1
00:00:05,000 --> 00:00:07,900
Maji ta ac caparut na Jeju ma',

2
00:00:07,900 --> 00:00:10,220
xuruxut mama' ac urut na.

3
00:00:10,220 --> 00:00:12,400
Querec ac con na wari' Jeju.

4
00:00:12,400 --> 00:00:14,940
Wara om na tocon pain ca xo' pan' nucun pane.

5
00:00:14,940 --> 00:00:19,580
Tomi' querec ac urut con na pain ca taxipa' urut con ca':

6
00:00:19,580 --> 00:00:26,440
Cain' cain' ne con wari' cwa' quem Taramaxicon co ca' na taxipa' capijacon Iri' Jam ac urut con.

7
00:00:26,440 --> 00:00:30,400
Para wara om ne tocon pain ca xo' pan' nucun quem?

8
00:00:30,400 --> 00:00:33,000
Ca caracat nucun tara ron?

9
00:00:33,000 --> 00:00:39,340
Ca caracat nequem jicon con cote ca tara ra na ca tomi' querec urut con ma'.

10
00:00:39,340 --> 00:00:41,580
Om na ac caparut na.

11
00:00:41,580 --> 00:00:45,900
Om na ca caracat nucun ca to' om nain tocon.

12
00:00:45,900 --> 00:00:52,040
Om na ca caracat nequem jicon con cote ca ca to' om nain tocon quem.

13
00:00:52,040 --> 00:00:53,840
Om pan na tocon,

14
00:00:53,840 --> 00:01:00,380
ma' ta querec pin' cacapa' oro wari' pain ca hwara' opa ne pain ca quep xio pin ton ta na Iri' Jam.

15
00:01:00,380 --> 00:01:05,060
Pain ca toha toha wet ca xina cwa',

16
00:01:05,060 --> 00:01:11,920
na e' na pain ca ara xin ca ara je capari' Iri' Jam co hwet roron oro wari' ta napa' ma'.

17
00:01:11,920 --> 00:01:14,220
Xim pin ta' iri na quem.

18
00:01:14,220 --> 00:01:16,280
Xim pin iri na ne,

19
00:01:16,280 --> 00:01:19,160
om ta taramaja mami' ac iri'.

20
00:01:19,160 --> 00:01:22,580
Pain ca pe pe wet tain macan' ca',

21
00:01:22,580 --> 00:01:28,500
ac naran ina pain ca toha mi' toton pain ximicocon oro wari' ta na ca tomi' caparut ma'.

22
00:01:28,500 --> 00:01:31,020
Tomi' iri nain i ma' Jeju ne,

23
00:01:31,020 --> 00:01:34,080
cupa' ac cain na morocacon pain macan'.

24
00:01:34,080 --> 00:01:36,120
Meo maram ac cain na,

25
00:01:36,120 --> 00:01:38,980
wara ca' na co om tocon ma',

26
00:01:38,980 --> 00:01:40,920
toto ac cain na pain tocon.

27
00:01:40,920 --> 00:01:42,700
Tomi' ac con na:

28
00:01:42,700 --> 00:01:45,060
Mao rain wijimain xuterem' ma',

29
00:01:45,060 --> 00:01:47,460
ca Siloé caca oro wari' ma'.

30
00:01:47,460 --> 00:01:51,080
Hohoc ac main tara tucum na ca tomi' con ma'.

31
00:01:51,080 --> 00:01:57,820
Mam' napari' pain cominain Siloé Iri' Jam ta nanain wijimain xuterem' oro wari' ma'.

32
00:01:57,820 --> 00:02:00,080
Je ca o' ma' mi' cacain quem,

33
00:02:00,080 --> 00:02:03,280
je ca tomi' mao ne ca Siloé wa ma'.

34
00:02:03,280 --> 00:02:04,880
Ma ac ca na,

35
00:02:04,880 --> 00:02:07,420
mao ac cain na wijimain xuterem' ma',

36
00:02:07,420 --> 00:02:09,400
hohoc ac cain na tocon.

37
00:02:09,400 --> 00:02:11,080
Querec pin' ac ca na.

38
00:02:11,080 --> 00:02:13,660
In mao ac cain na xiricon quem.

