HABACUC
An bana ñuikë Habacuc Diosbë bana ñuikë bana
1
Ënëx ka an aín bana ñuikë uni Habacuc kakë aDiosan usakin ain unikama kanun kixun ká bana 'ikën.
2 'Ën 'Ibu Dios, ¿uínsaran kaina 'ën munuma
banakin ñukákëxun kuakin 'ë 'akinti 'ain?
¿Uínsarainra karana munuma
banakin bëtsi unikaman 'atimañu 'akëbëtan 'akinkëxumabi 'ën mi ñukákë a ënti 'ain?
3 ¿Uisa kupí kaina 'aisamaira ñu 'atima 'akania
isi masá nuitunun 'ë 'imin?
Kamabinua kana 'atima ñuishi 'akania isanan ñu 'aisama okin masókania isin;
'imainun kana amami amamiaxa tsuákiruax unikama mëanani sharatia kuatin.
4 Ax kikësokin 'ati min bana ax kikësokin ka 'akanima,
an bana mëníokë 'apukaman ka 'atimokinshi ñu 'aia,
an ñu 'atima 'akë unikaman ka
an ñu 'atima 'akëma uni an ka kuëënkësa okinshi 'aia,
'imainun ka 'upiokin 'akinma 'atima ñuishi upisa kixun 'aia.
5 Ësokin kakëxun ka Diosanribi kakëxa;
Israel unikama mitsun kamina axa mitsu rapasu 'ikë unikama uisai kara atux 'ia a isi rakuëkanti 'ain.
Usa 'ain kana 'ën mitsunu usaribi ñukama inumiti 'uramashi 'ain,
usakin 'aia bëtsi unikaman ñuixunkëxunbi kamina mitsun usa ka kixun sinánkantima 'ain.
6 Usa 'ain kana caldeo unikama 'akanani unun 'imiti 'ain atux ka
ñu 'aisama 'akëbuira 'aish ñu 'aisama atishi 'ikën,
usa 'ain kana atu ënti 'ain,
atun suntárukamax ka bëtsi bëtsi menu kuankin,
ainamabi bëtsi unikaman me 'ibuakin bikë unibu 'ikën.
7 Usa 'aish ka atux 'itsaira bëtsi unikama rakuëmikë 'ianan 'aisama unibu 'ikën,
usa 'ixun ka ax kikësoi 'iti bana a tankinma atunan kikësokinshi 'aia.
8 Atun caballokamax ka paru 'inúan abákësamaira 'inun abatia,
usa 'aish ka shórapánakama raëkëma anu uni 'ikëma menu 'ikë axa në́kësamaira 'ikën.
Atun caballokamax ka paru 'inúan abákësamaira 'ianan,
shórapána raëkëmakama në́kë anu uni 'ikëma menua 'ikë usamaira 'ikën.
Usa 'aish ka an nikinkë unikaman buánkëx abákin 'itsaira 'ixun aín taën me banamikë ax 'uranxubi unin kuakë 'ikën,
'ianan ka tëtëkamë 'ëo aín piti ñuina binux 'ikësa usaribiti 'ia.
9 Usa 'ixun ka Babilonianu 'ikë suntárukaman,
anua kuankënua mërakin bënë́kinshi ñu 'atima obiani kuania;
usa 'ain ka atux kuania kuati kamabi menu 'ikë unikama rakuë́tia,
usa 'ain ka ñatankia bikë unikama ax parúmpapanua masi bëru iskësamaira 'ikën.
10 Atux ka bëtsi ëmanu 'ikë 'apu kamami kuaianan 'ain kushibukamaribi 'usania.
Usai 'ikin ka atun ëma kënëkëkama anun 'irukianxun 'ati 'aia,
usakin 'atankëxun ka rakuëokin mëëkëxa rakuë́tia bëtsi unikama ñatania.
11 Usakin 'ai ka suñúan kushiira inúkësa 'inun 'ia;
usakin atun kushínbi 'atankëx ka
nukamax kananuna dios kamasamaira kushiira 'ai kiax kikania.
Kiax ka Dios kiakëxa.
12 Ësai kia ka Habacucnën kakëxa: ¿Nukën 'Ibu Dios mix karamina bërámabi 'ia 'aish, 'ën Dios upíira 'ianan ñutima oi tsókë a 'ain?
Usa 'ikë kana 'ën mi rabin min kamina 'ë bërúankin 'akian,
minbi kamina an kuëënkësa okían nu 'atimonun Babilonianu 'ikë unikama kushiira 'inun 'imia.
13 Mix kamina upíira 'ain, usa 'ixun kamina ñu 'atima 'ai 'uchati kuëënima,
usa 'ain kamina an ñu 'atimashi 'akë unikama nu 'aisama oia,
iskinbi nua usakin 'anun isëshitin.
¿Uisa kupín kaina uisaibi kikínma unin bëtsi 'aia isíbi kima 'ianan an ñu 'atimashi 'akë unikaman,
asa 'ikëmabi uni upí sinánñukama 'akëbëbi uisaibi kiman?
14 ¿Uisa kupín kaina unikama bakanu 'ikë ñuinara
'akësokin 'anan 'ibuñuma pukun niríkë ñuinakama 'akësokinshi 'ain?
15 Caldeo unikaman ka bëtsi menu 'ikë unikama an
tsatsa bikë unikaman, 'ibuaxun tsatsa bikësa usakinshi 'aia.
Usakin 'akin ka mishkitinën 'anan rikan bikësa usakinshi bitsia,
bitankëx kana bia kixun sinani kuëënkë usairibi 'ikania.
16 Usa 'ain ka an tsatsa bikë unikaman atun rika rabianan,
atun mishkitikama aribi ñuina xaroxunkin,
asábi ka kakin a kupí kananuna upí pitiñu 'ianan, 'itsaira pitiñu 'ai kiax kia.
17 Usakin kara, ¿Babilonianu 'ikë unikaman 'ain rikan bikin 'akësokinshi 'akin nukama 'akin këñuti 'ik?
¿Atun kara usokin kana 'atima 'ai kixun sinánkimaishi unikama këñukin 'ati 'ik?