1
00:00:05,000 --> 00:00:16,740
Merikɨtsɨ 'arike tawarita Ketsutsi matsiɨkɨtɨ kanayuyeitɨani teyɨ'ɨkitɨwamete wahɨxie Tiweriya harakunayaritsie. 'Ipaɨ matsiɨkɨtɨ katinayuyeitɨani:

2
00:00:16,740 --> 00:00:33,980
'Axeikɨa mekaniu'uwakaitɨni Tsimuni Pekuru, Tumaxi Kwate mɨtitewakai, Natanaheri Kanaha kiekame Karereya kwieyaritsie mieme, Tsewereu niwemama, meta hipatɨ teyɨ'ɨkitɨwametemama yuhutatɨ.

3
00:00:33,980 --> 00:00:52,660
Tsimuni Pekuru mɨpaɨ katiniwarutahɨawe: —Ne nepɨketsɨweiyamie. Hipatɨta mɨpaɨ mekatenitahɨawe: —Tameta 'ahamatɨa tepuhu teyunaitɨ. Mana mekanekɨne, kanuwatsie mekanikayaxe, mɨkɨ tɨkaritsie tixaɨtɨ mepɨkate'u'axixɨ.

4
00:00:52,660 --> 00:01:03,260
Merikɨtsɨ 'etsiwa 'uhekɨakaku mana kaniutakeni Ketsutsi harakuna tetsita, peru teyɨ'ɨkitɨwamete mepɨka'imatekai Ketsutsi mepɨka'eriekai.

5
00:01:03,260 --> 00:01:13,980
Hikɨ Ketsutsi mɨpaɨ katiniwarutahɨawe: —Neuxei, temari, ¿'ikwai xekatehexeiya? Mɨpaɨ mekatenita'eiya: —Hawaikɨ.

6
00:01:13,980 --> 00:01:29,400
Hikɨ mɨpaɨ katiniwarutahɨawe: ―Wipi kanuwa tserieta xekeneukawiwi, mana xekaniwakaxeiyakuni. Hikɨ mana mekaneikawiwieni, mepɨyutatexi me'ihanatɨ memɨyuwaɨkawakaikɨ tsapari.

7
00:01:29,400 --> 00:01:48,080
Hikɨ tiyɨ'ɨkitɨwame Ketsutsi minaki'eriekai mɨpaɨ Pekuru katiniutahɨawe: —Ti'aitame pɨyɨane. Hikɨ Tsimuni Pekuru 'u'enaka kename Ti'aitame hɨkɨtɨkai, yu'ixuriki herie mieme 'ewakuwieka muyutikemaripiekaikɨ, hapa kaneukatsuna.

8
00:01:48,080 --> 00:02:01,360
Hipatɨ teyɨ'ɨkitɨwamete kanuwatsie meyetetɨ mekaniu'axɨani wipi me'uhaximetɨ tsapari mehɨneme. Hatetsita pɨkahetewakai, xeitsienituyari meturuyari xeikɨa petewakai.

9
00:02:01,360 --> 00:02:08,500
Kwiepa me'u'axɨaka tɨɨ mekaniuxeiya tatɨkaime, tsaapa tɨɨpa 'akaikame mete'uxei meta paa.

10
00:02:08,500 --> 00:02:14,660
Ketsutsi mɨpaɨ katiniwarutahɨawe: —Tsapari xike xemɨwarutiwi xekeniwara'ɨi.

11
00:02:14,660 --> 00:02:34,440
Tsimuni Pekuru mana kaneutimake, wipi kaniuhana kwiepa. Tsapari 'amepapatɨ mekanihɨnekaitɨni, xeitsienituyari heimana huta tewiyari heimana tamamata heimana yuhaikatɨ mekaniyupaɨmekaitɨni. Tsepanetɨ memɨyuwaɨkawakai, pɨka'utatsanixɨ wipi.

12
00:02:34,440 --> 00:02:50,980
Ketsutsi mɨpaɨ katiniwarutahɨawe: —Xekenakɨni xeketeneukwakari. Teyɨ'ɨkitɨwamete nixewitɨ pɨkayuwaɨriyakai «¿'ekɨ kepaikɨ pepɨyɨane?» mɨtitahɨawe, memɨtemaikaikɨ Ti'aitame mɨhɨkɨtɨkai.

13
00:02:50,980 --> 00:02:59,180
Hikɨ Ketsutsi mana kaninuani, paa kananuku'ɨni kaniwarumini, yaxeikɨata tsaapa kaniwarumini.

14
00:02:59,180 --> 00:03:06,240
'Ana hairieka matsiɨkɨtɨ kanayuyeitɨani Ketsutsi teyɨ'ɨkitɨwamete wahɨxie mɨkite watsata 'anukukeka.

