Anuan Diosan uisa kara okatsia usakin aín unikama 'ati nëtë ñuikë bana
4
Dios kamabi kushiñuira ax ka ësai kia:“Kamina kuakanti 'ain: ënuax basimashi ka kininuaxa tsi ërë́rukë usa nëtë 'iti 'ikën, an ka axa rabiakakë unikama 'imainun an ñu 'atima 'akë akama basi chushikë nëmëkë usai 'itánun 'ati 'ikën. Usa 'ain axa uti nëtë ax ukin ka kamabi ñu këñuti 'ikën, usakin 'akëx atunan añu ñubi 'aíma 'iti 'ikën.
2 'Aínbi ka an 'ëx kikësabiokin 'akë unikama mitsunan, 'ën 'akë ñu upíkama ax. Barin urukin pë́kabëtsinkësa usaribi 'iti 'ikën, an ka mitsu ië́miti 'ikën. Usakin 'akëx kamina kuëëni vaca bakëkama anuxun pimikë xubunuax chikiti chirinkë usairibi 'ikanti 'ain.
3 A nëtë usakin 'ati 'ën mëníokë nëtë anun kamina mitsun an ñu 'atima 'akë unikama chimapu amákësa okin chakati 'ain.
4 'Ën uni Moisés aín bashi Horeb kakë anuxun usai 'iti 'ën bana 'inan a kamina sinánkanti 'ain. ¡Ax ka kamabi Israel unikaman ax kikësabiokin 'ati 'iakëxa!
5 Mitsun kamina 'unánti 'ain: 'Ën kana an 'ën bana ñuikë Elías 'ëx anun uti nëtë 'ikëmapan 'ain xuti 'ain, a nëtëx ka achúshi nëtë chaiira 'aish ami rakuë́ti 'iti 'ikën.” 6 'Imainun ka aín papakama 'imainun aín bëchikëkamaribi upiti mëníonanti 'ikën. Usai 'ikëbëtama kana ukin a unikama atun me 'atima okin këñuti 'ain. Usai ka Dios kiakëxa.