Uisai kara 'atimakin ñu 'akë 'apukamax 'iti 'ikë kixun ñuikë bana
3
Bërí kamina an bana mëníokë 'apukama 'imainun,Israel unikaman kushibu mitsun ësai kia küakanti 'ain,
¿mitsun mi 'unántima kara unin ñu 'atima 'aia mëníoxunti ax 'ik?
2 Usa 'aínbi kamina ñu upí 'ati kuëënkinma 'atima ñuishi upisa ax 'ikë kixun 'ati kuëënin;
mitsun kamina 'ën kaískë unikama 'atimaira okin
aín namishi bianan ñuina xo rakánkë usokinshi 'akanin.
3 Mitsun kamina 'ën unikama unima 'ikë 'akësokin 'akin; aín bëxi tukapanan aín xokama tëkënpakësokin 'anan;
ñuina nami ñutënu 'aruti tëapakësa usakin 'akanin.
4 Achúshi nëtën kamina mitsun Dios 'akinun kixun kati 'ain,
'aínbi ka mitsun ñukákëxun an kuatima 'ikën.
A nëtën ka Dios mitsumi unë́kësa 'iti 'ikën
ñu 'atimaira 'aimi ami 'uchakankë 'ain.
Dios kikë bana ñuikë 'ixunbi këmëkin bana ñuikë unikama ñui kikë bana
5 Ësai ka Dios an aín unikama këmëkin bana ñuixunkë unikama ñui kiaxa,
a unikamax ka upiti kananuna bukuti 'ai kiax mitsun piti 'inánkëxun pi kia,
'aínbi ka uin kara piti 'inanima a unikama 'akánanti ka 'iti 'ikë kixun kaia.
Usa 'ain ka an bana ñuikë unikama a Diosan ësakin kaia:
6 An bana ñuikë mitsun kamina namákësokin imë istëkentima 'ain,
bari kuabuti bëankikë 'ain iskamakësa usaribi okin,
'ianan kamina ñukama kara 'iti 'ikë kixunbi bëan bëánkibukë anuxunbi 'unántima 'ain.
'Imainun ka an paránkinshi uni bana ñuixunkë unikamanribi raíri unin 'akësaribi okin bari xupinbutankëxa imë́ naëx 'ain bëánkibukë 'aínbi añu ñubi iskëma usaribi okin añubi istima 'ain.
7 An uni paránkinshi bana ñuixunkëkama 'imainun an ñu tankë unikama atux ka
ami kuaikian unikaman ñuikëx 'itsaira katë́kë bërúkanti 'ikën.
Kamabi atux ka uisa banarabi banaima nëtë́këshi Diosan atun kakëxunbi kuaisama tankëbë 'iti 'ikën.
8 'Aínbi ka Diosan an kakësabiokin 'aia aín bëru ñunshinan 'akinkëx 'ëx kushiñu 'ianan rakuëma uni 'ixun atu 'akinun 'ë 'imiaxa,
usa 'ixun kana atu bana ñuixunkin Dios ax ka kushiira 'ikë kixun Israel unikama kanan atux ami 'uchakian an kuëënkëma ñuishi 'akë akama kati asábi 'ain.
Jerusalén ëma ka Diosan 'amikëxun axa aminishkë unikaman masóti 'ikë kixun ñuikë bana
9 Bërí ka an bana mëníokë 'apukama 'imainun Israel unikaman kushibu an ënë bana kuati 'ikën,
mitsun kamina upí ñu 'ati a kuëënkinma 'atima ñuishi 'akin usakin ñu 'ati kikë bana ax kikësokin 'akaniman,
10 usa 'ixunbi kamina Sión kakë bashi anua 'ikë,
Jerusalén ëma,
uni 'akin upíokin ñu 'akëma 'ixunbi 'atima ñuira 'akinbi birutëkënkanin.
11 Axa Jerusalén ëmanu 'ikë an bana mëníokë unikama an ka uin kara kupíoia a ëanan an kupíokë a 'atima oti sinania,
'imainun ka sacerdotekaman kupíokëxunshi uni 'unánmiti kuëënia,
'ianan ka an Dios kikë bana ñuikë unikamanribi kuríki kupíshi abi sinántankëx ësai kia:
Nukën 'Ibu ka nubë 'ikën usa 'ixun ka ñu 'atima inútima rabanan Nukën 'Ibun nu bërúaia.
12 Usa 'ain kana mitsun 'uchakë kupí Jerusalén ëma Sión kakë bashinua 'ikë a 'ën bërí 'akintima 'ain, achúshi me anu ñu 'apátisama 'ikë 'akësokin,
usakin 'akëx ka maxax 'aisamaira bukunrukësa usaribi 'iti 'ikën 'imainun ka anuxun Dios rabiti xubunua 'ikë me anu 'aisamaira xubi muxañu uniti 'ikën, mitsun mi ñunshinakëkin 'atima ñuira 'ai 'uchakë 'ain.