2
“Usa 'ain ka Diosan sacerdotekama ënë banax ka bërí mitsunan 'ikë kixun kaia: 2 Mitsun kamina 'ëx kikësabiokin 'anan asérabi 'ë rabikanti 'ain. Usakin 'aiama kana 'ën mitsu 'atima okin sinánxunti 'ain. Usa 'ainbi mitsun 'ën kikësokin 'aiama okin, kana sacerdote 'ixunmi bikë ñukama aribi mitsu bikuanti 'ain, usa 'ain kana ësokin mitsu 'ati pëuan mitsun kamina 'ë rabitisama tankanin.” Usai ka Dios kamabi kushiñuira ax kiaxa.3 “Usa 'ain kana 'ën sacerdote 'ikëbi anua chikínkin aín bëmánanu Israel unikaman 'ë xaroxuntia bëkë ñuina puikë anubi mitsun bëmánanu 'ati 'ain. ¡Usakin pain ñuinakan puin 'atankëxun kana 'akëñunbi mitsu chikínti 'ain! 4 Usa 'ain kamina mitsun 'unánti 'ain, 'ën ënë bana ësaia Levítan rëbúnkikamax ka usai 'iti 'ikë kixun achúshi ñu 'a ax ka anubi 'ikë kixun 'unánti 'ikën.” Kiax ka Dios kamabi kushiñu ax kiaxa.
5 Ësairibi ka Dios kiakëxa: 'Ën achúshi ñu 'axunkë an ka Levítan rëbúnkikama upiti tsónun 'imiakëxa, 'imikëxun ka an rakuë́ti uisaibi 'ikima 'ë rabiakëxa.
A kana 'ëx kikësoibi 'ëmi rakuëkian 'ë rabinun 'inánkën, usakin 'akëxun ka Levítan 'ëmi rakuë́kin 'ën kakësabiokin 'ë rabiakëxa.
6 Usakin 'akëxun ka Levítan rëbúnkinën upí ñuishi uni 'unánmiakëxa, usakin 'unánmikëx ka unikama 'atimati banama 'ikën. Usai 'i upiti tsóti ka 'ën kakësabi oi 'i 'ëmishi katamëakëxa, usai atux 'ikania oí ka unikamaribi atun 'akë 'atima ñu ëni upiti tsókankëxa.
7 Ax ka sacerdotekaman uni 'ëa 'unánun 'unánmiti 'ikën, usa 'ain ka kamabi unikamax atunu an 'unánminun kuanti 'ikën, atux ka an 'ën bana ñuikë unikama 'ikën, atux ka Dios kamabi kushiñuira aín bana ñuikë unikama 'ikën.
8 'Aínbi kamina sacerdotekama mitsun upí ñu 'ati a manukin 'ë ënkan; usa 'ain ka mitsun 'atimakin 'unánmikëx 'itsaira uni 'atimati tsotia. Usakin kamina mitsun 'ën Levítan rëbúnki kamabëtan achúshi ñu 'a ax kikësabiokin 'akaniman. 9 Usa 'aínbi kamina mitsun 'ën kakësabiokin 'akëma 'ain, 'imainun kamina 'ën bana 'unámikin bëtsi uni 'akësaribi okin, kamabi atu sënë́nbi 'unánmi kikëma 'ain, usa 'ain kana 'ënribi kamabi unikaman mitsu timakin 'atima onun 'amiti 'ain. Kiax ka kamabi kushiñu Dios ax kiaxa.
Diosan Israel unikama bëtsi ñu rabikë xanu bixuma 'anun kanan aín xanubë ënanaxma 'inun ka bana
10 ¿Kamabi nukamax karanuna achúshi papañushima 'ain, ax kara Dios an nu kamabi unio 'ama 'ik? ¿Uisa kupín karanuna nukamax bëtsi bëtsibë paránankin, nun chaitiokë kamabëtan Diosan 'a achúshi ñu a 'aisama oin? 11 Judánu 'ikë unikaman ka Diosan kakësabiokin 'aíma, 'imainun ka 'aisama ñu 'atimaira Jerusalénnuxun 'anan Israelnuxunribi 'akania. Judánu 'ikëkaman ka Diosan bëruaiñama 'akësa okin anuxun a rabiti xubu upíira 'atima oxa, Judánu 'ikë unikaman ka bëtsi ñu rabikë xanukama aribi atun xanu 'iti biaxa. 12 ¡Uisati kara Nukën 'Ibun usakian nun menuxun an ñu 'atima 'akëma a uisa uni kara 'ixúan Nukën 'Ibu kamabi kushiñu 'inaínshiti ñu bëxunkëxunbi chikintima 'ikën!
13 'Aínbi kamina mitsun 'aisamaira okin 'akanin: usakin 'ai 'itsaira inkin kamina anuxun Dios ñuina xaroxunti a 'itsaira mitsun bëunan buchutisa oi 'in, i kamina chaiira masá nuitutin, usai kamina Diosan mitsun ñukama bëxunkëxunbi upíokin kuëënkin bisama tankëbë inkanin. 14 ¿Usa 'aínbi kamina mitsux ñukákananin kin uisa kupín kara Diosan nun 'inainshikë ñu bitsima kikanin? Diosan ka bëná 'ixunmi mitsun biti xanu usakin kana mi ñu 'axunti 'ai kixun ká 'ixunbi 'axunkëma a 'unánxa. ¡Abëmi 'ikë xanu 'ikë kamina mitsun 'ën kana mi uisabi otima 'ai kixun kakën! 15 ¿Ax kara Dios achúshi abia uni uniokin aín nami 'anan aín bëru ñunshinribi 'ama 'ik? ¿Asérabi kara Diosan mitsun rëbúnkikama ainan 'ia upí 'ikani kuëëntëkënti 'imiti 'ik? ¡Usa 'ain kamina mitsun nami bërúankin, bëná 'ixun bikin min xanu ká bana a manukin 'atima otima 'ain! 16 Israel unikaman Dios kamabi kushiñu ax ka ësai kia: “¡Mitsúnbi kamina min nami bërúankati 'ain, usai 'ikin kamina min xanu 'atima otima 'ain, 'ën kana kamabi uni an aín xanu ënkë a kuëënima, usai 'i ka uni anunbi 'atimati 'uchaia!”
Diosan anúan atu 'ati nëtë 'ikëbëtan Israel unikama mëníoti ñuikë bana
17 Nukën 'Ibu Dios ka mitsun bana kuati atsanxa; usa 'aínbi kamina mitsux ñukanani kin: “¿Uisai karanuna nun bana kuatia Dios numi atsanun nukamax kian?” Mitsux kamina ësai kikan, Diosan ka ñu 'atima 'akë unikama a upí isia, 'imainun ka atubë kuëënia. Mitsun kamina Dios an ka 'upiokin ñu 'aima kixun sinánkanin.