1
00:00:05,000 --> 00:00:10,480
Maqui' ac ne na xec pain ca in mama' xin urut pain ca tomi' to cocon Iri' Jam ma'.

2
00:00:10,480 --> 00:00:11,960
Xuruxut xuruxut,

3
00:00:11,960 --> 00:00:14,180
win quima ac caparut na xojam' ma',

4
00:00:14,180 --> 00:00:17,180
co taramaja mi' e' nonon oro taramaxicon nequem.

5
00:00:17,180 --> 00:00:19,340
Corom pe ho' nam caxicon jam.

6
00:00:19,340 --> 00:00:21,800
Caxicon jam co corom pe ho' nam ma',

7
00:00:21,800 --> 00:00:25,640
tomi' hwet taxi' nain oro carawa ca ara ton nonon oro wari'.

8
00:00:25,640 --> 00:00:27,840
Wari' co taramaja mi' cama ma',

9
00:00:27,840 --> 00:00:31,600
cut tamana nana dinheiro pain ca tomi' hwet ximao nequem ma'.

10
00:00:31,600 --> 00:00:33,660
Win quima iri naparut ne,

11
00:00:33,660 --> 00:00:35,400
ja' ja' ac caparut na.

12
00:00:35,400 --> 00:00:37,220
Ca ja' ja' caparut ma',

13
00:00:37,220 --> 00:00:39,480
ca merem merem cama ma' quem.

14
00:00:39,480 --> 00:00:41,740
Ca' na ca merem cama parut:

15
00:00:41,740 --> 00:00:43,220
Mon tarama' cwa',

16
00:00:43,220 --> 00:00:46,680
taramaja mi' nonon Iri' Jam co Iri' Taramaxicon pan ta.

17
00:00:46,680 --> 00:00:51,260
Pijim' hwet nunuhu' pain ca to' witan pin xim cuhu' ta na ca merem nequem.

18
00:00:51,260 --> 00:00:53,260
Ca merem merem cama ma',

19
00:00:53,260 --> 00:00:55,080
ca merem merem cama ma',

20
00:00:55,080 --> 00:00:57,320
je cwerequem pain oro xijein xec.

21
00:00:57,320 --> 00:01:00,680
Mija na xec pain ca merem ac i ma' e' cama parut.

22
00:01:00,680 --> 00:01:03,420
Aram aram tomi' xiram ac con na Paulo.

23
00:01:03,420 --> 00:01:05,560
Tucu in hwet pan ac cam na,

24
00:01:05,560 --> 00:01:08,100
tomi' mip ac con na caxicon jam nequem:

25
00:01:08,100 --> 00:01:10,160
Hwet ca' ram cam cwa' ta.

26
00:01:10,160 --> 00:01:14,300
Wirico Jeju Cristo co mi' napa' pain ca tomi' mip xim ca' non.

27
00:01:14,300 --> 00:01:16,580
Mam' hwet ca' ac cam na quem.

28
00:01:16,580 --> 00:01:18,760
Wari' co taramaja mi' cama ma',

29
00:01:18,760 --> 00:01:23,000
querec pin' ac cacam na pain ca pe ho' pe ho' om pin cam caxicon jam nequem.

30
00:01:23,000 --> 00:01:23,960
He!

31
00:01:23,960 --> 00:01:27,660
Cut cut om pin xin dinheiro cam cam cwa' ra ac xucucun na.

32
00:01:27,660 --> 00:01:30,380
Quep ac tococwa na Paulo con Silas ma',

33
00:01:30,380 --> 00:01:35,080
coc ororo mi' ac tococwa na cocon oro taramaxicon pain ximijain cidade ma',

34
00:01:35,080 --> 00:01:37,820
pain ca xao to to caca oro wari' ma'.

35
00:01:37,820 --> 00:01:42,020
Coc ororo coc ororo mi' ac tococwa na cocon iri' taramaxicon ma',

36
00:01:42,020 --> 00:01:45,100
co iri' juiz nana cocon oro romano ma'.

37
00:01:45,100 --> 00:01:48,040
Judeu nana caram cwa' ta ac tococwa na.

38
00:01:48,040 --> 00:01:52,620
Ja' teretem nonon oro wari' pain cidade nexi' ca' quem ac tococwa na

39
00:01:52,620 --> 00:01:56,220
Ca' je ca' je nanapari' pain oro ca ara pan caca ma',

40
00:01:56,220 --> 00:01:58,360
pain ca judeu nucucun ma'.

