1
00:00:05,000 --> 00:00:37,100
Mãyõn xupep 'ĩhã yãytunũ'nãhã 'ãmãnex xexka xop, xix Yoneo xop yõg xexka xop, xix tik te hãmyũmmũg xop, tu hãm'ãktux tik pa te hãmyũmmũg xop mũtik. Ha ta xonat xop te Yeyox hĩy, tu ta' mõgãhã Pinat hah, tu mõktu Pinat pu Yeyox hõm.

2
00:00:37,100 --> 00:00:52,860
Ha Pinat te Yeyox pu hãm'ãktux, hu: —'Ok xate Yoneo xop xat? Kaxĩy. Ha Yeyox te: —Hamũn. Xate hãm'ãktux. Kaxĩy.

3
00:00:52,860 --> 00:01:00,580
Ha 'ãmãnex xexka xop te Yeyox 'ãktux kummuk punethok.

4
00:01:00,580 --> 00:01:17,220
Ha Pinat te xe yĩykopit, hu: —'Ok xate hãm'ãktux hã yãnãn 'ohnãg? 'Ãpu 'ũxupax, nõm xop te hãm'ãktux 'ãkummuk! Kaxĩy.

5
00:01:17,220 --> 00:01:27,060
Pa Yeyox te xe hãm'ãktux yãnãn 'ohnãg, yĩy Pinat kuxa kopa' yẽy.

6
00:01:27,060 --> 00:01:32,580
Tikmũ'ũn te hãm'ãktux Yeyox 'ũkummuk

7
00:01:32,580 --> 00:01:55,780
'Ãmuk xexka 'ãxet'ax Nõa' Yẽn xip, ha tikmũ'ũn te ta tu' xak, yĩy ta Pinat te tik xut kanet ka'ok kopah, pu mõg. Yã hãmyãxatamuk xohix hã kaxĩy.

8
00:01:55,780 --> 00:02:17,880
Ha ta' xip tihik 'ãxet'ax Mahamax kanet ka'ok kopa yãy xape xop mũtik. Yã hõmã tikmũ'ũn te gohet yõg xop mũtik yãy kix, ha Mahamax te tikmũ'ũn kix, ha' xakix.

9
00:02:17,880 --> 00:02:32,820
Ha ta' nũn nõmhã tikmũ'ũn, nũy ta tu' xak, puyĩy tik xut kanet ka'ok kopah, pu mõg, Yã hãmyãxatamuk nõy xohix putuk.

10
00:02:32,820 --> 00:02:45,820
Ha Pinat te: —'Ok 'ãxop tep-tup, 'ũyĩy xut, pu mõg Yoneo xop yõg xat'ax Yeyox? Kaxĩy.

11
00:02:45,820 --> 00:02:56,300
Yã Pinat te' yũmmũg 'ãmãnex xexka xop Yeyox hã yĩpkumĩy, hu Yeyox nũnnãhã Pinat hah,

12
00:02:56,300 --> 00:03:10,580
tu hãm'ãktux hã tikmũ'ũn gãyãhã', puyĩy ta tu' xak, puyĩy Pinat Mahamax xut pu mõg, 'ap Yeyox'ah,

13
00:03:10,580 --> 00:03:25,920
ha Pinat te: —'Ãxop te putep-tup, 'ũ mĩy tik mũtik? Yã 'ãxop te nõm xãnãhã nõm te Yoneo xop xat. Kaxĩy.

14
00:03:25,920 --> 00:03:34,860
Ha tikmũ'ũn te: —'Ãpu mĩpkup nix yĩmũp-tex pipkup hã. Kaxĩy.

15
00:03:34,860 --> 00:03:56,620
Ha Pinat te: —Teptu, putep kummuk mĩy? Kaxĩy. Ha tikmũ'ũn te hãm'ãktux ka'ok nõy nã' mõg, hu: —'Ãpu mĩpkupnix yĩmũp-tex! 'Ãpu mĩpkupnix yĩmũp-tex! Kaxĩy.