39
00:02:13,660 --> 00:02:22,020
Querec nonon oro win ma' ca cocon oro xucucun wari' co querec taxipa' nonon pain ca xiram pa' xine,

40
00:02:22,020 --> 00:02:25,740
mi' xine pain oro carawa cocon oro wari' ma'.

41
00:02:25,740 --> 00:02:27,660
He ac caca na.

42
00:02:27,660 --> 00:02:32,620
Ac wari' co xao pe taxipa' nain i cain pane napa' me,

43
00:02:32,620 --> 00:02:35,840
co mi' xine taxipa' oro carawa pane,

44
00:02:35,840 --> 00:02:39,060
ac wirico ne ma' ira ac caca na.

45
00:02:39,060 --> 00:02:40,160
E'e',

46
00:02:40,160 --> 00:02:43,360
wirico ma' ira ac caca na oro xucucun.

47
00:02:43,360 --> 00:02:44,380
Om na,

48
00:02:44,380 --> 00:02:45,960
xucun wari' ta,

49
00:02:45,960 --> 00:02:50,320
ac wirico e' na ta ac caca na oro xucucun ma' quem.

50
00:02:50,320 --> 00:02:53,100
Wata' cwa' ira pan ac ca na.

51
00:02:53,100 --> 00:02:54,720
Cain' cain' ma quem?

52
00:02:54,720 --> 00:02:57,960
Para querec pin' ma ma' quem ac cocon na.

53
00:02:57,960 --> 00:02:59,100
Om na,

54
00:02:59,100 --> 00:03:00,360
co cwain ta,

55
00:03:00,360 --> 00:03:02,620
co Jeju na wixicon cwain,

56
00:03:02,620 --> 00:03:07,020
wirico co meo maram nain macan' pain morocacon,

57
00:03:07,020 --> 00:03:09,740
toto ac cain na pain tucu.

58
00:03:09,740 --> 00:03:11,600
Tomi' ac capa' na:

59
00:03:11,600 --> 00:03:13,500
Mao rain Siloé ma',

60
00:03:13,500 --> 00:03:16,420
hohoc ac main tara tucum ta napa'.

61
00:03:16,420 --> 00:03:17,920
Hwet ac tain na,

62
00:03:17,920 --> 00:03:20,280
hohoc ac tain na tucu,

63
00:03:20,280 --> 00:03:23,040
querec pin' ac ta' na quem na.

64
00:03:23,040 --> 00:03:26,140
Main ca pe ca quem ac cocon na.

65
00:03:26,140 --> 00:03:28,960
Om ca taxi' ton ta ac ca na.

66
00:03:28,960 --> 00:03:30,760
Oro wari' ma',

67
00:03:30,760 --> 00:03:34,620
o mao ac cocon na co quep xio pin wa ma',

68
00:03:34,620 --> 00:03:37,860
o mi' nonon cocon oro fariseu.

69
00:03:37,860 --> 00:03:46,080
Xec nein ca xao to wa ne ca xumu wa na pain ca meo maram cain macan' pain morocacon Jeju ma',

70
00:03:46,080 --> 00:03:48,980
pain ca quep xio pin con ma'.

71
00:03:48,980 --> 00:03:52,520
Tomi' querec pan nonon oro fariseu ma' quem:

72
00:03:52,520 --> 00:03:55,320
Para querec pin' ma ma' quem nonon.

73
00:03:55,320 --> 00:03:56,440
Om na,

74
00:03:56,440 --> 00:03:59,980
meo maram nain macan' pain morocacon,

75
00:03:59,980 --> 00:04:02,780
toto ac cain na pain tucu.

76
00:04:02,780 --> 00:04:05,080
Hohoc ac tain na tucu,

77
00:04:05,080 --> 00:04:08,100
querec pin' ac ta' na quem tata.

78
00:04:08,100 --> 00:04:12,240
Ma' ac caca na oro fariseu co tomi' ca' nana quem:

79
00:04:12,240 --> 00:04:15,980
Om ca maqui' con Iri' Jam co ara nain i ma'.

80
00:04:15,980 --> 00:04:21,240
Xi taramaja ara ca pain xec nein ca xao to wa ne ca xumu wa ca',

81
00:04:21,240 --> 00:04:26,280
pain ca ta taramaja hwein me ta capari' ca' na ca tomi' caca ma'.

82
00:04:26,280 --> 00:04:29,720
Tara con ac caca na oro xucucun ma' quem.

