Israelnën 'apu Jerusalénnu bëba ñuikë bana
9
9 (Ësai ka Dios kia.) ¡Sión ëmanu tsókë unikamax ka 'itsaira kuëënti 'ikën!¡'Imainun ka Jerusalén ëmanu tsókë unikama atúxribi kuëëni kantati 'ikën!
Mitsun 'apu, upí ainra kamabi ñu kananti ax ka aia,
'aínbi ka mënin sinaínshi 'aish,
achúshi burro xanuntuá bërí kanikë a kamanan tsótax aia.
10 An ka anuaxa suntárukama Israelnën, menuax
'akanankë caballonën nirinkë akama 'imainun anuaxa
Jerusalénnu 'ikë suntárukama 'akanankë caballokama 'anan anúan 'akanankë aín kantikama aribi këñuti 'ikën.
An ka Israel kama 'imainun kamabi menu 'ikë unikamax upiti tsónun 'imiti 'ikën,
an ka parúmpapa Mediterráneo kakë anuaxi parúmpapa itsi parúmpapa itsi anu 'ikë unikama upiti bukunun 'imiti 'ikën, 'imianan ka Éufrates baka anuxunbi
uinu kara me sënënakëakëxa anu sënë́nbi unikama 'akinti 'ikën.
Diosan Israel kama amiribishi timëaxa bukunun 'imiti ñuikë bana
11 Ësai ka Dios kia:
Jerusalénnu bukukë unikama mitsun kamina kuati 'ain, 'ën kana Israel unikama bëtsi menu 'ikëbi ië́miti 'ain,
usa 'ain kana 'ën anua 'umpax biti kini 'umpaxñuma 'inun ëskikë 'ikëa anu uni sipuati 'akë usanu 'ikëbi mitsu chikiankën. Usakin kana mitsubëtan achúshi ñu mëníokin 'ásabiokin biti 'ain, usa 'ain kamina mitsun ñuina 'ë xaroxunuxun aín imi 'apamikin 'akën.
12 ¡Ñatanbiankin uan mitsun kamina 'ën 'akinti kainin!
¡Usa 'ain kamina amiribishi Jerusalénnu kuantëkënti 'ain!
'Ën kana mitsu kain, anuxun kana tëmëraimi bamai
këñúkan usamaira 'imi 'uakamë 'ëotëkënun 'imiti 'ain.
13 'Ën kana Judánu 'ikë Israelkama anun 'akanankë 'ën kantisa 'inun 'imian,
'imianan kana Efraín Israel, unikama aturibi 'ën piasa 'inun 'imian.
'Anan kana Siónnu 'ikë, Israel suntárukama an 'ën manë
xëtókësa 'ixun Grecianu 'ikë suntárukama 'anun 'amiti 'ain.
14 Usakin 'akëbëtan ka Diosan aín unikama aín kushi chaiira cha anun 'akinti 'ikën;
'akinkin ka kaná mëríkë axa pia nikëx kuankë usa 'itánun 'imiti 'ikën.
'Imi ka Dios aín manë banañu banobiani
suñúan mëu aín rëbumi kikiani kuanti 'ikën.
15 'Ënbi kana kamabi kushiñu 'ixun 'ën unikama bërúanti 'ain,
usokëxun ka atun axa ami nishkë unikama anun 'akanankë ñukama tsasipakin 'atima oti 'ikën,
usakin 'akin kanantankëxun ka chaiira fiesta 'ati 'ikën,
usakin 'ai ka xëakë anunbi paë́nkanti 'ikën;
atun xëakë uvas baka anunbi ka amia xëakëkama a buchukë 'iti 'ikën,
usakin ka xampakama anuxun ñuina xaroti anu
chikuti imin buchukë usa 'itánun 'ati 'ikën.
16 A nëtë 'ikëbëtan ka Diosan, aín unikama
ië́mikin an ñuina bërúankë unían aín ñuina
'akësaribi okin bërúanti 'ikën,
usakin 'akëx ka aín unikama atun ëmanuabi upíira maxákama aín maitinu purukë 'ichúkë usai ichuti 'ikën.
17 ¡Upíira upí ka anu aín unikama 'iti ax 'ikën!
Usa 'ain ka aín trigo bimi 'itsaira 'imainun a xëati
uvas baka 'aisamaira 'ikëbë aín bakë bëchikë 'imainun 'ini bëchikë kama upí 'inun kanikanti 'ikën.