No Libro A Jonas
No Kapayyayo ni Jonas a Mangkaro di ĀPO
1
Do asa karaw, inpakatoneng ni ĀPO minsāhi na di Jonas* a pōtot ni Amittay a kāna, 2 “Mangay ka do Ninebeha a mabīleg a syodad. Ballaāgan mo saw tawotawo daw a īto danaw kasoli no Dyos dyira, ta chapatak dana sīgod no Dyos makabābabaya a karahet da.” 3 Imbes a magtongpal si Jonas, ki basbāli a nagrobwat a nangay do Ispanya,b ta chakey na dichanan si ĀPO. Ingodes naw minosok do idi a Joppe a nakaboyan na so biray a magrobwat a mangay do Ispanya. Do nakatayoka naw a nagbāyad so plīti na, somnakay do birayaw a nachirayay dyira a kominwan do Ispanya tan payyayowan na si ĀPO.4 Ki nanoboy si ĀPO so mayit a salawsaw do tāw, as kan napahtot so taywara so kayit a bagyo. Dawa, makey dana maysisyay birayaw. 5 Taywaraw nakamo dan tripolanti saw, as kan katakatayisa dyira, ki nangngēngengey a nagpakpakaāsi so sidong do bōkod na a dyos. Sinpangan na, intapwak daw kadwan saw a karga da tan maypatapaw birayaw. Ki si Jonas, ki myan do makatayrahemaw a ansagan birayaw a naynepdep.
6 Dawriw nakaboyan sya no kapitanaw no birayaw. Pinaydabdab na a kāna, “Āngo ta mapakdoh mo paw makaycheh? Kawanem ka! Maybangon ka daw, as kan maydasal ka pad dyos mwaw, ta arā na yaten a chāsi, as dyi ta madiman.”
7 Do dāwri, binatabata dan tripolanti saw do katakatayisa dyira a kon da, “Magbibinonōtan ta tan mapatakan ta an sino naynamotan no nyaya didigra?” Dawa, nagbinonōtan sa, ki nabōnot ngaran ni Jonas. 8 Dawa, inyahes da di Jonas a kon da, “Ngay, ibahey mo pa dyamen an sino nakayapwan nya a didigra. Āngo chabalay mo dya? Taga dino ka? Āngo nasyon a nakayapwan mo, as kan āngo trībo mo?”
9 Ki initbay ni Jonas a kāna, “Asa 'kwaw a Hebreo kan managdaydāyaw di ĀPO, iyaw Dyos no hanyit a iyaw namarswa so tāw kan iyaw tanaya.” 10 Inbahey na pa dyira a madama na payyayowan si ĀPO.
Do dāwri, siraw tripolanti saw, ki sominryam sa do nakamo da, kan binata da dya, “Ay pakawanem! Marahet abawriw nawri a pinarin mo?” 11 Ki ranan da a mangosisa sya, naypaypāngay paw no bagyowaw. Dawa, inyahes darana di Jonas, “Āngo paro parinen namen dyimo tan mangheteng bagyowaya a mangrārayaw dyaten?”
12 Ki initbay ni Jonas a kāna, “Na! Itapwak nyo na yaken ah, tan magtalnaw bagyowaya, ta chapatak ko a yaken naynamotan nyaya laklak-amen ta.”
13 Ki basbāli a ingodes dan tripolantyaw nangawod tan makapaypayraya sa. Ki alit na kinabaelan daba maynamot ta naypaypataywara paw kelsang. 14 Dawa, do dāwri, nangngēngengey sa nagpakpakaāsi di ĀPO a kon da, “ĀPO, dyi mo pakono yamen a nonolay a madiman an dimanen namen nya tawo a abos gatos. On, dyi mo pakono yamen a pagatosen, ta imom ĀPO makin plāno so tabo, ta iyaw nya bagyo, ki yapo do bōkod mo a pagayatan.” 15 Do dāwri, kinatkat das Jonas, as nakapagtos da sya do tāw, ki nānyeng a nandinak. 16 Do dāwri, oltimo nakāmo da no tripolanti saw di ĀPO. Sinpangan na, nangidāton sa di ĀPO, as insapata da a magsīrbi dana sa dya.
17 Ki nangmandar si ĀPO so rakoh a among* a nanghamon di Jonas. Tatdo a karaw kan tatdo a kahep a minyan si Jonas do bodekaw no nya among.