Israel unikamax an kakësama okin 'ai Diosmi 'ucha ñuikë bana
6
Mitsun kamina bërí uisokin kara Diosan mitsu kaia kixun kuati 'ain:¡Usa 'ain kamina nirutankëx bashikama 'imainun matá me kaman min bana kuanun mixribi kiti 'ain!
2 Bashikama 'imainun an me tuinkë
akaman ka kuati 'ikën:
Nukën 'Ibu ka aín unikama 'atima oti sinania,
usa 'aish ka Israel unikamami nishia.
3 Ësai ka Nukën 'Ibu kia:
Israel unikama mitsun kamina 'ë kati 'ain.
¿Uisa onan karana añu 'axunkin mi ubion?
4 'Ën kana mitsun chaitiokëma Egipto menuxun tëmërakin ñu mëëiabi chikiankën;
usokin 'anan kana Moisés këñun,
Aarón 'imainun María, an atu 'akinun xuakën.
5 'Ën unikama bërí kamina sinánkanti 'ain
uisakin kara Balac Moabnu 'ikë 'apu an sinánkëxa kixun,
'imainun kara Balaam Beornën bakë bëchikë an uisakin ribi a kamiakëxa kixun.
'Imainun kamina Sitimnuax, Guilgalnu kuania kara Diosan mitsun 'unánun uisokëxa kixun aribi sinánkanti 'ain.
Nukën 'Ibun aín unikaman kara uisakin ñu 'axunia kixun kainkë ñuikë bana
6 ¿Uisa ñu uani kuanxun karanuna,
Nukën 'Ibu Dios manámi 'ikë a rabiti 'ain?
¿'Ianan karana vaca bakë achúshi baritiañukama
'aímai këñutanu xaroxunti 'ain?
7 ¿'Ën mil carnero 'inánanbi, xëxá 'umpax iskësaira
xëniribi 'inánkëx kara Nukën 'Ibu kuëënti 'it?
¿'Ianan karana 'ën 'atima ñu 'ai 'uchakë kupín 'ë a tërënxunun 'ën bakë bëchikë apan 'inánuxun ñukati 'ain?
8 Ënë ñukama 'axunti ka Dios kuëënima,
an ka nukama kaxa uisa ñux kara upí 'ikën,
'imainun uisa ñu nun 'axunti kara ax kuëënia: ax ka ësa 'ikën,
bëtsi unikamabë upí 'iti, uisa ñu 'akatsi karanuna kia usakinbi 'ati,
'imainun an kakësabiokin 'anan ax kikësabiokin ñu 'ati.