13
No masīrib a anak, bigbigen naw kapangnanawoa ni āmang na,ki no maoyaw a anak, adngeyen nabaw kapaydabdab.
2 Yapo do omno a kapaychirin na, mangīmas tawo so magaganay,
ki no dya mapodno,b malakam do kinaranggas.
3 No mangyannad so dangoy na, aywanan naw byay na,
ki no makararahawa so bibi, rārayawen naw inawan na.
4 Aran malakam masadot, aba polos mahap na,
ki no pakakdekden magaget, maboslon kahap na sya.
5 No malinteg a tawo, ipsok naw bayataw,
ki no marahet, parinen naw makasnesnek.
6 Iyaw no kinalinteg, aywanan naw masingpet a tawo,
ki no karahet, pakayapwan pakasdayan no maygaygatos.
7 Myan maysinbābaknang, ki aba polos dyira na.
Siraw kadwan a maysinpōpobri, ki āro kinabaknang da.*
8 No mabaknang, mabayādan naw byay na,
ki no mapobri, abaw pagbāyad nas kawayawaya na.c
9 Maiyarig malinteg a tawo do maranyag a soho,
ki maiyarig marahet a tawo do mawsep a soho.
10 Iyaw kapangas, mangkiras so kapaydidiman,
ki no kinasīrib, myan dyirad mangrawataw so pamagbaga.
11 Iyaw kinabaknang a malisto, in-īnot a mabo,
ki no kapaypabaknang a taydedekey, maypaypāro.
12 Iyaw namnāma a maitantantan, mapaydyagānyit so aktokto,
ki no kalikāgom a natongpal, akmay kayo a manoroh so byay.*
13 No mangichichipa so pamagbaga, apīten naw karārayawan na,d
ki no mangbigbig so bilin, magon-gonaan anchi.
14 Iyaw kapangnanawo no masīrib, akmay akbod a manoroh so byay*
a mapadichan so tawo do asdok saw no kadiman.
15 No mangtokto a nainsirīban, makarawat so pakahwahokan,*
ki no kabibyay no dya mapodno,e lomongo do pakarārayawan.
16 Kāda mangtokto a nainsirīban, parinen na yapo do kapakatoneng na,
ki no abos arang a tawo, ipangas naw kabon sīrib na.
17 No marahet a tobotoboyen, mamyay so riribok,
ki no mapagtalkan a pachirawatan, mangyangay so kapaychapya.
18 No mangitoltoleng so kapangdisiplīna, masnekan kan pomobri,
ki no mangikaskāso so kapangkosto, maidāyaw anchi.
19 Iyaw kalikāgom a natongpal, manoroh so gānas no pangtokwan,*
ki siraw abos arang, ipsopsok da dichanan marahet.
20 No machirārayay dyirad masīrib, maypasīrib,
ki no machangay dyirad abos arang, maglak-am so pakaynyinan.
21 Manglakalakat didigra siras maygaygatos,
ki siraw malinteg, magon-gonaan sanchi so maganay.
22 No maganay a tawo, ipatāwid nanchiw kinabaknang na dyirad apoko na,
ki no kinabaknang no maygaygatos, maisagāna a para dyirad malinteg.
23 Iyaw kadanan dan mapobri, maparin a mapahtot so āro a kanen,
ki samsamen dan dya malinteg a tawo.
24 No tawo a dya magbāot so anak na, ipsok naw anak na,*
ki no madaw do anak na, pahabasen nabaw kadisiplīna na sya.
25 No malinteg a tawo, manawob iyaw chabsoy na,
ki no bodek dan marahet, maypiypisipis do kapteng da.