1
00:00:05,000 --> 00:00:38,440
Isim yine unde iki ti ru uten ti Arimateya, ti rinyi-wu si Yusufu, jwam Bilatus baa, Bilatus na a cwe, awu na nda wu riyae ti wu na u ye rukom Yesu ru ka nji. Yusufu wune si unde ti ku putsa Yesu ama, amaa, awu ku nde ana-wu ti kitam ikyaen ti, awu kyen ikyenricwu na ande ndufu Mbayawuda. Bilatus cwe. Yusufu ru ka ye rukom wu ru.

2
00:00:38,440 --> 00:01:01,500
Awu Nikodemu, unde ti ru ba uwog Yesu kucang utitang né, putsa Yusufu ru ama. Awu kyang su kindob murr ti alo, ti ku nung kuyang ti tinyang. Usu yine, rurob-yi skeb kilo rijweta.

3
00:01:01,500 --> 00:01:18,140
Aba ande ifaen bane ye rukom Yesu u cwin tag wu te atupwa pangma ti Mbayawuda ku nde kob te ande-ba ti cwucwu.

4
00:01:18,140 --> 00:01:29,660
Uwae rukong iki ta fer uwog ti a kwer Yesu atang, uwáe kutxú ti tishe ta atang ti a nji-ba unde iki atang khika be.

5
00:01:29,660 --> 00:01:45,100
Ti usir wu si riben usir bikyinn na Mbayawuda, cwucwo ikyaen uwáe wu ta fer ba atang, aba ye rukom Yesu ru ka nae atang.

6
00:01:45,100 --> 00:02:02,180
Kiskinn fifae usir ti kucang uwae kutsab, ti ucwefam ku yiyae Mberimu Magadalen ru ka kuskab atang. Ti awu sae, kutxom ti a sa burkyi ufu uwáe kutxú wu mbub ru pu wu.

7
00:02:02,180 --> 00:02:21,740
Awu ter inyae kafe ru yi uwog Siman Bitrus ti unde wu ti Yesu cwe ira-wu timambe u ri te ba baa, “A ye ra Itsekuru-ti ru pu ba uwae kuskab atang! Ati nung-ti uwog ti aba ye wu ru ka nae atang be!”

8
00:02:21,740 --> 00:02:26,180
Uwog wune Bitrus ti unde wu nwunn ru yi kuskab atang.

9
00:02:26,180 --> 00:02:35,780
Aba meme ifaen-ba ku ter inyae, amaa awu unde ti ifaen wu ter skeb Bitrus u ru ka fob kuskab atang uwe.

10
00:02:35,780 --> 00:02:45,300
Awu puku u sae unju uwáe wu u nung atupwa atikicwu cwu riben atang, amaa awu sang-wu uwae atang be.

11
00:02:45,300 --> 00:02:55,460
Ama Siman Bitrus ru ba isim-wu u ba sang fife yi uwáe atang. Awu ama nung atupwa iticwu yi cwu atang,

12
00:02:55,460 --> 00:03:10,140
ti kutupwa ti a pu cwin sang Yesu risu, awu cwu-wu te atupwa atikicwu wu ti tsitsi be, awu fur kyi u nae kum awu kinjo-wu amam.

13
00:03:10,140 --> 00:03:25,100
Ama awu unde wu ti ru ba kuskab atang uwe, sang ka uwae uwàe atang tiri. Ti awu sae pakob, awu ru kubenti baa, Yesu na nwunn pu wu ti unyang.

14
00:03:25,100 --> 00:03:33,820
Ti kucang-yi aba nungye-ba ira ti a bae uwae Kutsingken Rimam baa, awu na u cwu na u shwushwur be.

15
00:03:33,820 --> 00:03:37,140
Ama aba kafe ru yi uwae kununn.

16
00:03:37,140 --> 00:03:46,960
Mberimu tsi ufu kuskab atang u ku jwub ira. Ti awu ku jwub ira, awu puku ti wu na sae uwae kuskab wu

17
00:03:46,960 --> 00:03:56,900
u nung atom Rimam ifaen som uwog ti a sa rukom Yesu nae atang kucang. Aba sī atupwa ti tsen. Kinjo som risu, kinjo som umbyi uwog afxen-wu.

18
00:03:56,900 --> 00:04:13,820
Aba rang wu ira baa, “Unda ne, afu ku jwub imi?” Awu ri te ba baa, “A su ra Itsekuru-m ru pu ba ike, ame nung-m uwog ti a sa wu ka nae atang be.”

19
00:04:13,820 --> 00:04:23,720
Isim ti awu ri mam ira yine awu kafe uwe u nung Yesu tsi atang, amaa awu nung-wu ti unde wu si Yesu be.

20
00:04:23,720 --> 00:04:52,600
Yesu rang wu baa, “Unda ne, afu ku jwub-fu imi? Afu ku sha rifab aye?” Mberimu ku tang baa, Yesu na si unde ti ku nde wande uwae rukong wu u ri te wu baa, “Ite, ayi a si afu ti ye wu ru, ri te m uwog ti afu ye wu ru ka nae atang. Ame u ru ka ye-m awu.”

21
00:04:52,600 --> 00:05:09,940
Ama Yesu kunn wu ti rinyi baa, “Mberimu!” Mberimu kafe uwe tag wu u ri ti unju Mbayawuda baa, “Raboni!” (Imbyi-yi baa, “Unde ti ku kwen iken.”)

22
00:05:09,940 --> 00:05:34,920
Yesu ri te wu baa, “Tekunn-fu ame be, ikyaen ti, ame tso ka-m uwog Itse-m, ti si Itse-ba ama khika be. Amaa ru yi uwog ameinja-m ti ru ka ri te ba baa, ame kafe ku tso yi uwog unde ti si Itse-m u si Itse-ba ama, awu ti si Rimam-m u si Rimam-ba.”

23
00:05:34,920 --> 00:05:50,760
Mberimu, unda ti Magadalen, nwunn ru ka ri te ande ti putsa Yesu ti tsitsi baa, awu na nung pu wu Itsekuru ti ayib, ama awu ti na ri te wu ira ti awu na sa ri ku te ba ne.