1
00:00:05,000 --> 00:00:16,420
Kiye iki Yesu tso kyi risu-wu uwog ande ti putsa-wu cwucwo unju uyinn ti Tiberiya. Fengo ti awu tso risu ta ri.

2
00:00:16,420 --> 00:00:31,780
Siman Bitrus ti Toma (ti a ku kunn wu baa, mbae íshe), ti Nataniyel unde ti Kana uwae Galili, ti anyisu Zebedi ti kyi ande na Yesu ifaen iki cwucwo, meme-ba funn uwog kinjo.

3
00:00:31,780 --> 00:00:53,220
Siman Bitrus ri te ba baa, “Ame ku ru uwog iwag ti ti ye.” Aba ri te wu baa, “Ati u putsa fu ru.” Meme-ba ru ka sang uwae kuyae u ku tā akye-ba. Utitang wu aba ye-ba iken iki be.

4
00:00:53,220 --> 00:01:02,660
Ti usir pur ku tso, Yesu tsi ukunn ambyi, ama ande-wu aba nung-ba ti awu si Yesu be.

5
00:01:02,660 --> 00:01:11,660
Awu kunn ira baa, “Anyisu taen, ani ye-ni iken iki a?” Aba ri baa, “Iyee!”

6
00:01:11,660 --> 00:01:33,220
Awu ri te ba baa, “Ni pu kukye-ni si kujwo rici na kuyae-ni, ani u tu iki atang.” Aba pu kukye wu si, ama shir wu tso tu-ba cwucwo be ikyaen ujwunn iwag ti sang atang.

7
00:01:33,220 --> 00:02:02,700
Awu atugbug ti Yesu site ure te wu timambe ri te Bitrus baa, “Awu si Itsekuru!” Kiye ti Siman Bitrus fxen baa, awu na si Itsekuru-ba, awu cwun kutupwa-wu nyinyang. Ti kucang-yi, awu tunn pu kutupwa-wu ti ise ikyaen wande. Ama u mbyae si uwae ambyi.

8
00:02:02,700 --> 00:02:22,460
Aba ande na Yesu ti tsitsi jwo kuyae wu ru ku ba, ku fam kukye-ba yi ti munn ti iwag kyang su. Aba ta fer pu ba ti ukunn tiri, pangma afxen ukob ita.

9
00:02:22,460 --> 00:02:32,140
Ti aba tso yi ukunn aba nung urwa ti a jwu cwe te iwag iki ti a ku fxab risu urwa yi, ti buredi iki.

10
00:02:32,140 --> 00:02:40,340
Yesu ri te ba baa, “Ni pu iwag iki ti ani ye tine ba.”

11
00:02:40,340 --> 00:03:07,860
Siman Bitrus tso yi uwae kuyae u ka shir kukye ti iwag yi tso yi ukunn. Iwag tiyang munn atang ting ting, meme-yi fob ukob ti mae ifaen ka mbe rijwe asu ita. Ko ti iwag yi ko timambe uwae kukye atang, kukye wu shi yaen-wu be.

12
00:03:07,860 --> 00:03:25,500
Yesu ri te ba baa, “Ni ru ba ti ni ba ci.” Ko unde kinjo uwae ande-wu aba rang-ba awu ira baa, awu na si aye bara, ikyaen ti, aba nung pu ba baa, awu na si Itsekuru.

13
00:03:25,500 --> 00:03:31,860
Yesu ru ka sa buredi yi u kan na ba, ti iwag yi meme.

14
00:03:31,860 --> 00:03:42,620
Ayine si ti atsepu ita ti Yesu tso risu-wu uwog ande-wu isim ti awu nwunn pu wu uwae iticwu.

15
00:03:42,620 --> 00:04:06,000
Isim ti aba ci mam pu ba wuci, Yesu rang Siman Bitrus baa, “Siman umbae Yohana, afu site ure te m skeb abane a.” Bitrus baa, “Een, Itsekuru. Afu nung pu fu baa, ame na site ure te fu.” Yesu ri te wu baa, “Shi imbae iwentam-m.”

16
00:04:06,000 --> 00:04:30,980
Yesu rang kyi wu ti atsepu ifaen baa, “Siman umbae Yohana, afu site ure te m a.” Siman ri te wu baa, “Een, Itsekuru-m, afu nung pu fu ti ame na site ure te fu.” Yesu ri te wu baa, “Nung kyi iwen itam-m.”

17
00:04:30,980 --> 00:05:03,860
Yesu rang kyi wu ti atsepu ita cwucwo baa, “Siman umbae Yohana, afu site ure te m a.” Utob Bitrus ndembeb, ikyaen ti, Yesu rang kyi wu ira ti atsepu ita baa, awu site ure te wu bara? Ama awu ri te Yesu baa, “Itsekuru, afu nung tag pu fu iken, afu nung pu fu ama baa, ame na site ure te fu.” Yesu ri te wu baa, “Shi iwentam-m.

18
00:05:03,860 --> 00:05:29,180
Ame ku ri te fu kubenti, kiye ti afu si umbae kitinying afu cwun arun-fu u ku ru yi uwog ti afu ku sha ti fu u ru meme, amaa kiye ti afu a kyaen pu fu, afu u ndab ta kujwo-fu, unde iki u cwun na fu arun u shir fu ru yi uwog ti afu ku sha-fu be.”

19
00:05:29,180 --> 00:05:42,280
(Yesu ku ri ira yine risu itso iticwu ti Bitrus u ba cwu ti u nda Rimam kuko.) Ama Yesu ri te wu baa, “Putsa m!”

20
00:05:42,280 --> 00:06:01,900
Bitrus kafe uwe u sae unde na Yesu iki tsi atang, awu si unde wu ti Yesu site ure te wu timambe, awu unde ti ko fer Yesu kiye ti aba ku ci wuci nee awu rang Yesu baa, aye ti na u ye wu jabci bara.

21
00:06:01,900 --> 00:06:11,560
Kiye ti Bitrus nungye unde wu, awu rang Yesu baa, “Itsekuru, unde wune ama re?”

22
00:06:11,560 --> 00:06:25,780
Yesu ri te wu baa, “Asiti ame a ku sha ti wu na som ti user ba fob ti usir ti ame u kafe ru ba, ira-fu iki fa atang a? Putsa m!”

23
00:06:25,780 --> 00:06:55,120
Ikyaen ira ti Yesu ri ne, ira shag kyi kutampwa ande ti putsa Yesu baa, unde wune na u cwu-wu cwu be. Amaa Yesu ri-wu baa, awu na u cwu-wu cwu be be. Awu ri nyáng baa, asiti awu na a ku sha ti unde wu na som ti user ka sang ti usir ti awu na u kafe ba, ira Bitrus na fa-yi atang be.

24
00:06:55,120 --> 00:07:10,900
Awu unde wu ti Yesu ri ira risu-wu ne, ayi si si awu ti ku ri te ni ira yine u ku bae yi bae ama. Ati ama nung pu ti baa, iken ti awu bae na si kubenti.

25
00:07:10,900 --> 00:07:31,340
Yesu nde iken ko timambe. A baa, a na bae tag yi meme ti kinjo ti kinjo uwae atsingken, ame ku tang baa, utense ú ye su tu-wu atsingken yi be.