1
00:00:05,000 --> 00:00:37,840
Ajnaꞌɨmɨ tɨꞌɨj ari ajna pɨtiꞌirɨjcaa ɨ seij jetze i iteeri, tɨꞌɨj ari huachúmuaꞌancaa, au mu eꞌereꞌetyaꞌacaa aɨme ɨ maj Jesús jamuan áꞌujhuaꞌanyaꞌa. Majta meyan raꞌityaana u chiꞌita aꞌu maj anuꞌujtyaꞌacaa maɨjna cɨmeꞌe mej huaꞌatzɨɨnyaꞌacaa aɨme ɨ mej maun tiꞌijtacaꞌa u teyujtaꞌa. Aj puꞌi Jesús ayan eꞌireꞌenye huaꞌa jemi. Au pu huaꞌa tzajtaꞌa aꞌuteechaxɨ. Aj puꞌi ayan tihuaꞌutaꞌixaa tɨcɨn: ―Cheꞌe hui amuaatyápuaꞌariteꞌen ɨ aꞌamua tzajtaꞌa.

2
00:00:37,840 --> 00:00:56,100
Tɨꞌɨj ayan tihuaꞌutaꞌixaa, aj puꞌi ayan huaꞌutaseijrate ɨ rumuajcaꞌa, ajta ɨ ruꞌitzaꞌapua aꞌu mej tiraapueij aɨme ɨ maj ráꞌutatai ɨ curuu jetze. Majta maɨn ɨ maj jamuan áꞌujhuaꞌanyaꞌa, huapɨꞌɨ mu huataujtyamuaꞌave matɨꞌɨj raaseij ɨ tavastaraꞌa.

3
00:00:56,100 --> 00:01:11,160
Aj puꞌi ayan tihuaꞌutaꞌixaa tɨcɨn: ―Cheꞌe hui amuaatyápuaꞌariteꞌen ɨ aꞌamua tzajtaꞌa. Aꞌini niyaꞌupua pu yan nyajaꞌutaityacaꞌa inyeetzi, ayaa nu cheꞌeta nyanaꞌa tyajamuaatáiti inyaa.

4
00:01:11,160 --> 00:01:26,980
Cɨmeꞌen puꞌu ayan tyuꞌutaxajtacaꞌa, aj puꞌi ayan huaꞌutajɨꞌɨtze. Ayaa pu tihuaꞌutaꞌixaa tɨcɨn: ―Sataꞌaj hui raꞌancuraꞌan saɨjna ɨ xaijnyuꞌucaraꞌaraꞌan ɨ Dioj.

5
00:01:26,980 --> 00:01:53,500
Tɨ puaꞌa hui aɨn xaijnyuꞌucaraꞌaraꞌan ayan caꞌanijraꞌa amuaataꞌan sej si seyan tiraatauuniꞌi aꞌatɨ tɨj naꞌa ɨ tɨ cɨn autyajturaa ɨ Dioj jemi, Dioj pu xaa ayan tiraatauuniꞌira, naꞌari cai, tɨ puaꞌa aɨn xaijnyuꞌucaraꞌaraꞌan cai caꞌanijraꞌa Amuaataꞌan sej si cai seyan tiraatauuniꞌi, capu xaa Dioj ayan tiraatauuniꞌira. ―Ayaa pu Jesús tihuaꞌutaꞌixaa.

6
00:01:53,500 --> 00:02:10,060
Ajta aɨn Tomás ɨ mej meyan ratamuaꞌamua tɨcɨn ɨ tɨ huaꞌapuarí, aɨ pu huaꞌa jetze ajtyamaꞌacantacaꞌa ɨ mej tamuaamuataꞌa japuan huaꞌapua araꞌasicaa. Aɨ pu ajta cai aun huaꞌa jemi aꞌutyavaacaꞌa tɨꞌɨj Jesús ayan huaꞌa jemi huataseijre.

