1
00:00:05,000 --> 00:00:13,380
Mija nana wari' co wara mama' nanain Jerusalém pain ca pe torotop mi' querec te xun cocon Iri' Jam ma',

2
00:00:13,380 --> 00:00:18,400
je pain ca tomi' querec te wi xin cacain xec nein Páscoa ma' quem.

3
00:00:18,400 --> 00:00:22,540
Ma' nana co om judeu nana co ja' ja' nonon quem.

4
00:00:22,540 --> 00:00:30,400
Ma' ta pe torotop mi' querec te xun Iri' Jam pain oro xec nein ca tomi' querec te nucucun oro judeu cwa' nana.

5
00:00:30,400 --> 00:00:33,120
Mo hwet ac cocon na Filipe ma',

6
00:00:33,120 --> 00:00:36,820
co wari' nein Betsaida pain Galileia ma'.

7
00:00:36,820 --> 00:00:40,760
Querec xuxun Jeju na urut ta ac cocon na.

8
00:00:40,760 --> 00:00:43,440
Na ra ac ca na Filipe,

9
00:00:43,440 --> 00:00:46,080
mo hwet ac con na André ma'.

10
00:00:46,080 --> 00:00:51,080
Querec xuxun Jeju na urut ta nana caram cwa' ta ac con na.

11
00:00:51,080 --> 00:00:54,200
Tomi' hwet xun cocon e' ac caca na,

12
00:00:54,200 --> 00:00:56,600
mo hwet ac cocon na quem.

13
00:00:56,600 --> 00:00:58,780
Tomi' xo' ac tococwa na:

14
00:00:58,780 --> 00:01:03,680
Maqui' pin ta' iri napa' xec nein ca mi' pin ta' ne ca'.

15
00:01:03,680 --> 00:01:08,820
An hwet mi' ac cuhu' tara pain ca hwara' opa ne Te Iri' Jam.

16
00:01:08,820 --> 00:01:12,480
An hwet mi' turuhu' pain ca hwara' opa ne ca',

17
00:01:12,480 --> 00:01:14,840
pain ca Iri' Wari' ta' ca'.

18
00:01:14,840 --> 00:01:17,080
Je ca tomi' xuhu' ca',

19
00:01:17,080 --> 00:01:19,980
tomi' iri'o' inuhu' ta ac tococwa na.

20
00:01:19,980 --> 00:01:21,920
Noro jein tocwi trigo ma'.

21
00:01:21,920 --> 00:01:23,420
Mo ta oin' xine,

22
00:01:23,420 --> 00:01:25,140
memerem ac ne na,

23
00:01:25,140 --> 00:01:27,620
ac ca mi' pin ne na quem.

24
00:01:27,620 --> 00:01:30,640
Mo ta om oin' xine pain macan' ma',

25
00:01:30,640 --> 00:01:34,880
mo ta om memerem maram mao ne taparinain ma',

26
00:01:34,880 --> 00:01:38,620
to wet xica' pe cara ac ne tara tocwi.

27
00:01:38,620 --> 00:01:42,460
Mo ta memerem maram mao ne taparinain,

28
00:01:42,460 --> 00:01:45,780
mi tamana ac ne tara tocwi.

29
00:01:45,780 --> 00:01:51,380
Win ca wari' co win xumu e' nain ca param pan nucun pain macan' ca'.

30
00:01:51,380 --> 00:01:54,240
Om ta e' cara pe cain pawin ta.

31
00:01:54,240 --> 00:01:59,480
Wari' co om win xumu nain ca param pan nucun pain macan' ca' iri na ne,

32
00:01:59,480 --> 00:02:06,720
aram aram maqui' pa' ac con tara xec nein ca om pi' ra ha' ne ca e' nucun pain pawin.

33
00:02:06,720 --> 00:02:09,960
Wari' co taramaja mi' xim napa' ma',

34
00:02:09,960 --> 00:02:13,160
na e' na pain ca ja' ja' cara capa'.

35
00:02:13,160 --> 00:02:15,280
Oro ca mao ne ca',

36
00:02:15,280 --> 00:02:17,480
je tara ca mao ca quem,

37
00:02:17,480 --> 00:02:19,200
pe ho' tarapa' quem.

38
00:02:19,200 --> 00:02:21,840
Wari' co taramaja mi' napa' ma',

39
00:02:21,840 --> 00:02:23,620
tomi' querec te ac tocwa tara,

40
00:02:23,620 --> 00:02:26,580
hohot ma ta ac tocwa tara.

41
00:02:26,580 --> 00:02:32,980
Wirico Te tara co hohot ma pan ton non ta na ca tomi' tococwa ma'.

42
00:02:32,980 --> 00:02:37,420
Toron tamana napa' xumu pain xocori ca' ac tococwa na.

43
00:02:37,420 --> 00:02:39,860
Cain' cain' xiton Te quem?

44
00:02:39,860 --> 00:02:42,120
Tomi' ca' xiton ra?

45
00:02:42,120 --> 00:02:45,460
Nain ho' ne pain ca jain jain ta' ne ca',

46
00:02:45,460 --> 00:02:50,620
pain ca to' i'ina xim capa' carawa ca maqui' pa' xim napa' ca' Te,

47
00:02:50,620 --> 00:02:52,380
ca' xiton ra?

48
00:02:52,380 --> 00:02:56,360
Om ca na ne pain ca tomi' ac i ma' ton ta.

49
00:02:56,360 --> 00:02:59,400
Xi jain jain ta' ara ta' pane ta.

50
00:02:59,400 --> 00:03:03,500
To' i'ina tarapa' carawa ca maqui' pa' xim napa'.

51
00:03:03,500 --> 00:03:07,680
Je ca maqui' tain macan' ca' na ca tomi' tococwa ma'.