41
00:01:58,360 --> 00:02:00,320
Om ca an xiho' ac tococwa,

42
00:02:00,320 --> 00:02:02,380
xi romano ara iri' ta.

43
00:02:02,380 --> 00:02:06,260
Ta tomi' ha' huhun me ta nanapari' oro taramaxicon nexi' quem,

44
00:02:06,260 --> 00:02:08,600
ac i ma' na ca tomi' tococwa ma'.

45
00:02:08,600 --> 00:02:11,860
Oro wari' co taraju nonon pain ca tomi' nucucun ma',

46
00:02:11,860 --> 00:02:13,700
mana' tamana ac caca na,

47
00:02:13,700 --> 00:02:15,740
quep xuxun ta ac caca na.

48
00:02:15,740 --> 00:02:18,400
Tomi' pan ac caca na oro juiz ma':

49
00:02:18,400 --> 00:02:21,180
Horohot ca' jujun con womicocon ta,

50
00:02:21,180 --> 00:02:23,080
wap jujun ta ac caca na,

51
00:02:23,080 --> 00:02:25,620
to' to' ac tococwa na pain pana.

52
00:02:25,620 --> 00:02:27,640
Wap tamana iri tata ne,

53
00:02:27,640 --> 00:02:31,800
wixicao' mi' ac tococwa na pain xirinain ca tao' to tao' to to wa ma'.

54
00:02:31,800 --> 00:02:35,380
Querec wet xo' roron ta ac tocwa na co tao' to nonon ma'.

55
00:02:35,380 --> 00:02:39,640
Wixicao' mi' ac tococwa na pain man pain iri' tequipain xirim ma'.

56
00:02:39,640 --> 00:02:43,660
Pao' to ac tococwa na pain caximacocon pain cote ne pana.

57
00:02:43,660 --> 00:02:47,620
Win ne ca querec wet xo' roron ta cacapa' oro juiz ma' na.

58
00:02:47,620 --> 00:02:49,560
Xim pa' ac cocon na.

59
00:02:49,560 --> 00:02:52,080
Ximijain xim pin iri na cocon ne,

60
00:02:52,080 --> 00:02:55,500
tomi' tomi' ac con Iri' Jam na Paulo con Silas ma'.

61
00:02:55,500 --> 00:02:58,280
Com querec te mi' nonon pain tamara' quem.

62
00:02:58,280 --> 00:03:01,360
Taraju wet nonon co win tao' to caca ma' quem.

63
00:03:01,360 --> 00:03:04,040
Ane ane cocoroc ac ne na macan'.

64
00:03:04,040 --> 00:03:05,640
Cocoroc mip na.

65
00:03:05,640 --> 00:03:10,920
Cocoroc na oro cote ne pacun ca xat pe ne xirinain ca tao' to tao' to to wa ma' quem.

66
00:03:10,920 --> 00:03:14,300
Pa pa pi' pin hap ac ne na oro manain xirim.

67
00:03:14,300 --> 00:03:16,620
Oro wari' co tao' to wawa ma',

68
00:03:16,620 --> 00:03:21,040
camara' pi' ca' tata oro arain too ca mam' pao' to tococwa ma' quem.

69
00:03:21,040 --> 00:03:24,000
Querec ac ca na wari' co tao' to nonon ma',

70
00:03:24,000 --> 00:03:25,880
co querec wet nonon ma'.

71
00:03:25,880 --> 00:03:29,700
Querec iri nain ca pa pa pi' pin ne oro manain xirim ma' ne,

72
00:03:29,700 --> 00:03:31,400
jain jain ac ca na.

73
00:03:31,400 --> 00:03:33,900
Jein mama' nana xi' ma nonon.

74
00:03:33,900 --> 00:03:36,760
Hot ac cain na cote ne quit nucun ma'.

75
00:03:36,760 --> 00:03:39,620
To' pa' pin xije ta paxi' na ira.

76
00:03:39,620 --> 00:03:42,040
Ane merem mip con Paulo ne:

77
00:03:42,040 --> 00:03:43,380
Om na ta!

78
00:03:43,380 --> 00:03:45,520
Ta to' pa' pin xijem me.