16
00:03:56,620 --> 00:04:17,700
Ha Pinat tep-tup, nũy tikmũ'ũn kuxa hittupmã', hu Mahamax xut, pu mõg, tu hãpxip 'ĩhã xat, puyĩy xonat Yeyox kix xikot hã, tu xonat xop pu Yeyox hõm, pup-tex.

17
00:04:17,700 --> 00:04:22,420
Xonat te Yeyox kute'ex kummuk

18
00:04:22,420 --> 00:04:37,600
Ha ta' mõg xonat xop, tu Yeyox mõgãhã gohenanok pet tu', tu mõktu' mõxaha', ha xonat xohix te yãy tu nũ'nãhã'.

19
00:04:37,600 --> 00:05:04,440
Hãpxip 'ĩhã xonat te Yeyox pu mõ xax tat, yã topixxax tox 'ãta', puyĩy xexka xop putuk, tu Yeyox putox yĩmũ' xix kuxxax, puyĩy xexka xop putuk, yã mĩmyãmtoxmãg hã' mĩy.

20
00:05:04,440 --> 00:05:11,960
Xonat te: —'Ãmax xe'ẽgnãg! Xate Yoneo xop xat! Kaxĩy.

21
00:05:11,960 --> 00:05:34,440
Xonat te Yeyox putox kix mĩm xahix hã, tu mõg yĩyhep yõn, tu kopaxux tu' pip Yeyox keppah, yã' xexka xop keppa putuk, yã' xexka xop 'ãpak putuk,

22
00:05:34,440 --> 00:05:56,380
tu Yeyox kute'ex kummuk kux, tu topixxax tox 'ãta xut, tu mõ xax tat, yã Yeyox yõg, tu Yeyox mõgãhã hãptopah, nũy mĩpkupnix yĩmũp-tex.

23
00:05:56,380 --> 00:06:00,960
Yeyox putex mĩpkupnix yĩmũ'

24
00:06:00,960 --> 00:06:31,220
Tu ta' mõg, tu putat hã' mõg, pa' xip tihik 'ãxet'ax Xĩmãm, yã hãm panip tu' nũn, tu kõmẽn tu' mõg, yã kõmẽn Xinẽn yõg tihik, yã 'Anexãn mũktak xix Hop mũktak. Ha ta' xat xonat te, pu Xĩmãm mĩpkupnix tat, ha' taha',

25
00:06:31,220 --> 00:06:50,360
ha xonat xop te Yeyox mõgãhã hãm tu 'ãxet'ax Gok, yã tikmũ'ũn yĩy'ax hã: “Hãm tu' xip putox kup.” Kaxĩy. Tu' mõg tu mõktu' mõxaha',

26
00:06:50,360 --> 00:07:04,100
ha xonat te Yeyox pu' hõm xupyãg xix hehmẽn, yã xupyãg hã' kanop hehmẽn, pa yã' xo'op'ah,

27
00:07:04,100 --> 00:07:25,740
ha xonat te Yeyox xix mĩpkupnix yĩmũ' pipkup hã, tu mõ' xap yõn, nũy xonat puxet pu Yeyox xax hõm, ha ta' nõy pu' nõy hõm hã kaxĩy.

28
00:07:25,740 --> 00:07:34,640
Yã mãyõn te pexkox puka' yũm 'ĩhã mĩpkupnix yĩmũ' xup Yeyox pipkup hã.

29
00:07:34,640 --> 00:07:48,880
Ha ta 'õm xip, tu' kax'ãmi, hu: “Tik te Yoneo xop xat”. Kaxĩy. Tu nõm xix mĩpkupnix yĩmũ'.

30
00:07:48,880 --> 00:08:07,940
Ha xonat xop te mĩpkupnix yĩmũ xupxet tix kix pipkup hã, yãp-xet xup Yeyox yĩm xe'e tu', ha ta' nõy xup 'ũyĩm xax tu'.

31
00:08:07,940 --> 00:08:22,020
Hã kãxĩy Topa yõg tappetxax te hãm 'ãktux xe'e'. Yã Topa yõg tappetxax te, “Yã' xip 'ũkummuk xop mũtik.”

