MATYU
Jisas Krais lo peri heneruwe Matyu leseye ape
Jisas lo yaꞌariyei lo lu tewi werese.
1
Ane, iyape ano Matyu, peri ape ne Jisas lo yaꞌariyei lo lu tewi werese au lesesiya. Jisas Krais lo yaꞌariyei sitewi aiwawe aꞌi Devit. Devit lo yaꞌariyei sitewi aiwawe aꞌi Abraham.a2 Abraham lo meni eime Aisak.
Aisak lo meni eime Jekop.
Jekop lo meni eime Juda. Jekop eimane tomu neꞌese iroteye.
3 Juda lo tani, iyape Tamar, eimane hesi auteiye. Lowesi iyape Peres, sosu Sera.
Peres lo meni eime Hesron.
Hesron lo meni eime Ram. Stt 38:29-30; Rut 4:18-22
4 Ram lo meni eime Aminadap.
Aminadap lo meni eime Nason.
Nason lo meni eime Salmon.
5 Salmon lo meni eime Boas.
Boas lo mai Rahap. Boas menitani Rut naituwe. Sosu Rut meni eime Obet auteiye.
Obet lo meni eime Jesi. Rut 4:13-17
6 Jesi lo meni eime Devit.
Devit pani Israel lo meni owane tutawe henerai. Menitani ape meni eime Solomon auteiye. Menitani ape ne tu meni Uria lai naituwe. 2 Sml 12:24
7 Sosu Solomon lo meni eime Rehoboam.
Sosu Rehoboam lo meni eime Abiya.
Sosu Abiya lo meni eime Asa. 1 Sto 3:10-16
8 Sosu Asa lo meni eime Jehosafat.
Jehosafat lo meni eime Johoram.
Sosu Johoram lo meni eime Usia.
9 Usia lo meni eime Jotam.
Sosu Jotam lo meni eime Ahas.
Sosu Ahas lo meni eime Hesekia.
10 Sosu Hesekia lo meni eime Manase.
Sosu Manase lo meni eime Emon.
Sosu Emon lo meni eime Josaia.
11 Sosu Josaia lai Jekonia, sosu nairipi werese lo aite. Nowe ape se ai lu tamo lai lowe Juda lo lu tewi werese omo pani Babilon maꞌe wiyawi yahowaꞌi taꞌaneyei ne heneti. 2 Kin 24:14-15; 2 Sto 36:10
12 Sosu lowe omo Babilon maꞌe heneti.
Jekonia lo Tani meni eime Sealtiel auteiye.
Sosu Sealtiel lo meni eime Serubabel. Esr 3:2
13 Sosu Serubabel lo meni eime Abiut.
Sosu Abiut lo meni eime Eliakim.
Sosu Eliakim lo meni eime Asor.
14 Sosu Asor lo meni eime Sadok.
Sosu Sadok lo meni eime Akim.
Sosu Akim lo meni eime Eliut.
15 Sosu Eliut lo meni eime Eleasar.
Sosu Eleasar lo meni eime Matan.
Sosu Matan lo meni eime Jekop.
16 Sosu Jekop lo meni eime Josep. Sosu Josep lai menitani ta iyape Maria naituwe. Maria meni eime Jisas auteiye. Owane Sitewi lai tu naifa weriyei weriyei meni eime Jisas lu taune werese ne si tame ete hene aniyei ne ariariyeye. Serai meni ape Krais henerai.
17 Sosu aꞌi pe Abraham lo lu tewi werese i tepaꞌasiye su, meni owane tutawe Devit henerai. Lu tewi werese ereti feni hesi, lowe hesiyo hesiyo (14) iroteye. Sosu aiwawe aꞌi Devit lo lu tewi ereti werese i tepaꞌasiye su, omo pani Babilon maꞌe wiyawi yahowaꞌi aꞌi henetiyei ape, henerai. Lu tewi ereti feni hesi, lowe hesiyo hesiyo (14) iroteye. Sosu lu tewi kalabus sahe iroteye ape, lu tewi werese i tepaꞌasiye su, Krais maꞌe henerai. Lu tewi werese ereti feni hesi, lowe hesiyo hesiyo (14) iroteye.b
Menitani, Maria, Jisas Krais auteiye.
18 Nowe ape se Maria meni eime Jisas auteiye. Peri ape apou teꞌeteye. Meni ape Josep lai menitani Maria naituwei ne ariariyeye. Maria meni Josep maꞌe fai taꞌama. Menitani watiꞌare ape farere aꞌi iroteye. Ahowa, lowesi wesi tereꞌe tereꞌe sahe howeiteye. Nowe ape se Owane Sitewi lo Hepene Waraꞌi aꞌi lai menitani Maria maꞌe eine tahe se au irowe. Serene Maria tahe se henerai.c 19 Sosu Josep Maria eine tahe se wanuwe su, le marepi erasi aꞌi toteye. Le lu taune werese lo nihe se menitani lo eine tahe se ne au teꞌe areiyerowata. Le meni aseyaro aꞌi ne. Le tani lo au neritaseye wou taꞌame. Serene le menitani lo tai mai maꞌe eresene aꞌi se si tame eimawesawiyei ne toteye. 20 Le marepi ape toteye su, Owane Sitewi lai ipari wisere aꞌi lo Josep maꞌe eimawe arosai. Sosu Josep nihe howeiteye su, Owane Sitewi lo ipari wisere aꞌi (ensel) lai Josep maꞌe suwou se au teꞌeye. Le Josep maꞌe apou teꞌeye, “Josep Devit lo lu tewi, Wanure! Ne menitani watiꞌare, Maria, naituwei ne owe ape atoweiyere. Owane Sitewi lo Hepene Waraꞌi aꞌi lai Maria eine tahe se au irowe. 21 Nowe meꞌiye su, le meni eime auteiyei. Ne iyape lo Jisas au paporowa. Owane Sitewi lai meni eime ape lu taune werese lo yo seni luwaru aꞌi au sasariyei ne ariariyeye. Serai le lu taune werese si tame ete hene anirowa.”d
22 Owane Sitewi lo ipari wisere aꞌi (ensel) Josep maꞌe suwou se henerai su, Owane Sitewi lai peri ta lo au teꞌe siye meni lo ahi leseye ape, wiyeme aꞌi henerai. Tu naifa Owane Sitewi lo peri au teꞌe siye meni apou leseye.
23 “Wanure! Menitani watiꞌare ta, meni ta se howei taꞌame ape, eime tahe se henerairowa. Le meꞌiye su meni eime ta auteirowa. Lowe iyape paporowa, ‘Emanuel.’
Iyape ape lo sitewi apou aꞌi ‘Owane Sitewi nomo mase ironamirowa.’” Ais 7:14
24 Sosu Josep Owane Sitewi lo ipari wisere aꞌi (ensel) lo peri wanuwe su, le nihe howei sineyewe, Owane Sitewi lo peri werese umasiteye. Le menitani Maria naituwe. 25 Sosu Josep lai menitani Maria wesi lo henetaiyewe, lowesi ironamiteye. Le tani lo mase howeiye taꞌama. Ahowa, Maria meni eime auteiye su, le tani lo mase howeinamiteye. Serai Josep meni eime ape au papowe, Jisas.e