79
00:03:45,520 --> 00:03:48,940
To wet to wet pi' pin urut ca' ira na ca merem nucun.

80
00:03:48,940 --> 00:03:52,820
Tom mi' xine pain naran me ac ca na co tao' to nonon ma',

81
00:03:52,820 --> 00:03:55,020
corom hwet hap ac tococwa na.

82
00:03:55,020 --> 00:03:58,400
Pe torotop mi' ac con na Paulo con Silas ma'.

83
00:03:58,400 --> 00:04:00,840
Cocoroc na pain ca jin' nucun.

84
00:04:00,840 --> 00:04:02,880
O qui' ac tococwa na,

85
00:04:02,880 --> 00:04:04,660
tomi' ac tococwa na:

86
00:04:04,660 --> 00:04:07,120
Cain' cain' xita' quem ta caram ma'?

87
00:04:07,120 --> 00:04:11,940
Param inon Iri' Jam pain ca to' witan ca' capa' pain ca caracat ne ca' na.

88
00:04:11,940 --> 00:04:13,000
Om na,

89
00:04:13,000 --> 00:04:15,660
howa ron Taramaxicon nexi' Jeju ta.

90
00:04:15,660 --> 00:04:18,180
Witan ac ma tara ta ac cocon na.

91
00:04:18,180 --> 00:04:22,440
Ac i ma' tatara oro win ma' ma co to ho' nenem pain xurum ma' quem,

92
00:04:22,440 --> 00:04:25,080
mo ta howa cocon Taramaxicon nexi' ma',

93
00:04:25,080 --> 00:04:27,520
witan ac caca tara quem nonon.

94
00:04:27,520 --> 00:04:31,460
Tomi' xo' ac cocon na pain capijacon Iri' Jam con Jeju.

95
00:04:31,460 --> 00:04:32,440
Wirico,

96
00:04:32,440 --> 00:04:36,020
wiricoco oro win ma' ca co to ho' nonon pain xiricon ma' quem,

97
00:04:36,020 --> 00:04:39,260
tomi' xo' tata pain capijacon Iri' Jam con Jeju.

98
00:04:39,260 --> 00:04:42,420
Tomi' pan ac cocon na co tao' to nonon ma':

99
00:04:42,420 --> 00:04:43,740
Harahap je,

100
00:04:43,740 --> 00:04:47,400
hohoc tain nonahu' ca wap ac xihwe ma' ac tococwa na.

101
00:04:47,400 --> 00:04:49,400
Om ca xec tara e' ca,

102
00:04:49,400 --> 00:04:51,220
hohoc towa tata.

103
00:04:51,220 --> 00:04:55,220
Ja' ac tococwa na pain com pain ca howa cocon Iri' Jam quem,

104
00:04:55,220 --> 00:04:56,160
wirico,

105
00:04:56,160 --> 00:04:59,300
wiricoco oro win ma' ca co to ho' nonon ma' quem.

106
00:04:59,300 --> 00:05:02,900
Maji pain xuru ta ac tocwa na Paulo con Silas ma',

107
00:05:02,900 --> 00:05:05,960
mi' ac tococwa na pain carawa ca cao' wa.

108
00:05:05,960 --> 00:05:08,540
Tomi' querec te tamana na co ma'.

109
00:05:08,540 --> 00:05:11,900
Oro win ma' ca co to ho' nonon pain xiricon ma' quem,

110
00:05:11,900 --> 00:05:14,240
tomi' querec te tamana nana quem.

111
00:05:14,240 --> 00:05:17,600
Xi om ne ca howa pin ara cocon Iri' Jam ta.

112
00:05:17,600 --> 00:05:19,260
Xec pin iri na ne,

113
00:05:19,260 --> 00:05:21,800
tomi' pan ac caca na oro juiz ma',

114
00:05:21,800 --> 00:05:24,340
tomi' tata oro soldado nucucun.

115
00:05:24,340 --> 00:05:28,180
Mo tomi' jun co tao' to nonon wari' ma' ac tococwa na.

116
00:05:28,180 --> 00:05:32,500
Pa hwerehwet pin roron Paulo con Silas ta jun ca' tata.

117
00:05:32,500 --> 00:05:35,560
Hwet ac cocon na co tao' to nonon wari' ma',

118
00:05:35,560 --> 00:05:37,360
tomi' ac cocon na.

