2 Ësai ka Dios kia: 'Ën kana mitsu nuibatin. 'Aínbi kamina mitsun ësokin 'ë kain: ¿Uisaxun karanuna min kamina nukama nuibati kixun 'unánti 'ain? Kakëxun ka Diosan atu kaia: 'Ën kana mitsu xukë́n rabë́ 'ikëbi nuibakën, nuibakin kana Esaú 'imainun Jacob aira abëtan ñu 'ati kuëënxun nuibakën, 3 'akin kana Esaú ashi nuibati kuëëanma 'ain. Usa 'ain kana anua Esaú 'ikë me axa bashi me niñu 'ikëbi anu uni 'ikëma me 'inun 'imiakën, usakin 'imikëbë ka a menu ñuina raëkëma kamaishi bërí anu 'ikë kiax ka kia.

4 Esaúnën rëbúnki edomitakama ax ka kisatani ësai kiti 'ikën: “Nukamax kananuna numi nishkë unikaman këñúkë 'ian, 'aínbi kananuna amiribishi nun ëma birutëkënti 'ain kiax ka kiti 'ikën,” 'aínbi ka Dios kamabi kushiñu an atu kati 'ikën: “Mitsun kamina amiribishi birutëkënti 'ain, 'aínbi kana amiribishi 'ën rurupatëkënti 'ain.” Usakin 'akë ka unin a me anua uni ñu 'atima 'akëishi tsókë kakin a me anëti 'ikën, anëanan ka amia Dios sënënima nishkë me kakin anëti 'ikën. 5 Mitsun kamina mitsun bërúnbi isti 'ain, isi kamina kiti 'ain: “¡Nun Diosan ka ax chaiira 'ixun anua nun mekama sënënakëkë abi inuia!”

6 Ësokin ka Dios kamabi kushiñu an sacerdote unikama kaia: Aín bakë bëchikë bëbukaman ka aín papakaman kakëxun kuati 'ikën, 'imainun ka an ñu mëmikë uni aín banakama an ñu mëëxunkë atúnribi kuati 'ikën. Usaribiti kana 'ëx mitsun papa 'ain, ¿Uisa kupín kaina mitsun 'ën kakëxun kuaisamatankanin? 'Ëx kana an mitsu ñumëmikë uni asa 'ain, ¿uisa kupín kaina 'ën kakësokin mitsun 'aisamatankanin? Mitsun kamina 'ë istisama tankanin, usai 'ibi kamina mitsux ësai kikanin: ¿Añu 'axunkima karanuna mi timan? 7 Mitsun kamina anuxun 'ë ñuina xaroxunkë anu piti 'ën kuëënkëma a 'ë bëxunkanin, usakin 'aibi kamina ñukákanani kikanin: ¿Uisa ñu 'atima 'akin karanuna nun mi 'atimon? Mitsun kamina anuxun 'ë ñuina xaroti anuax 'ëmi rakuë́ti upiti 'ëmi sinánkinma 'ë 'atimoin. 8 Usa 'ain kamina mitsun ñuina bënxuñu 'ianan tsasikëkama 'imainun axa 'insínkëkama a 'ë anuxun xaroti anuxun xaroxunkë ax isa upí 'ikë kixun sinánkë anun kamina 'ë 'atimokan. ¡Usa 'ain kamina a ñuinakama mitsun 'apukamanu buánti 'ain! ¡buántankëxun kamina mitsun 'inánkëxun kara 'inainshikë ñukama a atun kuëënkin bitsia kixun isti 'ain! 9 Mitsun kamina Dios nukama nuibanun kixun abë banakin kati 'ain. 'Aínbi kamina usakin a 'inánti ñu a 'inánkin Diosan ka a ñukama upíokin bitsia kixun mitsun sinánkantima 'ain. Dios kamabi kushiñu ax ka ësai kia: 10 “¡Uisati kara mitsu achúshinën anuxun Dios rabiti xubu xëpútikama xëpútima 'ikën, anuxunma 'ë ñuina xaroxunti anu ñankabi tsi bimitëkënkania usa 'ain! 'Ën kana mitsu nuibakëmapan 'ain, 'ianan kana mitsun 'ë 'inaishikë ñukama abi bitëkëntima 'ain: 11 Kamabi me kuainakëanu tsókë unikaman ka 'ë rabia; 'imainun ka kamabi menuxun 'ë rabikin ro sanuira xaronan ñu upíirabukama aribi a isi 'ëx kuëëntisabi okin upíokin 'aia. 12 Usa 'aínbi kamina mitsun, anuxun 'ë ñuina xaroxunti ax isa 'ën mesasa 'ikë kixun sinánkin 'ë 'atima okanin, usa 'ain ka anuxun 'ë ñuina xaroxuntinu 'ikë pitikama a pikinma timakë 'iti 'ikën. 13 Mitsux kamina ësai kikanin: ¡Nukamax kananuna ësokin ñu 'akëkama ënën atsan! Usai kikin ka 'ë timakania. Usai 'ikinbi ka ñuina mëkamakë 'imainun vaca 'atimai nikë 'imainun 'insínkë akama 'ë 'inánti bëi 'ëx isana a ñuinakama 'inánkëx kuëënti 'ai kiax kikania. 14 ¡Usa 'ain ka 'atima okë 'iti 'ikë uni an 'ë paránkin aín 'arakakë ñuina upí 'axunkatsi kixun sinánxunbi aín ñuina 'atimakë xaroxunkë a uni ax 'iti 'ikën! 'Ëx kana 'apuira a 'ain, usa 'ain ka kamabi menu 'ikë unikama 'ëmi rakuë́tia.” Ësai ka Dios kamabi kushiñuira ax kiaxa.