1
00:00:05,000 --> 00:00:09,540
Tomi' tomi' pi' pin iri naparut pain ca tomi' nucun ma' ne,

2
00:00:09,540 --> 00:00:11,400
noro pawin ac ca na,

3
00:00:11,400 --> 00:00:13,620
tomi' ac con na Cote ca.

4
00:00:13,620 --> 00:00:15,120
Te ac con na.

5
00:00:15,120 --> 00:00:19,280
Maqui' pin napa' xec nein ca mi' pin ta' ne ta.

6
00:00:19,280 --> 00:00:25,560
An hwet pe rain ca hwara' opa ne pain ca awi tamana ne pain ca Panxita' mapa' ca'.

7
00:00:25,560 --> 00:00:31,180
Ma' ta an hwet pe tain ca hwara' opa nem pain ca awi tamana nem quem.

8
00:00:31,180 --> 00:00:36,420
Xi mi' ara mapa' pain ca taramaxicon pe ho' toton oro wari' ta.

9
00:00:36,420 --> 00:00:43,380
Ma' ta mi' momon pain ca e' cara to ho' quequem oro wari' co mi' xim cwa' mapa' pane.

10
00:00:43,380 --> 00:00:46,360
Oro wari' co e' cara xi' nana ma',

11
00:00:46,360 --> 00:00:50,920
na e' na pain ca querec pin' quequem pain ca Iri' Jam iri'o' ma ma'.

12
00:00:50,920 --> 00:00:53,800
Om na win Iri' Jam ma ta teterem.

13
00:00:53,800 --> 00:00:56,020
Xica' pe ma ta teterem.

14
00:00:56,020 --> 00:01:01,060
Na e' na pain ca querec pin' cacapa' pain ca Jeju Cristo ta' ca' quem,

15
00:01:01,060 --> 00:01:05,300
pain ca hwet roron oro wari' pain macan' ta mapa' quem.

16
00:01:05,300 --> 00:01:11,140
An hwet mi' inonon pain ca hwara' opa nem pain ca awi tamana nem pain macan' ca'.

17
00:01:11,140 --> 00:01:16,720
Xi om ne ca ara ara pi' pin ara tain ca taramaja ne ca ara ra mapa' ta.

18
00:01:16,720 --> 00:01:20,180
In hwet ho' xim inem ta Te ac con na.

19
00:01:20,180 --> 00:01:22,100
In hwet iri xim ne,

20
00:01:22,100 --> 00:01:32,180
an hwet pe mami' ac main tara ca awi tamana ne pain ca Iri' Jam ne ca wara ma' napa' pain ca pe ho' pe ho' wet xim pain cara pane,

21
00:01:32,180 --> 00:01:35,680
pain ca om ma' querec ne macan' pane non.

22
00:01:35,680 --> 00:01:39,040
Oro wari' co tora' ma pain macan' ca',

23
00:01:39,040 --> 00:01:40,740
co mi' mapa' cwa',

24
00:01:40,740 --> 00:01:46,140
an hwet mi' inonon pain ca hwara' opa nem pain ca Iri' Jam nem ta ac con na.

25
00:01:46,140 --> 00:01:47,940
Wara wari' ne momon,

26
00:01:47,940 --> 00:01:50,100
mi' ac mapa' cocon na.

27
00:01:50,100 --> 00:01:52,760
Tomi' ha' nanain capijam quem.

28
00:01:52,760 --> 00:01:58,740
Aram aram taxi' pin nenem pain ca mi' pan mapa' pain oro ca ara ne,

29
00:01:58,740 --> 00:02:01,120
je pain oro ca tomi' ne ca'.

30
00:02:01,120 --> 00:02:05,640
Xi tomi' hwet ara toton pain ca tomi' hwet roron mapa' ta.

31
00:02:05,640 --> 00:02:07,360
Howa nanapa' quem.

32
00:02:07,360 --> 00:02:10,640
Taxi' pin nanapa' pain ca maqui' xim pane.

33
00:02:10,640 --> 00:02:15,380
Howa nenem pain ca hwet roron oro wari' ta pan mapa' quem.

34
00:02:15,380 --> 00:02:17,660
Tomi' mi' inem cocon.

35
00:02:17,660 --> 00:02:22,100
Om ca tomi' mi' xim cocon oro wari' co om howa nanapa' ma'.

36
00:02:22,100 --> 00:02:25,540
Tomi' mi' inem cocon co mi' mapa' cwa',

37
00:02:25,540 --> 00:02:28,240
xi wari' ne ara momon ta.

38
00:02:28,240 --> 00:02:30,940
Oro wari' co wari' ne ma ma',

39
00:02:30,940 --> 00:02:32,860
wari' ne inonon quem.

