2
'Ën kaisa tankë banakama kana kan, usa 'ain kana upíokin anuxun kuati,an bërúankë unin anuxun bërúanti 'akë anuxun bërúankësa okin uisakin kara Diosan 'ë kaia isnuxun 'ati 'ain,
uisakin kara 'ën kakë banakama a ñuikin 'ë kaia kana kuati 'ain.
2 Usa 'ain ka Diosan ësokin 'ë kakëxa:
Maxax paránu kamina mi kamainun bana kuënëoti 'ain,
'aínbi kamina bënë́kinshi istisabi 'itánun 'aia kuaisabi 'ati 'ain.
3 Kamina kuënëoti 'ain, anúan 'iti nëtë ka 'ikëmapan 'ikën,
usa 'aínbi kana anúan 'iti nëtë 'ikëbëtan mi ismiti 'ain;
'aínbi kana 'ëx kikësa okinbi 'ati 'ain.
Usa 'ain kamina min basikëbëtanbi uisaran kara a ñukama 'ia kaínti 'ain.
Usa 'ain ka anúan 'iti nëtë aka 'iti 'ikën.
4 Ënë bana kamina kuënëoti 'ain, an ñu 'atima 'akë unikamax ka ax isa usaira 'ikë kiax kikanti 'ikën,
'aínbi ka an ñu upí 'akë unikama atux 'ëx kikësokin 'ai tsóti 'ikën.
Anuan bëtsin uni 'atimoti ñuikë bana
5 An uvas baka xëakë unikaman ka bëtsi 'atimoia,
usokëxun ka bëtsínribi a kupikin usakinribi 'aia,
usakin 'ai ka 'ëx kana usaira 'ai kiax anun rabitia, usakin 'akin ka tantikima,
atuinra bëtsi 'atima okin 'atankëx kushin rabitia, usai ka an 'anuma bëtsi uni 'atankëx kia.
Usa 'aish ka anu uni bamaia maínti me naëkë usaribi 'inun atun kuëbi bakai banakania,
usakin ka an ñu 'atimashi 'akë unikaman bëtsi menu 'ikë unikama 'atankëxun 'ain ëma 'ibuaia.
Usakin 'ai ka anua uni maínkë me naëkësa 'aish an ñu 'atimashi 'akë unikama tantima.
6 Usai atux 'ikëbë ka kamabi menu 'ikë unikama Babilonianu 'ikë unikama ñatankin bia akamax kantai ësai kiti 'ikën:
¡Mitsux kamina minan 'aímabi bëtsi unikaman ñu bikë anun ñuñuira 'ikanin!
¿Uínsaran kaina mitsu ribinxun kupíokëxuma bëtsi unikaman ñu bianan atun chupa
bitsimi anun ñuñuira 'ikankë a ënkanti 'ain?
Usakë 'ikë ka Diosan mitsu aín kuëënkësokin 'ati 'ikën.
7 Usai ka 'iti 'ikë kixun mitsun 'unánkë 'aímabi ka bëtsi menu 'ikë unikama an mitsu kuríki 'inánkë,
akamax numi ribinkë kamina nu kupíoti 'ai kakin an rakuëoxun ñuñuma 'itánun rakuëoxun mitsun ñu bitsi uti 'ikën,
usakin 'akin ka ñuñuma 'itánun mitsu ënti 'ikën.
8 Usakin mitsu 'ai ka ain memi bikan bëtsi menu 'ikë unikama mitsu 'anux timë́ti 'ikën,
usai 'ikin ka mitsumi 'asaribiokin mitsu 'atima oti 'ikën,
usai ka 'iti 'ikën, mitsun kamina usakin 'akin
uitishi uni kara atu 'atima ñuira 'akin a tanti bana kikësokin 'akinma rëtëanan 'atimaira okën,
usakin kamina bëtsi menu 'ikë unikama ain mekëñun atun ëmakamaribi 'akën.
