Habacucnën ashikin Dios ñuká bana
3
Ënëx ka an Dios kikë bana ñuikë Habacucnën usakin Dios ñuká bana 'ikën.2 'Ën kana kamabi ñu Dios 'ixunmi 'a akama kuan,
usa 'ain kana 'itsaira 'ëx mimi rakuë́tin.
Usa 'ain kamina nux tsókëpan 'ain bërí bërámami
'asaribiokin ñu chaiirabu nunribi 'unánun nu 'axunti 'ain.
Usakin 'akin kamina mix kamina nishíbi nuibanankë 'ai kixun nu 'unánmiti 'ain.
3 Dios ka Temán kakë me amiax uanan,
Parán kakë menu 'ikë bashi anuax Dios upíira ax uti 'ikën.
Aín kushin ka naíkamë 'ëo kamabi pëkaia,
usa 'ikë ka kamabi menu 'ikë unikaman a rabiti 'ikën.
4 Usa 'ain ka aín kushi ichu ichukikë anun bëarabuinkësa 'ixunbi kanákan mëríkin pëkakë usaribi okin aín kushi unë́kësa 'ikëbi mëramia,
aín mëkënuax ka aín kushi an kushiira 'itánun pëkakë ax chikiti 'ikën.
5 Usa 'ain ka axa ukëbë bëtsi bëtsi 'insín chikíkëbë,
a kaxú anuan 'itsaira uni bamati 'itsis kushiira 'iti 'ikën.
6 Usa 'ain ka axa nirakëkëbë me shaíkiti 'ikën,
'imainun ka kamabi menu 'ikë uni an iskëx 'itsaira rakuë́ti 'ikën,
an ka nikama 'imainun bashi xënikama rurukubunun 'imianan,
bërámaira an painra ënënsarama unia nikama këñuti 'ikën,
usaía ñukama 'imainun ka Dios ax uínsaranbi uisaibi 'ikëma ax 'iásabi 'iti 'ikën.
7 'Ën kana Cusánnu 'ikë unikama kara uisai tsotia isan,
atux ka 'aisamaira tëmëraia usa 'aish ka kini 'ukëmëu pakëax uni urukasmakë usa 'ikën,
'imainun kana Madiánu tsókë unikamami rakuë́ti matsispukuti 'ikën.
8 ¿Mix karamina Dios 'aish bakakamami nishin?
¿Mix 'itsaira nishkin karamina parúmpapakama 'atima oti 'ain?
¿Usa 'aish karamina min caballonën nikinkë anu 'irukiani bëtsi unikama 'ikësa kiani kuanti 'ain?
9 Min kanti kanukëishi 'imainun min piakama mëníokëishi kamina 'ain.
'Ianan kamina meribi anua bakakama rakati 'imiakën.
10 Usa 'ain ka nikamaribi mi isi 'ikësai shaíkiti 'ikën.
Usai 'imainun ka naínuax 'uí 'itsaira nëtë́timaira 'ibúti 'ikën,
'imainun ka parúmpapa aín nëmin axribi xukirui aín bëchun chairui banati 'ikën.
11 'Ianan ka bari 'imainun 'uxë amiaxa urukë anuax uruima anubi nirakëti 'ikën,
usai 'ikëbë kamina mix pia upíira axa ichúkuatsini ukësa 'ianan,
paka pia axa nikëx mëríkiani kuankë usaribi 'ain.
12 Usa 'ain ka mix nishkë ax kamabi menu kuania,
mix 'itsaira nishkin kamina mekamanu 'ikë unikama,
'atima okin kuakëmasa oti 'ain.
13 Min unikama 'imainun,
minbi kaískë 'apukama 'akinuxun kamina chikínti 'ain.
Min kamina an ñu 'atima akë unikaman xubu 'atimokin këñuanan,
ami birukin atun xubu 'akë maparasa 'ikë aín 'apukama aribi masókin këñukin 'ati 'ain.
14 Usakin 'anan kamina aín 'apukamabi an tuinkë aín pianbi 'an,
usokëbë ka axa caballonu 'ikëkama nëtë masá kuatsinkësa ax
'ëx kana usaira 'ai kiax kima an 'akintiñuma 'ain,
unikaman atu 'unánnumaishi unëxun këñukin 'ati 'ikën.
15 Nëtë kuínuax kamina caballonën 'ikësai parúmpapanu kuani,
uinu kara 'umpax kuainakëaxa anubi kuanti 'ain.
16 Ënëkama ñu 'iti kuati kana rakuëan,
usai 'i kana 'ën kuëbí bërëkai 'ian,
'ianan kana 'ën kisikama anun nisama
'imainun ka 'ën namikamaribi kushima 'iaxa.
Usa 'ixunbi kana bënë́kinma uínsaran nëtën kara Diosan an nu
'atimokin 'akë unikama masánuitutanun aín suntárukama 'imia kaínti 'ain.
17-18 Usa 'ain kana 'itsaira kuëënti 'ain,
Diosan 'ë ië́mikin 'akinkëx.
'Ën kana higuera kakë i uabutima 'imainua uvas
'apákëkama 'ianan olivos kakë akama bimima 'imainun;
naënu 'apákëxunbi ñun tuaima 'imainunbia; ñuina
'arakakëkama 'ianan ovejakama 'imainun vacakama 'aíma
'inun këñúkë 'aia aín kënëishi 'aínbi kana 'ën mishi rabiti 'ain.
19 Diosan ka 'ë kushioia, usakin 'akin ka 'ën kisikama kushi 'imikin,
chaxu abákësa 'inun abati,
uinubi kara kuani aín bashinu kuani ië́nun 'ë 'imiti 'ikën.