15
00:03:06,240 --> 00:03:09,180
Nemuxatsi tɨɨrixi ketiniwarumikwa

16
00:03:09,180 --> 00:03:37,460
Merikɨtsɨ mete'ukwaku Ketsutsi mɨpaɨ Tsimuni Pekuru katiniutahɨawe: —Tsimuni 'aku, Wani nu'aya, ¿waɨkawa penetinaki'erie, mɨkɨ 'etsiwa xeikɨa menetsinaki'eriekaku? Pekuru mɨpaɨ katinita'eiya: —Huu, Ti'aitame. 'Ekɨ pepɨtimate nemɨmatsinaki'erie. Hikɨ Ketsutsi mɨpaɨ katinitahɨawe: —Merikɨte, nemuxatsima tɨɨrixi ketiniwarumikwa.

17
00:03:37,460 --> 00:03:56,920
Hikɨ hutarieka mɨpaɨ katinitahɨawe: —Tsimuni 'aku, Wani nu'aya, ¿penetinaki'erie? Mɨkɨ mɨpaɨ katinita'eiya: —Huu, Ti'aitame. 'Ekɨ pepɨtimate nepɨmatsinaki'erie. Ketsutsi mɨpaɨ katinitahɨawe: —Nemuxatsima keniwa'ɨwiyani.

18
00:03:56,920 --> 00:04:25,340
Hairiekari Ketsutsi mɨpaɨ katinitahɨawe: —Tsimuni 'aku, Wani nu'aya, ¿penetinaki'erie? Pekuru kaniyuhiweriekaitɨni hairieka «¿Penetinaki'erie?» mɨtitahɨawixɨkɨ. 'Ayumieme mɨpaɨ katinitahɨawe: —Ti'aitame, 'ekɨ naime pekatinimaika, pepɨtimate nemɨmatsinaki'eriekɨ. Ketsutsi mɨpaɨ katinitahɨawe: —Nemuxatsima ketiniwarumikwa.

19
00:04:25,340 --> 00:04:47,880
Yurikɨ mɨpaɨ nekanaineni, kepauka pemɨtemaikɨtɨkaitsie 'akɨmana pekane'ahɨayakaitɨni petikuyeikakaita hakewa pemeuyeimɨkɨkai. Kepauka 'ukiratsi pemayanitsie, xewitɨ kamenanahɨamɨkɨ meranuhanata hakewa pemɨkaheuyeimɨkɨtsie, 'amamá pekanitatseraxɨamɨkɨ.

20
00:04:47,880 --> 00:05:01,200
Mɨpaɨ kaniutayɨni tihekɨatatɨ Pekuru kemɨtimɨnikekai witsi'aneme Kakaɨyari 'ayeitɨanike. Mɨpaɨ 'utayɨka mɨpaɨ katinitahɨawe: —Kenenanuweiya ne'utɨma.

21
00:05:01,200 --> 00:05:16,020
Pekuru ta'aurie 'aweka tiyɨ'ɨkitɨwame Ketsutsi minaki'eriekai kaniuxeiya waruweiyakame, mɨkɨ memɨte'ukwaitsie 'auriena mukatei mɨpaɨ mɨtitahɨawixɨ: «Ti'aitame, ¿kepaikɨ pɨmatsiyetuani?»

22
00:05:16,020 --> 00:05:24,080
Pekuru mɨkɨ 'uxeiyaka, mɨpaɨ Ketsutsi katiniutahɨawe: —Ti'aitame, ¿'ikɨta ketiyurieni?

23
00:05:24,080 --> 00:05:35,960
Ketsutsi mɨpaɨ katinitahɨawe: —Xɨka netsi'unakire 'ikɨ mɨyuhayewakɨ nemunuanitsieke, ¿ketsɨ pe'anenikeyu 'ekɨ? 'Ekɨtsɨ ne'utɨma keneumieni.

24
00:05:35,960 --> 00:05:56,520
'Ayumieme ta'iwama watsata 'ikɨ niuki kanixatsiwakaitɨni, kename 'iya tiyɨ'ɨkitɨwame kamɨnikekai. Matsi Ketsutsi mɨpaɨ pɨkatitahɨawixɨ mɨkamɨnikekaikɨ, pɨta pɨtitahɨawixɨ: «Xɨka netsi'unakire mɨyuhayewakɨ nemunuanitsieke, ¿ketsɨ pe'anenikeyu 'ekɨ?»

25
00:05:56,520 --> 00:06:07,120
Mɨkɨ tiyɨ'ɨkitɨwame kanihɨkɨtɨni kemɨ'ane mɨtihekɨata 'ikɨ hepaɨtsita, kemɨ'ane 'ikɨ mɨtiuti'utɨa. Tepɨtemate tita mɨtihekɨata yuri maine.

26
00:06:07,120 --> 00:06:23,140
Waɨkawa 'akuxi yɨkɨ 'anenetɨ kanixuaweni kemɨtiuyuri Ketsutsi, xɨka xexuitɨ tiuti'utɨarienike, mɨpaɨ nepɨtiku'eriwa, 'ena kwiepa pɨkatinakenike xapate mɨti'utɨarieni. Mɨpaɨ xeikɨa kani'aneni.