1
00:00:05,000 --> 00:00:12,020
“Kubenti, ame si pangma kutuku anam ti tinyang. Itse-m ti si unde ti risaen.

2
00:00:12,020 --> 00:00:25,800
Kujwo kutuku ti a ku waen-wu awaen be, Itse-m u pyera wu ruru. Ama awu ku kyaenyang ajwo ti ku waen awaen ti yi na waen awaen kora fa.

3
00:00:25,800 --> 00:00:33,140
Ana-ni, a kyae nyang pu ba ani yi fengo na ira ti ame kwen na ni.

4
00:00:33,140 --> 00:00:53,100
Ni baefa te m, ame ama u baefa te ni. Kujwo kutuku ti a baefa-wu te rimenn kutuku be, awu u waen-wu awaen be. Ti mbwe-yi, asiti ani a baefa-ni te m be, ani u waen-ni awaen be.

5
00:00:53,100 --> 00:01:19,120
“Ame ti si rimenn kutuku wu, ani ama ti si akyikya-wu. Unde ti a baefa te m, ame ama u baefa te wu, awu u si kujwo kutuku ti ku waen awaen timambe. Ani u nde tu-ni iken iki be, se ti ame a te ni ta tetso.

6
00:01:19,120 --> 00:01:34,740
Asiti unde a kata te m, a u sa wu jwunn tika, awu u wombeb. Akyikya kutuku ti pangma ayine, a ku byir yi ru ka jwunn si uwae urwa, ayi ku ten mbumbub.

7
00:01:34,740 --> 00:01:46,620
Asiti ani a ren risu te m u ye su ira-m uwae utob-ni, ani u nde ye ti ni u jwam iken ti ani ku sha meme, ama a u nde yi na ni.

8
00:01:46,620 --> 00:02:00,180
Iken ti ku nda Itse-m kuko ti rurob si ti ani ku waen awaen timambe. Ayine ti ku tatso ama baa, ani na si pu ni ande ti ana-m ti kubenti.

9
00:02:00,180 --> 00:02:08,460
Ame site ure te ni pangma ti Itse ye ure te m. Ni tsikunn ti uwae ure ti ana-m yine.

10
00:02:08,460 --> 00:02:22,940
Asiti ani a ku nae risu riben te icwe-m, ani u tsikunn ti ku som usom uwae ure ti ana-m, pangma ti ame nae risu riben te icwe na Itse-m u tsikunn ti ku som usom uwae ure ti ana-wu ama.

11
00:02:22,940 --> 00:02:35,340
“Ame ri te pu m ani ira risu ure yine ikyaen ti utob ti tsen-m ā ta uwae utob-ni. Ama ikyaen ti utob ti tsen-ni ā tsi ti rimunn.

12
00:02:35,340 --> 00:02:43,380
Ame ku fa ni kusen baa, ni tsikunn ti ku ye ure tetso, pangma ti ame ye ure te ni.

13
00:02:43,380 --> 00:02:51,220
Ure ti siskeb patag ti unde u ye te arwan-wu si ti awu u cwu ricwu ikyaen-ba.

14
00:02:51,220 --> 00:02:57,900
Asiti ani a nde wande te ira ti ame ri te ni, ani si arwan-m.

15
00:02:57,900 --> 00:03:16,300
Ame ku kunn-m ani baa apyi cwucwo be, ikyaen ti, upyi ku nung-wu iken ti unde ti kununn-wu ku nde be. Tine ame u kunn ni baa arwan-m. Ayine si iken ti nde ame ri te pu m ani meme ira ti ame fxen uwog Itse-m.

16
00:03:16,300 --> 00:03:34,960
I si-yi ani ti tsab m be. Ame ti tsab ni u tom ni atom baa, ani na ru ka waen awaen, awaen ti u tsi kukunn. Ayine si ikyaen ti Itse-m u nda ni iken meme ti ani jwam uwae rinyi-m.

17
00:03:34,960 --> 00:03:39,140
Ni fxen ira ti ame ku ri te ni: Ni ye ure te atso.