52
00:03:07,680 --> 00:03:13,040
An hwet pe rain ca hwara' opa nem pain ca awi tamana nem ta Te ac ca na quem.

53
00:03:13,040 --> 00:03:17,480
Taraju ac urut pain na ca tomi' wa ma'.

54
00:03:17,480 --> 00:03:19,480
Maqui' nain pawin.

55
00:03:19,480 --> 00:03:25,360
Wara an hwet pe inain ca hwara' opa ne pain ca awi tamana ne ca' na.

56
00:03:25,360 --> 00:03:28,360
An hwet pe mami' ac tain tara quem.

57
00:03:28,360 --> 00:03:32,820
Ac i ma' na ca tomi' wa ca maqui' nain pawin.

58
00:03:32,820 --> 00:03:37,000
Taraju nanain oro wari' co to nanain i ma' quem.

59
00:03:37,000 --> 00:03:39,360
Comerem ta nanain.

60
00:03:39,360 --> 00:03:40,380
Om na,

61
00:03:40,380 --> 00:03:43,720
wirico jam co taramaja mi' non Iri' Jam ma',

62
00:03:43,720 --> 00:03:48,360
wirico co tomi' non ta ac caca na oro xucucun ma'.

63
00:03:48,360 --> 00:03:51,380
Ane tomi' pan ca Jeju ne:

64
00:03:51,380 --> 00:03:53,360
Co tomi' ma' ne,

65
00:03:53,360 --> 00:03:55,900
om paxi' na ca tomi' capa'.

66
00:03:55,900 --> 00:03:57,960
Tomi' pan nuhu'.

67
00:03:57,960 --> 00:04:00,640
Ma' ta howa hwe nuhu'.

68
00:04:00,640 --> 00:04:06,940
Maqui' pin na xec pain ca tomi' xun tococwa oro wari' co om howa nana ma',

69
00:04:06,940 --> 00:04:08,460
pain ca em' hwe,

70
00:04:08,460 --> 00:04:12,120
mama' jein cote ne xe ta xun tococwa ma'.

71
00:04:12,120 --> 00:04:17,800
Xin hwet pin ac tocwa tara Caxicon Jam co taramaxicon pe ho' nonon quem.

72
00:04:17,800 --> 00:04:21,440
An piri' ca' iri tatarapa' pain macan' ne,

73
00:04:21,440 --> 00:04:25,640
pain ca an piri' xat xim cacapa' pain pana ma',

74
00:04:25,640 --> 00:04:31,760
howa xine howa xine xam' ac toton tara oro wari' ta na ca tomi' ca ma'.

75
00:04:31,760 --> 00:04:34,320
Pain ca tomi' ac i ma' ca ma',

76
00:04:34,320 --> 00:04:37,620
pain ca an piri' xat tatarapa' pain pana ca ma',

77
00:04:37,620 --> 00:04:43,940
tomi' mi' nain ca mi' pin ta' nucun pain ca tatatain mi' xun cocon pain pana.

78
00:04:43,940 --> 00:04:46,640
Tomi' ac caca na oro wari':

79
00:04:46,640 --> 00:04:50,280
Ca' na ca tomi' capari' ca xirao' nucun Moisés:

80
00:04:50,280 --> 00:04:54,500
Om ta pi' ra ha' ne ca e' nucun Cristo ta na.

81
00:04:54,500 --> 00:04:57,160
Je ca tomi' querec urut pum ca':

82
00:04:57,160 --> 00:04:59,500
Para tomi' ac i ma' ma ma',

83
00:04:59,500 --> 00:05:06,380
pain ca na e' na pain ca an piri' xat tocwa pain pana co ma' co Iri' Wari' ma' quem?

84
00:05:06,380 --> 00:05:10,380
Ma' tara ca mi' pin ac ca co Iri' Wari' ma' quem?

85
00:05:10,380 --> 00:05:16,880
Cain' ca wari' ca co Iri' Wari' ma ma' quem na ca tomi' querec cocon ma'.

86
00:05:16,880 --> 00:05:18,880
Tomi' ac tococwa na:

87
00:05:18,880 --> 00:05:23,660
Pe ho' pe ho' wet paxi' inuhu' pain ca ac iri' naran ta' ca'.

88
00:05:23,660 --> 00:05:26,900
Ane om pe ho' cara xim xuhu' ne.

89
00:05:26,900 --> 00:05:32,980
Toha mi' xut pain xumuxut ta xine pain ca pe ho' pe ho' wet xuhu' ca'.

90
00:05:32,980 --> 00:05:36,140
Ma' ta taraju pa' hwe inuhu'.

91
00:05:36,140 --> 00:05:41,920
Ma' ta om ane ane hwet pa' cuhu' ca jitacat nein ta inuhu'.

92
00:05:41,920 --> 00:05:45,380
Wari' co xut nain ca jitacat nein ma',

93
00:05:45,380 --> 00:05:48,700
om ca taxi' cain ca mao ta' nucun.

94
00:05:48,700 --> 00:05:52,240
Howa xine pain ca ac iri' naran ta' ca',

95
00:05:52,240 --> 00:05:54,940
pain ca pe ho' pe ho' wet xuhu' ca'.

96
00:05:54,940 --> 00:06:01,880
Ma' ta an xiho' mahu' pain ca ac iri' naran ta' ca' quem inuhu' ta na ca tomi' tococwa ma'.

97
00:06:01,880 --> 00:06:04,720
Tomi' iri nain i ma' Jeju ne,

98
00:06:04,720 --> 00:06:06,320
mao ac ca na,

99
00:06:06,320 --> 00:06:10,000
pe ni ca' ac tococwa na oro wari'.