Davidtan rëbúnki achúshi Belénnu 'apu 'iti ñuikë bana
5
Jerusalénnu bukukë mitsun kamina amimi mitsux katamëkanti ëma kënëarakin 'akánti 'ain,nuka chikítisama okin bëararakanxa,
usakin 'axun ka Israelnu 'ikë 'apukama a 'aisamaira okin tëmëramiti 'ikën.
2 'Aínbi kana: Belén Efrata, mi Judánu
'ikë ëmakamanu 'ikë ëma chukúma anuax achúshi uni Israel unikaman
'apu 'inux chikiti 'ikën, ax ka uni achúshi bërámaira ax tsóa aín rëbúnki 'iti 'ikën.
3 Usa 'ain ka bërí Diosan aín unikama ënia,
'aínbi ka xanun aín tuá achúshi bakënuxun kainkë usa 'iti 'ikën.
Usa 'ain ka a tuá aín aintsi Israelkama
ñatanbiankin buánkama abë birananti 'ikën.
4 Usa 'ain ka a 'apu aín unikama bërúankin 'akinun aín kushi 'inánti 'ikën,
usakin 'akëx ka a unikama upiti tsóti 'ikën,
usakin 'akëbë ka Diosan 'akë ñu chaiira ax kamabi menuxun 'unánkë 'iti 'ikën.
5 An ka kamabi uníxa upiti tsónun 'imiti 'ikën.
Uínsaran kara asirio unikama nun menu bëbai nun
'apun xubukamanu atsinia, anun ka a 'apunbi
mapai achúshi 'imainun rabë́ aín kushibu a këñun mapai
'imainun rabë́këñun achúshi 'apukama atu 'anun xuti 'ikën.
6 Usa 'ain ka Asiria unikaman nun menu bëbaxun nu bibiankin atun menu ñatanbiankin buankësokin buánkë 'ain,
nun kushikama 'imainun aín suntárukaman anua 'akanankë ñukama anun atu 'axun atunua nu chikínti 'ikën.
Usakin 'atankëx ka nun kushikama atux Asiria me anua Nimrod 'apu 'ia anubi 'apu 'iti 'ikën.
Diosan axa atumi nishkë unikama këñunun Israel unikama 'amia ñuikë bana
7 Usa 'ain ka Israel unikamax bëtsi bëtsi ëmanu 'ikë unikamasamaira 'aish,
nibí 'imainun 'uí Diosan menu 'ibúmikëxua,
xubi komikë usaribikin ka unixa usai 'iti 'ikë kixun sinánkë 'aímabi 'iti 'ikën.
8 Usa 'ain ka bëtsi ëmakama nëbë́tsia bërúkë,
Jacobnën rëbúnkikama ax
achúshi paru 'inúansa 'aish raëkë ñuinakama nëbëtsi 'ianan,
paru 'inúan achúshi anua ovejakama 'arakakë anu 'ikësa 'iti 'ikën,
usa 'ain ka inúkinshi bixun aín 'untsisan tukapakë usaribi 'iti 'ikën,
usakin 'akin ka achúshinëxi abati 'iakëtanun ëntima 'ikën.
9 Usakin kamina mix Dios 'ixun kamabi
axa mimi nishkë unikama këñuti 'ain.
'Apun 'akanantima bana nankin a rabikë ñukamaribi këñuti kia bana
10 Ësai ka Dios kia:
A nëtë 'ikëbëtan kana min caballokama këñukin 'anan
anuax 'akanankë caballonën nirinkëkama aribi masókin këñuti 'ain.
11 'Anan kana min ëmakamaribi 'atimokin masónan
anuan min ëma kënëarakama aribi rurupati 'ain;
12 usakin 'anan kana minua 'ikë ñubë́ unikama nëtënun 'imiti 'ain,
'imianan kana an ñu tankë unikama aribi minu 'aíma 'inun 'imiti 'ain;
13 usotankëxun kana min rabikëñukama 'imainun maxákama diosmabi rabikë akamaribi masóti 'ain,
usakin 'aia kamima uínsaranbi mitsúnbi
'a ñukama a rabitëkëntima 'ain.
14 'Ianan kana min i upíirabu akamaribi ëchianan,
aín ëmakamaribi 'aíma 'itánun këñuti 'ain.
15 'Ëx 'itsaira nishkin kana, axa 'ëmi sinántisama tankë,
'ën kakëxun kuaisamatankë unikama uisokin karana 'aisatani usokin 'ati 'ai kiax ka Dios kiakëxa.