83
00:04:29,720 --> 00:04:31,660
Mo xi caracat ca,

84
00:04:31,660 --> 00:04:37,640
om xi ara taxi' ac i ma' cain carawa ca om ara taxi' ne ca wari' wa ta.

85
00:04:37,640 --> 00:04:41,320
Ac i ma' na ca coromicat ni ca' xucucun.

86
00:04:41,320 --> 00:04:44,040
Tomi' querec mami' ac cocon na:

87
00:04:44,040 --> 00:04:47,540
To' querec pin' napa' pain tucu ta mon.

88
00:04:47,540 --> 00:04:50,460
Cain' ca coromicat mi' mon quem nonon.

89
00:04:50,460 --> 00:04:53,000
Profeta na ta ac ca na.

90
00:04:53,000 --> 00:04:56,600
Oro taramaxicon nuxut pain ca judeu urut ca',

91
00:04:56,600 --> 00:05:00,600
om ca howa cocon pain ca om ne tocon pane.

92
00:05:00,600 --> 00:05:06,120
Om ca howa caca pain ca quep xio pin napa' pain tucu ca ma' quem.

93
00:05:06,120 --> 00:05:10,320
Je ca harahap je cocon cote ca cam jicon ma'.

94
00:05:10,320 --> 00:05:12,680
Tomi' querec ac cacam na:

95
00:05:12,680 --> 00:05:15,360
Pije' nuhu' na co cwa' ra?

96
00:05:15,360 --> 00:05:19,620
Wara om na tocon pain ca xo' pan' nucun ta hun.

97
00:05:19,620 --> 00:05:21,540
Cain' cain' xira quem?

98
00:05:21,540 --> 00:05:25,440
Para querec pin' ca pain xocori ca' quem nanam.

99
00:05:25,440 --> 00:05:29,900
Pije' nuxut ta ac cacama na cote ca cam jicon.

100
00:05:29,900 --> 00:05:36,220
Taxi' paxi' urut con pain ca wara om ne tocon pain ca xo' pan' nucun pane.

101
00:05:36,220 --> 00:05:41,820
Ane om taxi' urut con pain ca querec pin' ca pain xocori ca' ne.

102
00:05:41,820 --> 00:05:46,000
Om ca taxi' urut con co quep xio pin non quem.

103
00:05:46,000 --> 00:05:48,080
Ho' tarama' pin na,

104
00:05:48,080 --> 00:05:50,020
taxi' pan xucun.

105
00:05:50,020 --> 00:05:52,800
Je xi tomi' querec pan hun quem?

106
00:05:52,800 --> 00:05:56,340
Tomi' xo' pan turuhu' pain ac cocon na.

107
00:05:56,340 --> 00:05:59,840
Tomi' ac i ma' na cote ca cam jicon ma',

108
00:05:59,840 --> 00:06:03,700
xi om ne ca jin' ara cocon oro taramaxicon ta.

109
00:06:03,700 --> 00:06:05,940
Wara tomi' ara xi' nana:

110
00:06:05,940 --> 00:06:09,420
Wari' co Cristo na ta non Jeju ma',

111
00:06:09,420 --> 00:06:11,940
xin hwet pin ac xut con tara,

112
00:06:11,940 --> 00:06:18,260
om ta corom mami' cain xirim ca cut in to xijexi' pain ca judeu iri' ca' nana.

113
00:06:18,260 --> 00:06:22,660
Je ca tomi' ac i ma' ca cote ca cam jicon ma',

114
00:06:22,660 --> 00:06:25,200
pain ca ho' tarama' pin na,

115
00:06:25,200 --> 00:06:27,080
taxi' pan xucun,

116
00:06:27,080 --> 00:06:30,780
je xi tomi' querec pan hun quem cacama ma'.

117
00:06:30,780 --> 00:06:35,560
Hap ra mami' ac cocon na co quep xio pin wa ma' quem.

118
00:06:35,560 --> 00:06:37,720
Tomi' iri'o' ra ta,

119
00:06:37,720 --> 00:06:40,540
taraju nem Iri' Jam ta.

120
00:06:40,540 --> 00:06:42,340
Taxi' urut con wari' ma',

121
00:06:42,340 --> 00:06:46,860
taxi' urut con pain ca caracat ca ma' na ca tomi' cocon ma'.