40
00:02:32,860 --> 00:02:35,300
Oro wari' co wari' ne ta' cwa',

41
00:02:35,300 --> 00:02:37,160
wari' ne momon quem.

42
00:02:37,160 --> 00:02:39,440
Oro wari' co mi' mapa' cwa',

43
00:02:39,440 --> 00:02:44,520
an hwet pe nanain ca hwara' opa ne pain ca awi tamana ne quem.

44
00:02:44,520 --> 00:02:47,760
Om ta pe mami' tain macan' ca' quem.

45
00:02:47,760 --> 00:02:50,040
In hwet ho' xim inem.

46
00:02:50,040 --> 00:02:53,240
Co taxipa' nanapa' cwa' iri nana ne,

47
00:02:53,240 --> 00:02:57,260
to wet pan tatarain macan' pa'ao' non.

48
00:02:57,260 --> 00:02:59,540
Awi tamana ma ta Te ac con na.

49
00:02:59,540 --> 00:03:02,760
Narain ho' roron pain ca om awi wa,

50
00:03:02,760 --> 00:03:06,040
mam' narain ho' roron pain ca hwara' opa nem ma',

51
00:03:06,040 --> 00:03:09,140
je ca hwara' opa nem ca mi' mapa' ca'.

52
00:03:09,140 --> 00:03:12,540
Narain ho' roron pain oro ca to' i'ina nonon,

53
00:03:12,540 --> 00:03:15,280
ma' ta xica' pe ne ximicocon.

54
00:03:15,280 --> 00:03:18,600
Win ne ca xica' pe ne ximixi' ca' quem.

55
00:03:18,600 --> 00:03:21,480
Pe ho' pe ho' wet iri inonon ne,

56
00:03:21,480 --> 00:03:25,580
narain ho' ac toton na pain oro ca om awi wa pane,

57
00:03:25,580 --> 00:03:30,240
mam' narain ho' inonon pain ca hwara' opa nem ca mi' mapa' pane.

58
00:03:30,240 --> 00:03:32,600
Querec wet xo' inonon.

59
00:03:32,600 --> 00:03:36,420
Om ca pan' ara'am camain' caca.

60
00:03:36,420 --> 00:03:42,260
Ma' xica' pe e' na co ma' co mao tarain cote ne xe ta ma pain cara pane,

61
00:03:42,260 --> 00:03:43,520
pan' am na co ma'.

62
00:03:43,520 --> 00:03:48,840
Ma' ta hwet pin ne ca xirao' pe xine pain capijam con pane ta non.

63
00:03:48,840 --> 00:03:51,740
Hwet ho' xim inem quem ac con na.

64
00:03:51,740 --> 00:03:55,740
Tomi' mi' inem cocon pain ca pe pe wet tain macan' ca'.

65
00:03:55,740 --> 00:03:59,180
Ma' ta tomi' querec te tamana caca inonon.

66
00:03:59,180 --> 00:04:02,580
Win ne ca tomi' querec te tamana ta' ca'.

67
00:04:02,580 --> 00:04:05,440
Tomi' hwet inonon pain capijam.

68
00:04:05,440 --> 00:04:09,240
Je ca noc cocon oro wari' co om howa nanapa' ma'.

69
00:04:09,240 --> 00:04:13,980
Xi win ma' ne pan tococwa pain ca wari' nein macan' caca ta.

70
00:04:13,980 --> 00:04:15,420
Win ta' ca',

71
00:04:15,420 --> 00:04:17,380
pain ca om win ma' ne toton ca' quem.

72
00:04:17,380 --> 00:04:22,900
Om ca tomi' xim pain ca cut ca' roron pain macan' ca' xim.

73
00:04:22,900 --> 00:04:28,500
Tomi' e' inem pain ca narain ho' roron con Caxicon Jam co caracat ta xim.

74
00:04:28,500 --> 00:04:32,940
Om ca win ma' ne cocon oro wari' co om howa nanapa'.

75
00:04:32,940 --> 00:04:34,320
Win ta' ca',

76
00:04:34,320 --> 00:04:37,340
pain ca om win ma' ne toton ca' quem.

77
00:04:37,340 --> 00:04:39,760
Capijam ca iri'o' ca',

78
00:04:39,760 --> 00:04:45,580
je tara ca mam' mi' momon pain ca win xumu quequem pain ca taramaja mi' quequem ma'.

79
00:04:45,580 --> 00:04:50,040
Hwet jujun oro wari' pain oro xijein macan' ca' inonon.

80
00:04:50,040 --> 00:04:51,920
Win mapa' pane,

81
00:04:51,920 --> 00:04:56,000
pain ca hwet roron oro wari' pain macan' ta mapa' pane.

