'ikë unikamanuribi nukuaxa,
anua 'ën unikama tsókë ëma anuribi.
10 Usa 'ain kamina mitsun ënë banakama Gat kakë ëmanua tsókë filisteo axa numi nishkë unikama atu uisa banabi ñuixuntima 'ain;
'ianan kamina atun ismainun masá nuitutibi 'itsaira intima 'ain.
Usai 'ima kamina Bet-le-afrá kakë ëmanu 'ikë me kupúkë anun chuarui shikíkanti 'ain.
11 ¡Axa Safir kakë ëmanu tsókë mikamax ka
ñatanbiankin buánkëx chupañuma 'aish 'itsaira katë́kë kuankanti 'ikën!
¡'Imainun ka Zaanán kakë ëmanu tsókë unikamax uinubi chikítima 'ikën!
'Ianan ka axa Bet-ésel ëmanu tsókë unikamax 'itsaira masá nuituti inia, usa 'ain kamina mitsux an 'akintiñuma bërúkanti 'ain.
12 'Imainun ka axa Marot kakë ëmanu tsókë unikamax uin karaisa axa atumi nishkë unikamanua chikínun 'akinti 'ikë kixun sinani bënëtiabi uínbi 'akintima 'ikën,
Nukën 'Ibunbi 'imikëx 'atima ñu inúkanti ax Jerusalén ëmanu anun atsínti xëpútikama anubi bëbaruti 'ikën.
13 Axa Laquis kakë ëmanu tsókë unikama mitsunribi kamina,
Israel kamaxa 'iásaribiti 'ikin, bana kuaisama tani 'iakën,
usai 'ikë ax ka Jerusalénnu tsókë unikama 'uchakë kupí 'ikë 'iakëxa,
usa 'ain kamina caballo kamami bikin an nirinbianun mitsun caballonën nikinkë akama tëkërëkakanti 'ain.
14 Axa Judánu tsókë unikama mitsun kamina abë istëkënananxuma Moréset-gat kakë ëmanu 'ikë unikama ashiti kuantanun kati 'ain.
Aczib kakë ëma ax ka anu ñuina pakëti ñu nankë usaribi Israel unikaman 'apu an paránti 'iti 'ikën.
15 Ësai ka Nukën 'Ibu kia:
'Ën kana an Maresá kakë ëmanua tsókë unikaman mitsu bitëkëntanun uni xuti 'ain,
usakin 'akëbë ka Israel unikaman 'apu atúxribi aín kërubu axbi abati kuantankëx,
aín bashi kini Adulam kakë ëma 'urama 'ikë anu axa ami nishkë unikamami rakuë́ti unëti kuanti 'ikën.
16 Usaia 'imainun kamina axa Jerusalén ëmanu tsókë unikama mitsux ami sinaínrakë mitsun bakë bëchikëkama sinani masá nuituti ini 'aímai maxkukin mitsun bu tëakanti 'ain,
usakin mitsun tëai kamina ñuina pëchiñu nonshianën maxká raniñuma iskësa usaribi mitsun maxká 'iti 'ain,
mitsun bakë bëchikëkama ka axa mitsumi nishkë unikaman ñatanbiankin buánti 'ikën, usa 'ain kamina,
mitsúxbi upiti maxkuti ñuina pëchiñu nonshianën maxká usaribi 'itánun 'ikanti 'ain.