122
00:06:46,860 --> 00:06:49,340
Tara con ta'a ac ca na.

123
00:06:49,340 --> 00:06:50,540
Am caracat ca,

124
00:06:50,540 --> 00:06:53,020
om ca taxi' ton.

125
00:06:53,020 --> 00:06:56,540
Ma' xica' pe e' na carawa ca taxi' ta' ca'.

126
00:06:56,540 --> 00:07:00,500
Taxi' xije pain ca om capa' tucu ira,

127
00:07:00,500 --> 00:07:06,340
taxi' xije pain ca querec pin' ta' pain xocori ca' quem na ca tomi' ca ma'.

128
00:07:06,340 --> 00:07:08,360
Cain' cain' quem quem?

129
00:07:08,360 --> 00:07:12,740
Cain' ca to' querec pin' cain tucum ma' quem ac cocon na.

130
00:07:12,740 --> 00:07:15,320
Wara tomi' paxi' inuhu',

131
00:07:15,320 --> 00:07:18,980
ane om howa mahu' pain ca tomi' ta' ca' ne.

132
00:07:18,980 --> 00:07:22,760
Para param mami' hwein ca taraju wa ma' quem?

133
00:07:22,760 --> 00:07:27,000
Ja' ja' xuxun na hwe quem ra na ca tomi' cocon ma'.

134
00:07:27,000 --> 00:07:29,280
Tomi' xirac ac cocon na:

135
00:07:29,280 --> 00:07:31,820
Wum co ja' ja' pan non ta.

136
00:07:31,820 --> 00:07:33,660
Warut iri na ne,

137
00:07:33,660 --> 00:07:36,160
ja' ja' urut con Moisés ta.

138
00:07:36,160 --> 00:07:39,100
Taxi' urut con Moisés cara pane,

139
00:07:39,100 --> 00:07:43,860
wirico Iri' Jam na co mi' non pain ca hwara' opa tamana nucun.

140
00:07:43,860 --> 00:07:45,800
Co ma' iri na ne,

141
00:07:45,800 --> 00:07:48,240
om ca taxi' camain' urut con.

142
00:07:48,240 --> 00:07:52,940
Om ca taxi' urut con co mi' non pain ca hwara' opa nucun quem.

143
00:07:52,940 --> 00:07:54,820
Am wari' con,

144
00:07:54,820 --> 00:07:56,520
am Iri' Jam con,

145
00:07:56,520 --> 00:07:59,620
om ca taxi' urut con ta ac cocon na.

146
00:07:59,620 --> 00:08:01,700
Wa inuhu' me!

147
00:08:01,700 --> 00:08:04,560
Xi quep xio pin ara capa' ta!

148
00:08:04,560 --> 00:08:09,560
Je xi taxi' hun co mi' non pain ca hwara' opa wa ma' quem?

149
00:08:09,560 --> 00:08:17,120
Taxi' urun Iri' Jam pain ca miri'om cocon oro caracat pain ca quep xiho' xut me cocon ma'.

150
00:08:17,120 --> 00:08:21,420
Ane xiram pa' cocon co tomi' ha' nonon ma' ne,

151
00:08:21,420 --> 00:08:24,380
co ara nanain ca param nucun ma'.

152
00:08:24,380 --> 00:08:27,860
Pain ca xo' ma' ten qui' ne macan' pane,

153
00:08:27,860 --> 00:08:36,500
om ca querec camain' tocwa wari' co to' querec pin' wa tocon co wara om tocon pain ca xo' pan' nucun ta.

154
00:08:36,500 --> 00:08:41,620
Mo xi om maqui' con Iri' Jam ca hwara' opa nucun co ma',

155
00:08:41,620 --> 00:08:46,360
om xi quep xio pin ac capa' ta na ca tomi' tococwa ma'.

156
00:08:46,360 --> 00:08:48,200
He ac cocon na.

157
00:08:48,200 --> 00:08:52,420
Wara caracat qui' main ca pan' qui' nem ma' ira.

158
00:08:52,420 --> 00:08:56,560
Cain' xi tomi' xo' ac maparut con Iri' Jam quem nonon,

159
00:08:56,560 --> 00:09:01,820
xin hwet ca' ac cocon na pain xirim ca cut in to xucucun ma'.