82
00:04:56,000 --> 00:04:59,720
Win xumu inem pain ca taramaja mi' xim pane.

83
00:04:59,720 --> 00:05:05,840
Ma' ta quep xiho' toton pain ca win xumu quequem pain ca taramaja mi' quequem inonon.

84
00:05:05,840 --> 00:05:11,720
To' win xumu totoron ca hwara' opa nein capijam ca iri'o' ta non.

85
00:05:11,720 --> 00:05:16,220
Om ca tomi' mi' e' xim cocon co taxipa' ta' cwa' ac con na.

86
00:05:16,220 --> 00:05:24,780
Tomi' mi' inem cocon oro wari' co aram aram howa xim nanapa' pain ca taraju xin cacain ca pijim' nucucun quem.

87
00:05:24,780 --> 00:05:28,760
Mi' roron pain ca xica' pe ne ximicocon quem.

88
00:05:28,760 --> 00:05:33,300
Win ne ca xica' pe ne ximixi' pain ca win cwere xim ca',

89
00:05:33,300 --> 00:05:35,540
je pain ca win cwere mapa' quem.

90
00:05:35,540 --> 00:05:39,080
Mi' roron pain ca win cwere cacapari' quem.

91
00:05:39,080 --> 00:05:44,600
Ma' ta howa pin quequem oro wari' co om querec pin' nenem pain macan' ca'.

92
00:05:44,600 --> 00:05:48,100
Howa teterem pain ca tomi' mapa' pane,

93
00:05:48,100 --> 00:05:52,900
pain ca hwet roron oro wari' pain macan' ta mapa' pane quem.

94
00:05:52,900 --> 00:05:57,740
Mi' mapa' pain ca hwara' opa ne pain ca awi tamana ne pane,

95
00:05:57,740 --> 00:06:00,500
mi' tiquin' ac toton pain na quem.

96
00:06:00,500 --> 00:06:03,860
Ma' ta xica' pe ne ximicocon inonon.

97
00:06:03,860 --> 00:06:07,000
Win ne ca xica' pe ne ximixi' ca' quem.

98
00:06:07,000 --> 00:06:09,060
Win cwere inonon.

99
00:06:09,060 --> 00:06:11,080
Win cwere mapa' quem.

100
00:06:11,080 --> 00:06:14,020
Ma' ta xica' pe pin ne ximicocon.

101
00:06:14,020 --> 00:06:17,720
Ma' ta querec pin' quequem oro wari' co noc nenem ma',

102
00:06:17,720 --> 00:06:23,480
ma' ta querec pin' quequem pain ca hwet roron oro wari' pain macan' ta mapa' pane.

103
00:06:23,480 --> 00:06:27,560
Ma' ta querec pin' quequem pain ca om noc momon ma' quem.

104
00:06:27,560 --> 00:06:30,680
Win ne ca om noc mapa' quem non.

105
00:06:30,680 --> 00:06:34,940
Tomi' mi' inem cocon caram cwa' co mi' mapa' cwa' Te ac con na.

106
00:06:34,940 --> 00:06:40,400
Param inonon pain ca to ho' cacapa' pain ca pe ne quem.

107
00:06:40,400 --> 00:06:46,560
Ma' ta querec cacain ca hwara' opa ne pain ca awi tamana ne ca mi' mapa' ca'.

108
00:06:46,560 --> 00:06:53,600
Xi wara tomi' querec te ara mapa' pain ca om tomi' ma' pin querec xine macan' pane ta non.

109
00:06:53,600 --> 00:06:57,040
Wum co tama' ara xo' ta Te ac con na.

110
00:06:57,040 --> 00:07:01,240
Om ca querec pin' camain' quequem oro wari' co noc nenem.

111
00:07:01,240 --> 00:07:03,420
Ane querec pin' xim ne.

112
00:07:03,420 --> 00:07:07,320
Querec pin' nenem caram cwa' co mi' mapa' cwa' quem.

113
00:07:07,320 --> 00:07:12,220
Querec pin' nenem pain ca hwet roron oro wari' ta mapa' pane.

114
00:07:12,220 --> 00:07:17,300
Wara to' querec pin' inonon pain ca hwara' opa nem pain ca Iri' Jam nem.

115
00:07:17,300 --> 00:07:20,260
To' querec pin' cara toton pum quem.

116
00:07:20,260 --> 00:07:22,640
Ma' ta win cwere toton.

117
00:07:22,640 --> 00:07:24,840
Ma' ta om noc xucucun.

118
00:07:24,840 --> 00:07:27,380
Win ne ca om noc mapa' ma' quem.

119
00:07:27,380 --> 00:07:34,540
Ac i ma' na ca tomi' con Cote ca pain ca tomi' mi' caparut con pane.