1
00:00:05,000 --> 00:00:20,000
Amaa tine ame kafe ku ru tí uwog Itse-m, awu ti tom me ru ba. Ame ku ruru, amaa ko kinjo uwae-ni rang-wu ame uwog wu ti ame ku ru yi atang be.

2
00:00:20,000 --> 00:00:25,280
Utob-ni ndembembeb ikyaen ti ame ri ira yine te ni.

3
00:00:25,280 --> 00:00:43,600
Amaa ame ku ri te ni kubenti, ayi nyang skeb uwog-ni ti ame u ru, ikyaen ti, asiti ame a ru-m be, Awu Itindeya ti u ba ndeya ni u ba-wu uwog-ni be. Amaa asiti ame a ru, ame u tom wu ru ba yi uwog-ni.

4
00:00:43,600 --> 00:01:01,760
Kiye ti awu u ru ba, awu u tatso ande ira ti kubenti ikyaen ti a na nungye iken ti si ikentitibi, ti iken ti si iken ti tinyang uwe Rimam. Aba u ru ba nungye baa, rikwen na Rimam na ru ku ba risu-ba.

5
00:01:01,760 --> 00:01:08,840
Awu u tatso ba baa, aba na nde ikentitibi ikyaen ti, aba ru-ba uwae kinjo uwog-m be.

6
00:01:08,840 --> 00:01:20,040
Awu u tatso ba baa, ame na si unde ti kubenti ikyaen ti, ame u nwunn kafe ru ti uwog Itse-m. Ani u nung-ni uwe-m cwucwo be.

7
00:01:20,040 --> 00:01:31,720
Awu u tatso ba baa, Rimam na u pwen utense wune rikwen ikyaen ti, awu pwen mam pu wu rikwen risu unde wu ti nae ukwe uwae utense wune.

8
00:01:31,720 --> 00:01:42,120
“Ame site ira ko timambe ti m u ri te ni, amaa, asiti ame a ri tag yi tine, ani u ye su tu tag-ni ayi be.

9
00:01:42,120 --> 00:02:01,880
Kiye ti Kusung Rimam a ru ba, awu ti ku tatso ande ira ti kubenti Rimam. Awu u nda ni nungye ira ti kubenti risu iken meme. Awu u ri-wu ira ti risu-wu be, ama awu u ri ira risu iken ti awu fxen uwog Rimam.

10
00:02:01,880 --> 00:02:10,840
Awu u nda m rurob ikyaen ti, iken ti awu u ri te ni meme, awu u sa ruye iken ti ana-m.

11
00:02:10,840 --> 00:02:24,960
Iken ti Itse-m site meme, si ana-m. Ayi ti si iken ti nde titawe ame ri baa, Kusung Rimam na u sa iken ti si ana-m u sa tatso ni.

12
00:02:24,960 --> 00:02:34,480
“Ayi u tsi-yi tsi be ani u nung-ni uwe-m cwucwo be, amaa uwae kiye kpang isim-yi ani u nung uwe-m cwucwo.”

13
00:02:34,480 --> 00:02:58,960
Ariki uwae ande ti putsa wu rang atso ira baa, awu ri baa, “A paji kpang ani u nung-ni uwe-m be, a paji ani u ba nung uwe-m, ikyaen ti, ame ku ru uwog Itse.” Imbyi ira yine ama si imi?

14
00:02:58,960 --> 00:03:14,400
Tiri aba ku rang baa, “Imbyi ira yi ti awu ku ri baa, ‘Uwae kiye kpang,’ baa imi? Ati nungye-ti imbyi ira yi ti awu ku ri ne be.”

15
00:03:14,400 --> 00:03:37,480
Yesu nung pu wu ti aba ku sha ti a na u rang wu ira yine. Awu ri te ba baa, “Ame ri baa, ayi tsi-yi tsi be ani na u nung-ni uwe-m be, amaa isim kiye kpang ani na u nung m. Ayine ti si iken ti ani ku rang atso ira risu-yi be a?

