Genesis
No Nakaparswa no Lōbong
1
Do kasiknan na, pinarswa ni Āpo Dyos tābo no kahanyihanyitan kan tanaya.* 2 Ki do dāwri, no tanaya, ki abaw pōtar na, as kan abo paw mimyan na. Oltimo so kasari do dāwri, as kan natonep pa tābo do magpapalot a kelsang no ranom. As no Ispirito no Dyos,a ki nāw na sinalokōban hapotaw no ranom. 3 Ki do dāwri, inchirin ni Āpo Dyos a kāna, “Myan pakono sēdang.” Ki nyeng a myan sēdang a akmas inchirin naw. 4 Do nakaboyaw no Dyos so sēdang, naboya na maganay. Sinpangan na, pinaysyay naw sēdangaw kan saryaw. 5 Iyaw sēdangaya, ki pinangaranan nas “Maraw,” as iyaw saryaya, ki pinangaranan nas “Mahep.” Homnabas mahep kan myan danaw mabekas. Iyaw nyaw manōma araw.6 Katayokan nawri, inchirin ni Āpo Dyos a kāna, “Myan pakono hanyitb a mapaytawas ranom tan myan dadwa yanan ranom.” 7 Pinarin ni Āpo Dyos hanyit a mapaytawa so ranom tan myan do tohos kan myan ranom do ibaba. Ki oyod a naparin iyaw inchirin naw. 8 No mapaytawa so ranom, ki pinangaranan nas “kademdeman.” Sinpangan na, homnabas mahep kan myan danaw mabekas. Iyaw nyaw chadadwa narana karaw.
9 Inchirin ni Āpo Dyos a kāna, “Mayrarapa sa pakono ranomaya a myan do ohbo no kademdemanaya do asa yanan tan myan mabkoh a yanan.” Ki oyod a naparin.* 10 Pinangaranan ni Āpo Dyos so “tana” iyaw mabkohaw a yanan, as iyaw nayrarapaya a ranom, ki pinangaranan nas “tāw.” As do nakaboyaw sya no Dyos, naboya na maganay. 11 Sinpangan na, inchirin ni Āpo Dyos a kāna, “Patobohen pakono no tanaw tabo a kīta no tomobo a myan so botoh kan kayokayo a omsi a myan so botoh da.” Ki oyod a naparin. 12 Dawa, pinahtot no tanaw tabo a kīta no tomobo a myan so botoh kan kayokayo a omsi a myan so botoh na. Do nakaboyaw sya no Dyos, naboya na maganay.
13 Homnabas mahep kan myan danaw mabekas. Iyaw nyaw chatatdo narana karaw.
14 Sinpangan na, inchirin ni Āpo Dyos a kāna, “Maparin pakono saw soho do hanyit tan myan mapaysyay so māraw kan mahep tan myan pakailasīnan so siknanan araw, bohan,c kan awan. 15 Magranyag sa do hanyit tan masēdangan lōbongaya.” Ki oyod a naparin. 16 Dawa, pinarin ni Āpo Dyos dadwa rarakoh a soho. Iyaw mayīyitaw, ki araw a magranyag an māraw, kan iyaw makapkapsotaw, ki bohan a magranyag an mahep. Pinarin na paw bitohen saw. 17 On, pinangay sa ni Āpo Dyos do hanyit a mangsēdang so lōbongaya 18 tan magranyag sa do māraw kan mahep a mapaysyay so sēdang kan sari. As do nakaboyaw sya ni Āpo Dyos, naboya na maganay.
19 Homnabas mahep kan myan danaw mabekas. Iyaw nyaw chapat narana karaw.
20 Minirwa inchirin ni Āpo Dyos a kāna, “Myan pakono do ranom āro a matatarek a kīta no mabyay, as kan myan pakono do tohos tabo a kīta no manomanok.” 21 Dawa, pinarswa ni Āpo Dyos siraw rarakohaw a nabyay do tāw kan tabo a parswa a mayhodyihodyi do ranom sigon do kīta da. Pinarswa na pa saw tabo a kīta no manomanok sigon do kīta da. As naboya no Dyos a maganay. 22 Binindisyonan na sa tabo, as nakaibahey na sya dyirad myanaw do ranom a maypāro sa tan apnohen daw tāw. Komwan inbahey na dyirad manomanok saw a maypāro sa do tanaya.
23 Homnabas mahep kan myan danaw mabekas. Iyaw nyaw chadadima narana karaw.
24 Inchirin ni Āpo Dyos a kāna, “Myan pakono do tanaw tabo a kīta no mabyay a maywam kan bolaw kan siraw komayakayab do tana sigon do kīta da. Kāda asa, ki sigon do kīta da.” Ki naparin nyaya. 25 On, pinarswa no Dyos bolaw saw a animal sigon do kīta da, kan siraw maywam saw a binyay sigon do kīta da. Pinarswa na paw komayakayab saw do tana sigon do kīta da. As do nakaboyaw sya no Dyos, ki naboya na maganay.
26 Katayoka na, binata ni Āpo Dyos a kāna, “Sichangori, parinen taw tawo, ki parinen ta akma dyaten. Torohan ta sa so toray da do tabo a among do tāw, manomanok do tohos, kan tabo animal a maywam kan bolaw do hapot no tanaya, as kan siraw tabo komayakayab do tana.” 27 Do dāwri, pinarswa ni Āpo Dyos tawo a akma dya.d Pinarswa na sa mahakay kan mabakes.* 28 Ki binindisyonan na sa, as binata na dyira a kāna, “Maypāro kamo tan omyan sanchiw kapotōtan nyo saw do tabo a yanan do tanaya. Mangitoray kamo siras among do tāw, manomanok do tohos, kan kāda mabyay a naparswa a makayam kan komayakayab do tanaya. 29 Itoroh ko dyinyo kāda kīta no tomobo a manoroh so botoh do hapot no intīrowaya tana, kan kāda kīta no kayokayo a omsi a myan so botoh a chabyay nyo. 30 Ki itoroh ko do tabo animal a maywam kan bolaw, kan do tabo a manomanok do tohos, as kan do tabo komayakayab do tana, do tabo a myan so anges no byay, iyaw tametamek saya kan bohobohong no tomobo saya a nawriw chabyay da.” Ki naparin nyaya. 31 Do nakaboyaw no Dyos so tabo pinariparin na saya, naboya na a taywara a maganay.
Homnabas mahep kan myan danaw mabekas. Iyaw nyaw chanem narana karaw.