3
Nukën 'Ibu kamabi kushiñu ax ka ësai kia: “'Ën kana an 'ën bana ñuiti uni xutin, usa 'ixun ka unikama 'ën bana ñuixunkëx bai mëniokësa 'itánun sinanamikin ñuixunti 'ikën. Nukën 'Ibu Dios ami mitsun kainkë ax ka ënuax basimashi anuxun a rabiti xubunu bëbati 'ikën. ¡A mitsun kainkë uni ax ka uisai kikë kara achúshi ñu 'akë kikë bana ax 'ikë kixun, anbi mitsu ñuixuni aia!”2 'Aínbi kara, ¿uin anúan 'uti nëtë a sënë́nkëbë ax ukëbëtan tënëti 'ik? ¿Usa 'ain kara uix ñu 'atima 'ai 'uchakëma 'aish a bëtánain anubi niti 'ik? Ax ka tsi ërë́tia iskësa 'aish nukama upí 'inun mëníonux 'uti 'ikën; 'ianan ka jabonan chukakëxun chupa chua tërëkakësa usaribi okin nun 'ucha tërë́kati 'ikën. 3 Dios an ka kamabi sacerdote Levítan rëbúnkikamaribi upí 'inun mëníoti 'ikën, manë uxua 'imainun kuri tsi ërë́kënu 'arukëx xuiti upíira 'ikë usaribi 'itanun 'ati 'ikën. Usakin 'akëxun ka atun Dios uisakin ñu 'inánkin 'ati kara usakinbi 'axunti 'ikën. 4 Usakia a 'inaínshiti ñukama Judá 'imainun Jerusalénnu 'ikë unikaman 'inánkëx kuëënti 'ikën, bëráma ñu 'inainshikëx bëtsi nëtëkaman 'iásabi kuëënti 'ikën.
5 Ësai ka Dios kamabi kushiñuira ax kia: 'Ëx kana uisa ñukama kaina mitsun 'a kixun isi uti 'ain. Isanan kana anuxuinshi an ñunshinan 'amikëxun ñu 'ati sinánkë, an aín xanumabi bëtsi unin xanu aín nami 'akë, axa këmëi usai ka ñu 'iti 'ikë kiax kikë 'imainun tëmixunbi an ñu mëëmikë unikama kupíokëma 'imainun, raëmëkë xanukamakëñun 'ibuñumakë tuákama 'ianan an bëtsi menu tsókë unikama 'atima okë 'imainun, an 'ëmi rakuënkin 'ëx kikësabiokin 'akëma akamaribi kana 'atima oti 'ain.
Usakin Dios kamaira 'inankimabi ñu 'inánti ñuikë bana
6 “'Ëx kana Dios 'ain. Usa 'aish kana uisaibi i bëtsiorakatima 'ëx 'iásabi 'ain. Usa 'ixun kana 'ën ká banakama manukima Jacobnën rëbúnki Israel unikama 'ikë mitsu masókëma 'ain. 7 Mitsux kamina 'ën kakësokin 'ën bana 'aíma ami manúkan, mitsun chaitiokëkamaxa 'ën kakësoi 'ima 'ën banami manúkan usaribiti 'ëmi manukan. Usa 'ain kana 'ëx Dios kamabi kushi 'ixun mitsu kain: ¡Mitsux kamina 'ëmi sinanatëkënti 'ain, usai 'ia kana 'ën mitsu 'akinti 'ain! 'aínbi kamina mitsux ësai kikanin: ¿uisa kupí karanuna an kakësokin 'ati ëanx mimi sinántëkënti 'ain? 8 Usa 'ain kana 'ëx ësai kin: ¿Achúshi unin kara Dios 'ikë 'ë paránkin mëkamaisa tanti 'ik? ¡Usa 'ain kamina mitsun 'ë paránkin mëkaman! Usakin 'ë 'aínbi kamina ñukákanani kikanin: ¿A ñu 'akin karanuna mi mëkaman? ¡Mitsun kamina 'ë kamaira 'inankimabi 'inánti a 'imainun, a 'inánti nankë manë kuríki a uiti 'itsa 'inánti kara atibi 'inankima 'ë mëkaman! 9 Kamabi menu 'ikë 'ën unikama mitsun kamina 'ë 'inánti ñukama mëkamatin. Usa 'ain kana 'ëx Dios 'ixun mitsu 'atimakin sinánxunti 'ain.
'Ëx Dios kamabi kushiñu 'ixun kana ësokin mitsu kain:
10 Mitsun kamina kamaxunbi anuxun 'ë rabiti xubunu nankë ñu upíira a kamaira 'inankimabi 'ë 'inánti nankë a 'ë nanxunti 'ain, usakin 'akëbë ka sacerdote 'imainun levitakaman piti 'itsaira 'iti 'ikën. Usakin a ñu 'akin kamina 'ë tanti 'ain, tankëxun kana 'ëx kikësokin 'akin naíkamë 'ëo xëkuëkama xëókikëbë 'ikësa 'inua mitsunu a piti ñu 'aisamaira 'inun 'imiti 'ain.
11 'Imianan kana atun ñu 'apákëkama 'imainun uvas 'apákëkama aribi an ñu këñukëkama an masókin pikin këñunun 'amitima 'ain.
12 Kamabi menu 'ikë unikaman ka a unikama ka upí tsotia kixun mitsu kati 'ikën, mitsux kamina achúshi me unin kuëën irakë a bitankëx anu 'iti 'ain. 'Ëx Dios kamabi kushiñu 'aish kana ësai kian.”
Diosan Israel unikama nuiba ñuikë bana
13 Ësai ka Dios kia: Mitsux kamina 'atima banainra 'ëmi banai kikan. Usai kibi kamina ësai ñukákanani kikanin: ¿Uisai karanuna mimi banai nukamax kian? 14 Ësai kamina mitsux kian: Diosan ñu mëëti 'akë ax ka ñankáishibi 'akë 'ikën. ¿Añu karanuna aín bana kikësokin 'anan Dios kamabi kushiñu an isnun kixun uni ñukë 'ain 'akësa okin chupa pañuax nikin a 'inánti biti 'ain? 15 Nukaman kananuna axa rabiakakë unikamaxa kuëënia isanan, an ñu 'atima 'akë unikama axa ñuñu 'ia isan, usai 'ikin ka atun uisa kara oia iskatsi kixun Dios tania, usakin tankëxubi ka an uisabi okin 'atima oima.
16 Usa 'ain ka an Dios rabikë unikama atúxbi ësai kánani kiakëxa, kia ka atúxa kikë bana a bëmë́kin kuakëxa. 'Ianan ka Diosan ismainunbi achúshi kirikanu an rabikë unikaman anë kuënëokëxa, a ka an Dios rabikë unikaman sinánti 'ikën.
17 Kamabi kushiñuira Dios ax ka ësai kia: 'Ën kana anua a unikama 'ënan 'itëkënti achúshi nëtë mënion. Usakin 'akin kana achúshi unían an ñu mëëkinkë aín bëchikë nuibakë usaribi okin atu 'ën nuibati 'ain. 18 Usa 'ain kamina mitsun amiribishi uisa ñux kara upí 'ikë, uisa ñux kara upíma 'ikë a 'unankanti 'ain, 'imainun kana uin kara Dios 'ikë asérabi 'ë rabia, uin kara 'ë rabima akamaribi 'unánkanti 'ain.