No Libro A Mikyas
1
Nyaw minsāhi a inpakatoneng ni ĀPO di Mikyas a taga idi a Moreseta a maynamot do kaokom no Samarya kan Jerosalem.b Naboya naw nyaya do chimpwaw a nakapagāri da Jotam, Ahas, kan Hesekyas do Joda.No Dongdong-aw Para do Samarya kan Jerosalem
2 Mangadngey kamo, inyo a tabo a tawotawo.
Adngeyen nyo nyaya, inyo a tabo a omyan do tanaya!
Si Āpo a DYOS, mangsaksi so maibōsor dyinyo.
Adngeyen nyo, ta maychirin a yapo do masantwan a timplo na.
3 Chiban nyo! Īto dana si ĀPO a yapo do masantwan a yanan na.
Gomchin anchi kan lasagan na sanchiw matotohos saya a tokotokon do tanaya.
4 Siraw katokotokonan saya, ki malonag sa
a akmas nadangdangaw a alid do apoy.
Maloyo sanchi do payahosongan sayac
akmay ranom a gomtos do aphas.
5 Tabo nyaya, maparin anchi maynamot ta nagribīldi saw kapotōtan Jakob.
On, maparin nya a maynamot ta naygatos saw kapotōtan Israel.d
Āngo iyaw gatos dan kapotōtan Jakob?
Iyabawriw karahet dan tawotawo no Samarya?
Dino sintro no pagdaydayāwan so didyosen do Joda?
Do Jerosalem abawri?
6 Bata ni ĀPO a kāna, “Dawa, payparinen konchiw Samarya a bonton
a yanan a paymohan so kaobāsan.
Paychabadebadedehen konchiw bato na saw do payahosonganaw
tan magparang saw pondasyon na.
7 Mapsapsa sanchiw didyosen na.
Tabo mapapateg saw a nakpeh na do timplo, ki masosohan sanchi so apoy.
Rārayawen ko sanchi a tabo bolto na saw.
Maynamot ta nakpeh saw nya a yapo do tangdan daw no maglaklāko saw so asi,e
tangdan dananchi a mirwa no matarek a maglaklāko so asi do matarek a nasyon.”
8 Binata ni Mikyas a kāna,
“Maynamot do dyaya, magāsog kan magdongdong-aw ako.
Mayam ako a abos tokap kan silalābos.
Maydawo ako a akmas bolawaw a chito,
kan maylilyak ako a akmay gokgok.
9 Mapya pabaw bigaraw no Samarya,
kan nayadis dana do Joda.
Nakarapit dana do rowanganaw no syodad dan tawotawo ko
a aran do Jerosalem a mismo.”
No Kasōngad Da no Kabōsor do Jerosalem
10 Ibahey nyo aba do kabōsor ta saya do syodad a Gatf iyaw nakaābak ta.
Maychahoho kamo abas aran asa katedted.
Inyo a tawotawo do idi a Beth-leapra,
maydipodiporis kamo do ahbek do ladingit nyo.
11 Inyo a tawotawo do idi a Sapir, maakaw kamonchi a mabahod,
kan mayam kamonchi a silalābos a masnek so kayayan.
Inyo a tawotawo do Saanan,
makahtot kamo paba do idi nyo.
Anchan madngey nyo kapagdongdong-aw da do idi a Bet-esel,
matonngan nyonchi a abaw kamāngan daw.
12 Siraw tawotawo do idi a Marot,g
manghahaw sa so kapakalong-aw da,
ta iyaw didigraya a yapo di ĀPO,
ki narapit narana a manda do rowangan no Jerosalem.
13 Inyo a tawotawo do idi a Lachis,
isagāna nyo kabalyo nyo do logan nyo a pachigobat.
Inyo nangisongsong so Jerosalem a naygatos,
ta tinahatahan nyo gatos daw no Israel.
14 Dawa, manoroh kamos sagsāgot a pamakāda do idi a Moreset-gat.h
Iyaw idi a Aksib,i ki inallīlaw na saw āri saya no Israel.
15 Inyo a tawotawo do idi a Maresah,j
manoboy si ĀPO so mangsākop so idi nyo.
Siraw pangpangōlo no Israel,
mangay sanchi a tomayo do aschip no Adollam.
16 Inyo a tawotawo do Joda, chischisan nyo oho nyo do kapagmamayo nyo
maynamot dyirad anak nyo saw a chadaw nyo.
Chischisan nyo oho nyo a akmas oho naw no kangkang
maynamot ta maakaw sanchiw anak nyo a sibabahod.