Israel unikama 'aisamaira okin tëmëramiti unikama ax ka kushiirabu 'ikë kixun ñuikë bana
2
¡Uisa kara Judánu 'ikë unikama an 'uxkinma imë́bi 'atima ñu 'atishi sinánkë unikama a oti 'ain,kixun sinánëkin ka pëkarakëbëtan, an sinánëkë ñu a 'aia, atun ka usokin ñu 'ati 'unánkëira 'ikën, usa 'ixun ka usakin ñu 'akanania!
2 Bëtsi unin mekama kuëënkin ka atun bikuankania;
usakin 'anan ka xubukama aribi biti kuëënkin mëkamakania.
'Anan ka uni 'imainun 'ain 'aintsi 'ibukamabi,
an kasunankë 'ain ñukama binuxun 'atima oia.
3 Usa 'ain ka ësai Nukën 'Ibu kia:
'Ënribi kana uisa karana mitsu oti 'ai kixun sinanin.
Usa 'ixun kana mitsúxmi 'atima ñuira inuti uisai kaina 'ikani usai 'imi,
ñuina 'arakakë aín tëxanu tëkërëkakëx aín maxká pikukasmakësa usaribiti 'inun mitsu 'imiti 'ain,
usai 'i kamina mitsux rabiakati nitsi nux kananuna bëtsi unikamasama 'ai kixun sinánkë a nëtë́ti 'ain, anun 'atima ñuira inuti nëtë 'ikëbë.
4 A nëtën ka mitsu raíri unikaman 'atima okëx
masá nuitutia kantaxunkin. Ësakin mitsumi kuaikin kakanti 'ikën:
Nukamax kananuna 'aisamaira masokin këñúkë 'ian;
nun ëmax ka Diosnan 'ikën,
'aínbi ka Nukën 'Ibunan 'ikëbi axa numi nishkë unikaman 'ibuaxa usa 'ikë ka uínbi usakin 'axuma ka 'a kixun kati 'aíma 'ikën;
usa 'ain ka nun mekama nu bikuantankëx bëtsi unikamabë 'inánanxa.
5 Usa 'ain kamina mitsux anua Nukën 'Ibun unikama 'ikë anu 'itima 'ain.
Dios kikë bana ñuikinbi 'atimakin bana ñuikë unikama ñui kikë bana
6 ¡Usa 'ain ka ësai kia an Diosan bana uni ñuixunkë unikaman ka paránkin nu bana ñuixuntima 'ikën! —kiax ka atux kia—.
Usa 'ain ka nunu 'atima ñukama 'inútima 'ikën.
7 ¿Mitsun kaina Diosan ka aín uni Israelkama 'atima okëma 'ikë kixun sinanin?
¿Mitsun kaina Diosan ka nishkin aín uni 'akinti ëanxa kixun sinanin?
¿Mitsun kaina 'ëx kikësokinsa Diosan aíma kixun sinanin?
¿Mitsun kaina Dios kikë bana an kara upíñu anun amima kixun sinanin?
8 Mitsux kamina 'ën unikama 'iakën, usa 'aishi kamina 'ën unikamami 'in.
'Aínbi kamina bërí mitsux 'ëmi nishkë unibu 'ain,
usa 'ixun kamina axa 'akanankuatsini ukë unikaman chupa kupíkë bikuankanin,
usakin 'akin kamina usakin ñu 'ai ismina upí 'iti 'ai kixun sinánkanin.
9 'Anan kamina atun xubunuabi aín xanukama ëman chikinkan,
chikíanan kamina atun bakë bëchikë 'imainun 'ini bëchikëkamaribi,
atu 'inanuxuma 'ashikin bikan,
'anan kamina 'ën 'inan ñukama aribi ëmian.
10 ¡Usa 'ain kamina bërí nirukiani ënuax kuankanti 'ain! Ënë mex ka anumi mitsux tantikanti ama 'ikën.
'Ën kana anuxumi mitsun 'atima ñuishi 'ai 'ëmi manukankë kupí,
asérabi 'atimokin ënë me masóti 'ain.
11 Bëtsi unix ka këmëkin abi sinanx ësai kia:
'Ën kana uvas baka 'akë 'imainun bëxnan ñui kin,
ësaia an bana ñuikë unikama këmëi kikë ax ka ënë ëmanuxun mitsun kuakëx asábi 'ikën.
Diosan an kaískë Israel unikama 'akinuxun ká ñuikë bana
12 Usa 'ain ka ësai Dios kia:
'Ën unikama kana bëtsi unikaman buan 'ikëbi amiribishi Jacobnën rëbúnkikama kamabi timë́nun 'imiti 'ain;
usokin 'akin kana Israel unikama 'itsamara 'ikëbi atu timë́nun 'imiti 'ain
'imikin kana ñuina 'arakakë aín kënënu 'ikësa 'inun 'imianan carnerokaman pasto pia 'ikësa 'inun 'imiti 'ain,
usokin 'imikëx ka Israel unikamax 'uakamë 'ëoi 'itsaira ñuina 'arakakëx 'ikësai sharákanti 'ikën.
13 Usai 'ikëbë rëkuë́nkiani kuania ka
atun Dios nuibiankanti 'ikën,
nuibiani ka anun ëmanu atsínti xëputi anun chikikanti 'ikën.
Usai 'ikankëbë ka Dios aín 'apu ax kamaxunbi atun ismainun kuanti 'ikën.