No Kadiman ni Santiago kan Kabahod ni Pedro
12
Do dawri a chimpo,
insiknan ni Āri Herodesa a linidyalidyat kadwan saw a nanganohed di Jesos.
2 As si Santiago a ākang ni Juan,
ki inpapotoh na.
3 Do nakaboyaw sya ni Herodes a nahwahok kadwan saw a Jodyo do dawri a pinarin na,
tiniliw na pas Pedro.
Naparin nyaya do Pistaw no Tināpay a Abos Yapo.b
4 Do nakaipatiliw naw sya a inpabahod,
inpabantay na dyirad apataw a gropo no soldādo,
kan tayipat kāda gropo.
Kāda gropo,
ki naytatādi sa a nagbantay.
Ta no plāno ni Herodes do dawri,
ki osisaen nanchis Pedro do kasalasalapan āro a tawo anchan tayokaw Pistan Nakahabas no Anghil.
5 Ki do kayanaw ni Pedro do bahodan,
naypaypapasnek nakaidasal da sya no nanganohedaw di Jesos.
No Kaihtot ni Pedro do Bahodan
6 Do ahepaw a sakbay a pahtoten ni Herodes si Pedro dyirad tawotawo saw,
myan si Pedro a nakaycheh do hobok daw no dadwa saw a soldādo.
Nakadinaan maybītaw a tanoro na,
kan nachipong do tanoro daw no maybītaw a soldādo.
Myan pa saw dadwa a gwardya do asdepanaw no bahodanaya.
7 Ki sinpangan na,
naychihat a myan anghil no Āpo a napaboya,
kan myan soho a nangsēdang so bahodanaw.
Ginon-gon anghilaw pakohaw ni Pedro kan yinokay na,
as nakaibahey na sya dya a kāna,
“Ngay,
kalistwan mo maybangon!”
Ki sigīda nalngat saw kadina naw do pongopongwan naw.
8 Tinongtong no anghilaw a inbahey dya,
“Ngay,
paysonongen mo laylay mwaya,
as pangayen mo tokap mwaya.”
Ki pinarin ni Pedro.
Sinpangan na,
binata no anghilaw,
“Payohay mo kagay mwaya,
as kawnot mo dyaken.”
9 Minonot si Pedro do anghilaw a minohtot do bahodanaw,
kan chapatak naba an oyod pariparinen naw no anghilaw.
Iniktokto na an tod a magparmata.
10 Do nakahabas daranaw so manmaw kan iyaw somaronwaw a yanan gwardya,
nakarapit dana sad yananaw no pasek a rowangan a komwan do syodad.
Tod a naywangan rowanganaw,
kan minohbot dana sa.
Do nakahabas daranaw so asaw a kalsada,
naychihat a kinarwan no anghilaw.
11 Sinpangan na,
naawātan ni Pedro naparin naw.
Nyaw binata na do inawan na a kāna,
“Aysa!
Arabaw kapagmangamanga ko,
ta oyod sawen a tinoboy ni Āpo anghil naw a nangisalākan dyaken di Herodes kan iyaw hahawen daw no Jodyo saw a parinen da dyaken.”
12 Do nakapakaāwat naw so napariparinaw dya,
nangay do bahay ni Maria a ānang ni Juan Markos a yanan dan āro saw a nanganohed a naychipeh a naydaydasal.
13 Do nakapakarapit naw daw,
nagtoktok do anebaw no rowangan.
Sinpangan na,
myan kasidong daw a mabakes a mayngaran so Roda a nangay a nanyideb an sino nawri a nagtoktok.
14 Ki do nakailasin naw so timekaw ni Pedro,
taywara nasoyot kan nayyayo a naybidi a nangibahey sya dyira a si Pedro naytēnekaw do rowanganaw.
Ki iniwangan nabaw rowanganaw.
15 Do dawri a inpadāmag no mabakesaw,
ki anohdan daba kan binata da dya a kon da,
“Manganyaw ka!”
Ki inpapapīlit na a oyod.
Dawa,
inbahey da,
“Pahad na ngataw nawri.”
16 Ki tinongtong ni Pedro nagtoktok.
Dawa,
minohbot sa nangay a miniwang sya.
Ki do nakaboya daw sya,
nasdaāwan sa.
17 Do dawri,
sininyasan san Pedro a magolimek,
kan inistorya na dyiraw nakapakakaro syan Āpo do bahodan.
Binata na dyira a kāna,
“Pachiibahey nyo paw nya di Santiagoc kan siraw kadwan saw a kakakteh ta a nanganohed.”
Katayoka na nangibahey syay,
komnaro a nangay do matarekaw a yanan.
18 Do kamabekasan naranaw,
dēkey abaw riribok dan soldādo saw a nagbantay di Pedro a maynamot do kabo naw.
19 Somnarono,
inpachichwas a maganay ni Herodes si Pedro.
Ki do dyi daw a nakachichwasan sya,
inpaosisa san Herodes nagbantay saw,
as nakaikeddeng na sira madiman.
Katayoka no nyaya,
minosok si Herodes a yapo do Jerosalem do Jodya a nandad Sesarea kan minyan pa daw so nahay.
No Kadiman ni Herodes
20 Do dawri,
taywaraw nakapakasoli ni Herodes dyirad tawotawowaw do Tiro kan Sidon.
Ki siraw tawotawo a yapo do dawri,
chakey da paysonongen nyaya problima,
ta iyaw kanen da,
ki yapo do pagāryan Herodes.
No pinarin da,
ki pinanma daw nachisisīt di Blasto,
iyaw mapagtalkanaw a mangay-aywan so palasyowaw.
Sinpangan na,
nāsa sa nangay di Herodes a nachikapya.
21 Ki do naikeddengaw a araw,
naylaylay si Herodes so laylayaw no āri a kagaganayan,
as nakapaydisna na do trono naw,
as nakapaychirin na dyirad tawotawowaw.
22 Ki do nakadngey daw no tawotawo saw,
inyagagay da a kon da,
“Namna,
tawo pabayaw maychiychirinaya,
ta asa danaya dyos!”
23 Do dawri,
nanyeng a pinaganyit no anghilaw ni Āpo Dyos si Herodes maynamot ta pinadayāwan naba si Āpo Dyos.
Dawa,
inohed inawan naw,
as nakadiman na.
24 Ki nakatongtong a nagwaras no chirinaw no Dyos,
kan naypayparo dana saw nanganohed.
25 As sa Bernabe kan Saulo,
ki tayoka daranaw tarabāko daw do Jerosalem.*
Dawa,
naybidi sa do Antiokya,
kan inyonot das Juan Markos.