119
00:05:37,360 --> 00:05:38,960
Ma ac ca na,

120
00:05:38,960 --> 00:05:41,080
tomi' hwet ac con na Paulo:

121
00:05:41,080 --> 00:05:44,600
Pa hwerehwet pin roron ta nanapa' pahu' ac con na.

122
00:05:44,600 --> 00:05:47,280
Je ca tomi' xuhu' ca' ac tococwa na:

123
00:05:47,280 --> 00:05:48,960
Mama' ho' je.

124
00:05:48,960 --> 00:05:53,660
Param inuhu' pain ca querec wet cara cuhu' Iri' Jam pain ca mama' nuhu' ta,

125
00:05:53,660 --> 00:05:56,120
ac i ma' na ca tomi' tococwa ma'.

126
00:05:56,120 --> 00:06:00,180
Ane tomi' in pin pan cocon oro soldado Paulo ma' ne:

127
00:06:00,180 --> 00:06:02,000
Cain' cain' xirara quem?

128
00:06:02,000 --> 00:06:04,360
Mo xi om romano urut ta.

129
00:06:04,360 --> 00:06:06,200
Romano urut ca' ira!

130
00:06:06,200 --> 00:06:09,000
Je xi om wap qui' cacaparut quem?

131
00:06:09,000 --> 00:06:10,800
Wap e' nanaparut.

132
00:06:10,800 --> 00:06:13,680
Querec querec xam' nanaparut oro wari' quem.

133
00:06:13,680 --> 00:06:18,920
Wixicao' mi' ma' ac cacaparut na pain xirinain ca tao' to tao' to to wa ca' quem.

134
00:06:18,920 --> 00:06:21,840
Je xi tomi' querec xo' cain' cacaparut quem?

135
00:06:21,840 --> 00:06:23,840
Xi pan teretem urut ta.

136
00:06:23,840 --> 00:06:25,700
Cain' cain' xirara quem?

137
00:06:25,700 --> 00:06:28,520
Mama' noc xa je nanaparut ra?

138
00:06:28,520 --> 00:06:31,260
Om ta mama' hohomu urut ta.

139
00:06:31,260 --> 00:06:34,060
Hwet pan tataraparut oro juiz ta!

140
00:06:34,060 --> 00:06:36,880
Mama' je ta xo' pan tataraparut ta,

141
00:06:36,880 --> 00:06:39,800
ac i ma' na ca tomi' in pin nucun Paulo ma'.

142
00:06:39,800 --> 00:06:42,600
In hwet ac cocon oro juiz na oro soldado ma',

143
00:06:42,600 --> 00:06:46,280
tomi' hwet ac cocon na pain ca tomi' nucun Paulo.

144
00:06:46,280 --> 00:06:49,100
Taraju iri nanain ca tomi' nucucun ma' ne,

145
00:06:49,100 --> 00:06:52,520
pain ca romano urut ca' ira na Paulo ne caca ma',

146
00:06:52,520 --> 00:06:54,580
jin' pin ac caca na quem.

147
00:06:54,580 --> 00:06:56,260
Hwet ac cocon na,

148
00:06:56,260 --> 00:06:58,240
tomi' toto ac cocon na.

149
00:06:58,240 --> 00:07:02,420
Mana' mana' om pin xut pain ca quep em' urut pahu' ne ac cocon na,

150
00:07:02,420 --> 00:07:04,460
cut hwerehwet qui' ac cocon na,

151
00:07:04,460 --> 00:07:07,620
paca' jein cidade nuxut ta ac cocon na quem.

152
00:07:07,620 --> 00:07:11,640
Hwerehwet ca' iri nanain xirinain ca tao' to tao' to to wa ma' ne,

153
00:07:11,640 --> 00:07:14,520
mama' ac cacain na xiricam Lídia ma'.

154
00:07:14,520 --> 00:07:18,420
Je ca cut in to xucucun cocon oro win howa caca ma'.

155
00:07:18,420 --> 00:07:20,960
Tomi' tomi' ac cocon na,

156
00:07:20,960 --> 00:07:23,940
hwara' opa je pain ca howa nuhu' pa'ao' ac cocon na,

157
00:07:23,940 --> 00:07:27,400
mama' ac caca na.