32
00:08:22,020 --> 00:08:44,800
Ha ta' nũn tikmũ'ũn, tu nũktu Yeyox mãnõg, tup-tox mahap, tu: —'Ũgãynãm! Tute hãm'ãktux Topa pet xexka koxyõy yũmmũg, tu xe' mĩy yũmmũg 'ãmnĩy tikoyuk hã'

33
00:08:44,800 --> 00:08:51,860
Pu yã yĩyxox mĩpkupnix tu', nũy xok hok. Kaxĩy.

34
00:08:51,860 --> 00:09:08,780
Ha ta Yeyox mãnõg kama 'ãmãnex xexka xop te' xix tik te hãmyũmmũg xop te', tu: —Tute tikmũ'ũn hĩnnã yũmmũg, pa yãy hĩnnã yũmmũg 'ohnãg!

35
00:09:08,780 --> 00:09:34,480
Topa te 'ãyãykutnãhã, ha xate Yoneo xop xat. 'Ãpu mĩpkupnix tu yĩyxox. 'Ũgmũ'ãte' pẽnãp-tup, huk mũg kuxa mãm putup 'ãkopah! Kaxĩy. Ha ta xupxet te Yeyox kute'ex kummuk kamah.

36
00:09:34,480 --> 00:09:37,040
Yeyox xok

37
00:09:37,040 --> 00:09:47,360
Mãyõn te yãykote' yũm, pa hãm xohix tu hãpkoxtap, tu mõktu mãyõn he'.

38
00:09:47,360 --> 00:10:08,820
Ha mãyõn he 'ĩhã Yeyox te hãm'ãktux ka'ok, hu: —“'Enix, 'Enix, nẽmã xamatãn?” Kaxĩy. Yã tikmũ'ũn yĩy'ax hã: “Yõgnũ Topa, yõgnũ Topa, teptuk nĩm?” Kaxĩy.

39
00:10:08,820 --> 00:10:17,860
Ha tikmũ'ũn te' xupak, tu: —'Ũxupax! Tute 'Enit xãnãhã'! Kaxĩy.

40
00:10:17,860 --> 00:10:44,140
Ha 'õm xip, tu ta' mõg, tu tohok hã xupyãg kummuk xup, tu mĩm hã' xuhmĩy, tu' nũnnãhã', tu Yeyox pu' hõm, pu xo'op. Tute: —'Ãpu yũmũ'ãte pẽnã'. 'Ok 'Enit nũn, nũy mĩpkupnix tu' xut? Kaxĩy.

41
00:10:44,140 --> 00:10:49,960
Ha Yeyox te hãm'ãktux ka'ok, tu' xok xe'e'.

42
00:10:49,960 --> 00:11:01,300
Ha ta Topa pet xexka yõg topixxax mõhãmnĩnyĩn'ax pot 'ũpepix mõktu' kakak.

43
00:11:01,300 --> 00:11:22,660
Ha ta' xip xonat yõg kapitãm Yeyox keppah, tu Yeyox te hãm'ãktux ka'ok 'ãpak, tu Yeyox xok pẽnãhã', tu: —Hamũn, tihik nũhũ' yã Topak-tok! Kaxĩy.

44
00:11:22,660 --> 00:11:47,260
Ha ta' pip 'ũhũn hãptox miax tu', tu' pẽnãhã', yã 'ũn xop kopa' pip Mãnix Mãnanẽn, xix Xanomẽ', xix Manix, yã Yoye mũktut xix Tiak mũktut, yã Tiak yã tuktup.

45
00:11:47,260 --> 00:12:10,940
Yã hõmã 'ũn te Yeyox mũtik mõg pax tu hãpxexka Ganinet tu', tu Yeyox pu hãpxop max mĩy. Ha ta' pip kama 'ũn nõy xohix. Yã' nũn Yeyox mũtik kõmẽn Yenoyanẽn tu'.