16
00:03:37,480 --> 00:03:52,140
Ame ku ri te ni kubenti, ani u jwub ira u ten aten si ayib. Ande ti nung-ba ame be u tsen utob. Ama isim-yi, utob-ni ti tibyir u kafe utob titsen.

17
00:03:52,140 --> 00:04:12,720
Unda ti ku pwe umbae ku byir utob ikyaen ti, kiye na rikaen ti ngwa-wu ba pu yi. Amaa isim ti awu a mbae mam pu wu umbae-wu, awu ku munnji ti rikaen ti awu ngwa, ikyaen ti, awu ku tsen utob ti a mbae umbae ru ba pu ba ise.

18
00:04:12,720 --> 00:04:31,400
Ayi si ahan ama te ni. Ani ku byir utob tine, amaa kiye ku ba ti ame u ba nungkyi uwe-ni. Uwae kiye wu utob-ni u tsen timambe. Utob ti tsen ayi, unde iki u fxae mbe tu-wu ayi be.

19
00:04:31,400 --> 00:04:47,760
“Kiye wu, ani u jwam-ni ame iken iki be. Ame ku ri te ni kubenti, meme iken ti ani a jwam uwog Itse-m yi rinyi-m, awu u nda ni.

20
00:04:47,760 --> 00:04:58,440
Ru ba ku fob tine ani jwam-ni awu iken iki yi rinyi-m khika be. Ni jwam wu, ikyaen ti utob ti tsen-ni ā tsen tag.

21
00:04:58,440 --> 00:05:16,640
“Ame ri te pu m ani ira yine ti uwae ira ti sunn. Amaa kiye ru ku ba ti ame u ri-m ira risu Itse-m uwae ira ti sunn cwucwo be, amaa ame u ri ira te ni risu-wu ti uwae ira ti paenine.

22
00:05:16,640 --> 00:05:27,880
Kiye wu a ba pu wu, ani u jwam wu ti ajwo-ni yi rinyi-m. Si-yi ti ame u jwam wu ikyaen-ni be.

23
00:05:27,880 --> 00:05:40,240
Ikyaen ti, awu Itse-m ti risu-wu site ure te ni. Awu ye ure te ni ikyaen ti, ani ye ure te me u ru pu ni uwae kinjo baa, ame na ru uwog-wu na ba.

24
00:05:40,240 --> 00:05:52,640
Ayi si kubenti ti ame ru uwog Itse-m ba sang uwae utense wune ara. Tine ame ya utense ku ta u kafe ku ru ti yi uwog Itse-m.”

25
00:05:52,640 --> 00:06:05,240
Amaa ande ti putsa wu ri te wu baa, “Enheen! Tine afu ku ri ira faang u ku ri-fu ira ti uwae itisunn be.

26
00:06:05,240 --> 00:06:26,400
Ati nungye pu ti tine baa, afu na nung pu fu iken meme. Afu nung iken ti ande ku kab uwae utob-ba titawe aba ku rang fu ira risu-yi. Ayine nda ti ru uwae kinjo baa, afu na ru uwog Rimam ba ara.”

27
00:06:26,400 --> 00:06:32,600
Yesu rang ba baa, “Ané? Ani ru pu ni uwae kinjo tiri a?

28
00:06:32,600 --> 00:06:57,400
Kiye ku ba, kubenti, kiye wu ba pu-wu – ti meme-ni u ter shag. Unde titini uwae-ni u kafe ru yi uwae kununn-wu, ama ani u ya m ta kum ame kinjo-m amam. Amaa ame u si-m kinjo-m be, ikyaen ti, awu Itse-m te m ta tetso.

29
00:06:57,400 --> 00:07:16,880
Ame ri ira yine te ni ikyaen ti uwae ijwe ti ren ti ani ren te m, ani u tu utob ti nae riben uwog-m. Utense u nda ni rikaen. Amaa ni tsi ti ribom utob. Ame ci pu m rika risu utense wune.”