160
00:09:01,820 --> 00:09:09,240
Taxi' ac con na Jeju pain ca xin hwet ca' cocon pain xirim ca cut in to xucucun ma' quem.

161
00:09:09,240 --> 00:09:11,160
Pirao' ac con na.

162
00:09:11,160 --> 00:09:12,980
Mam' iri non ne,

163
00:09:12,980 --> 00:09:14,900
tomi' querec ac con na:

164
00:09:14,900 --> 00:09:19,960
Howa mon co Iri' Wari' ma' quem na ca tomi' querec con ma'.

165
00:09:19,960 --> 00:09:23,940
Ma' wari' co Iri' Wari' ma' quem ac ca na.

166
00:09:23,940 --> 00:09:25,660
Tomi' hwet ne con,

167
00:09:25,660 --> 00:09:28,500
ma' ta howa ton ta ac ca na.

168
00:09:28,500 --> 00:09:30,360
Querec mon ma' ira.

169
00:09:30,360 --> 00:09:31,340
Wata' ta,

170
00:09:31,340 --> 00:09:35,180
co tomi' nem cwa' ta ac con na Jeju.

171
00:09:35,180 --> 00:09:38,580
Howa inem ta Taramaxicon ne ac ca na,

172
00:09:38,580 --> 00:09:41,480
pe torotop mi' querec te ac con na.

173
00:09:41,480 --> 00:09:43,980
Tomi' ac ca na Jeju:

174
00:09:43,980 --> 00:09:46,400
Maqui' inain macan' ca',

175
00:09:46,400 --> 00:09:51,460
ma' ta querec pin' tococwa oro wari' pain ca taraju pa' nucucun.

176
00:09:51,460 --> 00:09:58,160
Oro wari' co querec pin' paxi' xucucun pain ca om taraju pa' cacain capijacon Iri' Jam ma',

177
00:09:58,160 --> 00:10:02,040
an xiho' nonon wari' co om tococon.

178
00:10:02,040 --> 00:10:09,200
Ac ca to' querec pin' xine na tococon pain ca mi' tococwa pain ca taraju pa' wa quem.

179
00:10:09,200 --> 00:10:15,400
Oro wari' co taraju pa' urut xi' ma nanain capijacon Iri' Jam ma' iri na ne,

180
00:10:15,400 --> 00:10:18,300
ac ca querec caca paxi' na,

181
00:10:18,300 --> 00:10:20,680
ane om querec caca ne.

182
00:10:20,680 --> 00:10:22,980
Om ca taraju pa' caca.

183
00:10:22,980 --> 00:10:28,980
Om cara na tococon pain ca om taraju pa' nucucun ta na ca tomi' ca ma'.

184
00:10:28,980 --> 00:10:34,960
Ma' ac caca na oro fariseu co taraju nonon pain ca tomi' ac i ma' ca ma'.

185
00:10:34,960 --> 00:10:37,700
Cain' cain' xima quem ac cocon na.

186
00:10:37,700 --> 00:10:40,380
Ac ca tomi' maparut na,

187
00:10:40,380 --> 00:10:47,880
ac ca om ne na tucuhu' pain ca om taraju pa' hwein capijacon Iri' Jam maparut ron ac cocon na.

188
00:10:47,880 --> 00:10:50,000
Tomi' ac tococwa na:

189
00:10:50,000 --> 00:10:55,920
Mo xi querec pin' xujuhu' pain ca om taraju pa' hwein capijacon Iri' Jam ma',

190
00:10:55,920 --> 00:11:00,280
an xiho' ac huhun xira wari' co om tococon ma',

191
00:11:00,280 --> 00:11:04,340
co jain jain nana pain ca querec xixi' na caca ma'.

192
00:11:04,340 --> 00:11:09,020
Om ac ne xira ca tomi' em' xihwe pain ca caracat nuhu'.

193
00:11:09,020 --> 00:11:12,360
Ane taraju pa' urut xi' ma hwe ne.

194
00:11:12,360 --> 00:11:18,120
Je ca an xiho' huhun wari' co querec urut xi' ma paxi' nana ma',

195
00:11:18,120 --> 00:11:20,700
ane om ne tococon ne.

196
00:11:20,700 --> 00:11:28,700
Om ca xic am ac xihwe pain ca caracat nuhu' ta na ca tomi' tococwa ma'.