46
00:12:10,940 --> 00:12:16,340
Yeyox yĩn xix mĩkaxxap kox kopah

47
00:12:16,340 --> 00:13:03,360
'Ãmãxak 'ĩhã' nũn Yoye', yã kõmẽn 'Animãtex yõg tihik, yã' xexkah, tu tik pa te hãmyũmmũg xop kopa' xip. Yã tute' hip Topa te yãy yõg tikmũ'ũn xat, ha' yĩpkox pip. Yã xexta pet 'ãmãxak 'ĩhã Yoneo xop te hãmmaxnãhã nit xap pu', yĩy ta Yoye kuxanõg 'ohnãg, hu ta' mõg Pinat hah, nũy ta tu Yeyox xokxax xax.

48
00:13:03,360 --> 00:13:29,900
Pinat te' xupak Yeyox xok xe'e nõmhã, tu' yẽy, yã' xok mõ'ka'ok. Pinat te' xãnãhã Hõm yõg xonat xop yõg xat'ax, yĩy ta' nũn, tu nũktu' xupep. Ha Pinat te: —'Ok xok tãmnãg Yeyox? Kaxĩy.

49
00:13:29,900 --> 00:13:37,360
Ha: —Hamũn. Kaxĩy. Ha Pinat te Yoye pu xokxax hõm.

50
00:13:37,360 --> 00:14:08,280
Ha ta' mõg Yoye, tu topixxax paha', tu ta' mõg, tu mĩpkupnix tu Yeyox yĩn putxok, tu topixxax hã' kĩy, tu' nũn, tu nũktu mĩkaxxap kox kopa' xix, tu mĩkaxxap xexka yõkãnãmãhã hãmyĩkox kopah,

51
00:14:08,280 --> 00:14:25,180
ha Mãnix Mãnanẽn te' pẽnãhã xix Mãnix te', yã Yoye mũktut. Yã Yeyox yĩn pẽnãhã' xix mĩkaxxap kox.

52
00:14:25,180 --> 00:14:46,060
Nit xap 'ãmnĩy tuknõg nõg 'ĩhã' mõg Mãnix Mãnanẽn, xix Xanomẽ', xix Mãnix, yã Tiak mũktut, tu hep hãynãg max paha', nũy Yeyox yĩn muk.

53
00:14:46,060 --> 00:14:54,480
Yenomĩy mãyõn xupep 'ĩhã' mõg mĩkaxxap kox tu',

54
00:14:54,480 --> 00:15:10,600
tu putat kopa yãy mũtik hãm'ãktux, hu: —'Ũ'ũm tek mũ'ã mĩkaxxap xexka yõkãnãmãp-tup, nũy xut hãmyĩkox tu'? Kaxĩy.

55
00:15:10,600 --> 00:15:26,480
Yã' xexkanãm mĩkaxxap, yĩy nõm 'ãktux. Pa' pẽnãhã', pa' xip'ah hãmyĩkox tu'. Tep-te' yõkãnãmãhã'?

56
00:15:26,480 --> 00:15:46,120
'Ũn te mĩkaxxap kox hã' mõxaha', pa' yũm tihik, tu yõg topixxax tox ponnok, yã' yũm 'ũn yĩm xe'e tu', yĩy 'ũn te' yĩpkutuk xexkah.

57
00:15:46,120 --> 00:16:06,020
Pa tik te: —'Ãkuxanõg hok! 'Ãte' yũmmũg, 'ãxop te' xak kõmẽn Nãyane yõg Yeyox. 'Ap xip'ah nũnteh. Yã putpu' hi'. Pẽnã 'ũyõg xip'ax nũnteh.

58
00:16:06,020 --> 00:16:32,320
Mõg, nũy Pet pu hãm'ãktux xix Yeyox yõg tik nõy pu'. 'Ãpu hãm'ãktux, hu: “Yeyox te 'ãkeppa mõg hãpxexka Ganinet tu'. 'Ãxop te' pẽnãp-tup 'õnteh. Yã Yeyox te xa nõm 'ãktux hõmã.” Kaxĩy.