9 ¡Uisa kupí kaina mëkamakë ñun mitsun aintsi 'ibukama ñuñuira 'imikanin,
usakin kamina mitsux ñu 'atima inuanan,
tëmëraima isa 'inun kixun mitsun aintsi 'akanin!
10 Usakin bëtsi menu 'ikë unikama 'akin kamina mitsun 'aintsi 'ibukama rabinnun 'imikan,
mitsúxbi kamina 'atima orakan,
usakin ñu 'akin kamina mitsúnbi anun 'atima orakati barikan.
11 Anun ëma kënëaranu 'ikë,
maxákama 'imainun xubu 'irakankë ikamaxbi ka
mitsun 'atima ñu 'akë ñui kikanti 'ikën.
12 Mitsun kamina anu tsókë unikamapain 'atankëxun,
anubi birutëkënkin ëma 'anan, upíokin ñu 'akimabi anuxun 'atima ñuira 'akanin.
13 Nukën 'Ibu Dios kamabi kushiñu an ka
mitsun ñu mëëkë axa ñankáishi 'akë 'inun 'imianan,
atsanxunbi ñu mitsun mëëkë axribi ñankáishi 'inun 'imiti 'ikën,
akamax ka mitsun ñankáishibi 'akë 'aish tsin nënkin masókë 'iti 'ikën.
14 Usa 'ain ka bakakaman a mi saëkin aín
'umpaxan parúmpapa buákarukë usaribi okin
kamabi menu 'ikë unikaman Diosan aín kushin ñu 'akë 'unánti 'ikën.
15 ¡Mitsun kamina mi 'urama 'ikë ëmakamanu 'ikë unikama ñu muka xëamin,
anun usakin 'ati kamina uvas baka 'akë këñun mëskuxun bëtsi ro xëamin!
Usakin xëamixun kamina ñu muka xëax sinanima chupañuma rakákë usa ka kixun ain nami iskanin.
16 Usa 'aish kamina usa ka kixun bëtsin rabikëxma katë́kanti 'ain,
Diosan ka mitsu bëtsi unikamami 'akësa usakinbi 'ati 'ikën,
usakin 'akin ñu muka xëax 'ikësai chupañuma 'ikë ka mitsun,
nëtokë ñu rëbu tëakëma a iskanti 'ikën,
usakin 'akëx kamina mitsux rabinkëma 'aish bëtsi unikamasashi 'iti 'ain.
17 Usai 'imainun ka mitsun masókan Líbanonu 'ikë nikama axribi kiti 'ikën,
kimainun ka ñuinakama abámikin 'akan usaribikin Diosan mitsu abámiti 'ikën.
Ësai ka mitsunmi 'aisama ñuira 'akin a tanti bana kikësokin 'akinma uni 'anan,
bënë́kinshi bëtsi ñu ënë menuxun 'anan,
'ain ëma 'imainun anu 'ikë unikama 'akan a kupín 'iti 'ikën.
18 ¿Añu kara an 'ati 'unánkë 'ixun unin ñu tankin
'atankëxun këñukin sënë́onkë 'ixunbi 'ati 'ik?
¿Añu kara bëtsi ñu tankin 'axun ax isa Dios 'ikë kixun uni paránkin kakë anbi 'ati 'ik?
Bëtsi ñu tankin uniokë ñukama ax ka banaima;
¿Uisa 'aish kara a ñukamami an uniokë unikamax katamëti 'ik?
19 ¡Mitsun kamina bëtsi dios i 'akë 'ikëbi isa bësunun kain;
'imainun kamina maxáribi banakë 'ikëmabi nirunun kixun kain!
¿Akamax kara usai ka ñu 'iti 'ikë kiax kiti 'ik?
¡Usama ka atux ka uni 'ikësai tsóti anun uintiñuma 'ikën,
usa 'aish ka kuri 'imainun manën unin rataka kakëishi 'ikën!
20 'Aínbi ka anúan Dios ax aín xubu upíira anu 'ikën:
usa 'ain ka an ismainun kamabi menu 'ikë unikamax ñu 'atima 'aíma bukukanti kuëënia.