7
00:02:10,060 --> 00:02:34,920
Matɨꞌɨj meyan tiraataꞌixaa maɨjna ɨ Tomás maj nuꞌu meyan raaseij ɨ tavastaraꞌa, aj puꞌi ayan tyuꞌutanyúu tɨcɨn: ―Canu yeehui aꞌanaj tyaꞌantzaahuateꞌesin tɨ puaꞌa nyacai raaseij ɨ muajcaꞌaraꞌaraꞌan jetze aꞌu maj yaꞌanajtze, tɨ puaꞌa nyajta cai anáxɨteta aꞌu tɨ claavu aꞌanáꞌupuꞌujmaꞌacaa, tɨ puaꞌa nyajta cai ajtyejmeini ɨ itzaꞌapuaraꞌaraꞌan jetze.

8
00:02:34,920 --> 00:03:01,620
Tɨꞌɨj ari tyaumaꞌaca aꞌachu cumu sei iteeri, majtahuaꞌa mu maun eꞌereꞌetyaꞌacaa u chiꞌita. Ajta aɨn Tomás, au pu huaꞌa jamuan aꞌutyavaacaꞌa. Ajta eꞌityanamiꞌihuacaꞌa ɨ pueerta. Aj puꞌi Jesús aun eꞌireꞌenye. Ajta aꞌutyéechaxɨ huaꞌa tzajtaꞌa. Ayaa pu tihuaꞌutaꞌixaa tɨcɨn: ―Cheꞌe yeehui amuaatyápuaꞌariteꞌen ɨ aꞌamua tzajtaꞌa.

9
00:03:01,620 --> 00:03:25,660
Aj puꞌi ayan tiraataꞌixaa aɨjna ɨ Tomás tɨcɨn: ―Casiꞌi, huaseij i nyamuajcaꞌa. Pataꞌaj peyan anáxɨteta. Pataꞌaj pajta meveꞌemeeini muaꞌamuajcaꞌa cɨmeꞌe pej pi ajtyejmeini iiyaj nyeitzaꞌapua jetze. Capej cheꞌe peyan saɨque tiꞌimuajca silu pataꞌaj tyaꞌatzaahuatyaꞌa.

10
00:03:25,660 --> 00:03:33,420
Aj puꞌi Tomás ayan tyuꞌutanyúu tɨcɨn: ―Muaa paj paɨn pueen ɨ nyavastaraꞌa, pajta ɨ nyeDioj.

11
00:03:33,420 --> 00:03:52,220
Aj puꞌi Jesús ayan tiraataꞌixaa tɨcɨn: ―Muaa papuꞌu peyan tyaꞌatzaahuateꞌe paɨjna cɨmeꞌe pej yeehui peyan nyeseij. Micheꞌe huaujtyamuaꞌaveꞌen ɨ maj cai naaseij, ɨ maj majta maucheꞌe meyan tyaꞌatzaahuateꞌe. ―Ayaa pu tiraataꞌixaa.

12
00:03:52,220 --> 00:04:02,800
Eihua pu maa ayan huarɨj ɨ Jesús tɨ ayan huapɨꞌɨ ruxeꞌeveꞌe, mejseiiraca aɨme ɨ maj jamuan áꞌujhuaꞌanyaꞌa, ɨ tɨ cai aꞌayuꞌusiꞌi eijna jetze i yuꞌuxari.

13
00:04:02,800 --> 00:04:28,180
Ma ajta eijna jetze i yuꞌuxari, ayaa pu een cɨn teꞌeyuꞌusiꞌi sej si seyan ráꞌantzaahuateꞌen tɨ Jesús aɨn pueen ɨ Cɨriistuꞌu tɨ Dioj raꞌantihuau, tɨ ajta aɨn pueen ɨ yaujraꞌan ɨ Dioj. Ayaa pu ajta een cɨn pɨ teꞌeyuꞌusiꞌi sej si seyan ruurican cɨn huatyaturan para rusen cɨmeꞌe saɨjna cɨmeꞌe sej seyan raꞌastijreꞌe.