Awei lo lu tamo meni eime Jisas siyenari.
2
1-2 Nowe ape se awei meni owane erasi aꞌi iyape Herot, pani tewi Judia au noweinoweiteye. Sosu Maria lai Owane Sitewi lo meni eime omo Betlehem sahe auteiye. Meni eime auteiye su, eiwariyemi erasi yaru poweiye itori siye maꞌe teiteye. Sosu awei lo marepi soꞌoruwe wisere aꞌi siye lu tamo, omo pani poweiye wirai ape, maꞌe fai. Lowe eiwariyemi erasi ape siyeye. Lowe apou aꞌi toteye. “Meni Owane erasi aꞌi henerai tepaꞌasiye.” Serai lowe pani tewi lowe lo arunatiyewe, eiwariyemi erasi ape siye umasiti. Sosu omo Jerusalem maꞌe henerai. Omo Jerusalem maꞌe henerai su, lowe apou teꞌe toweriye, “Meni eime ape ate Juda lo meni owane tutawe ne, eiwerou maꞌe irosiya awere? Nomo eiwariyemi lo ape poweiye yaru itori siye maꞌe siyeyewe, serene nomo meni eime ne au teꞌe wisereyeyei ne fai.”a 3 Meni owane Herot peri ape wanuwe su, marepi lo erasi aꞌi auseriyeye. Sosu lu taune werese, omo Jerusalem sahe iroteye ape, aiwawe aꞌi meni eime maꞌe marepi luwaru erasi aꞌi totenamiteye. 4 Sosu aꞌi pe awei meni owane tutawe Herot lai Owane Sitewi lo wesi lu owane, Owane Sitewi lo peri soꞌoruwe siye lu tamo ei taꞌuwe aniye. Lowe taꞌuwerai su, le lowe maꞌe ei toweriye, “Meni ape Krais piye omo maꞌe henerairowa awere?” 5 Sosu lowe le maꞌe itiyaꞌu eiye, “Krais nomo lo omo Betlehem pani tewi Judia sahe henerairowa. Owane Sitewi lo peri au teꞌe siye meni apou leseye,6 ‘Fene lu taune werese omo Betlehem pani tewi Judia sahe irosiya. Omo Betlehem fene iyape erasi irosiya.
Fene omo tomu neꞌese fene maꞌe hi ani ararowe. Wanure! Meni ta, meni owane tutawe fene maꞌe aiyerowa ape, henerairowa su, le Israel lo lu taune werese au noweinoweirowa.’” Mai 5:2
7 Sosu meni owane lai awei lo marepi wisere aꞌi siye lu maꞌe eiwariyemi moꞌo fai ape, eresene aꞌi ei taꞌuwe aniye. Sosu le lowe maꞌe ei toweriye, “Eiwerou su eiwariyemi erasi aꞌi siyeye awere?” Lowe itiyaꞌu eiye, “Tu naifa nomo eiwariyemi erasi aꞌi ape siyeye.” 8 Sosu le lowe omo Betlehem maꞌe eimawesawi. Sosu le lowe maꞌe eiye, “Fene meni eime ape nehi etire. Fene meni eime ape siyeyei su, peri heneruwe ape ane maꞌe au teꞌesaire. Serai ane aiwawe aꞌi meni eime ape au teꞌe wisereyeyei.
9-10 Sosu lowe meni owane lo peri wanuwe su, lowe omo
Jerusalem arunatiyewe fi. Lowe fi su, eiwariyemi erasi aꞌi lowe tu siyeteye ape, tame siyeye. Lowe siyeye su, lowe marepi wisere aꞌi teriteye. Eiwariyemi ape meni eime yaru hire maꞌe teiteye.”
11 Sosu lowe wesi papu wiye su, lowe meni eime oso, mai lo, Maria, mase iroteye ape siyeye. Sosu lowe apeꞌi onuwe su, lowe meni eime maꞌe etiri tamo neri aꞌi auwe. Etiri neriyaꞌi aꞌi ape apou aꞌi ne, maꞌaru gol tamo, saꞌi heneri wisere aꞌi tamo, sosu tuwai wisere aꞌi tamo le maꞌe auwe.b 12 Sosu Owane Sitewi lai lowe maꞌe suwou se au teꞌeye. Apou au teꞌeye, “Fene pani tewi fene lo maꞌe yo tereꞌe se si tame ire. Meni owane ape aweraꞌiyenatire!” Sosu lowe omo Betlehem arunatiyewe, yo tereꞌe se si tame fi.
13 Sosu aꞌi pe meni owane Herot lai meni eime oso aꞌi ape aine teraꞌeyei ne toteye. Serene Owane Sitewi lai ipari wisere aꞌi (ensel) lo ta meni Josep maꞌe eimawe arosai. Le Josep maꞌe suwou se apou au teꞌeye, “Josep, Ne sinere! Tani no, meni eime oso aꞌi aiwawe aꞌi pani tewi Isip maꞌe hene iterotire. Fene pani tewi ape saro ahe irote. Nowe meꞌiye su, etiri faraꞌu aꞌi heneraiyei su, ane si tame itoraiyei fene maꞌe au teꞌesairowa. Sosu fene pani tewi Judia maꞌe faraꞌu si tame aiyerowa.”
14 Sosu nowe pasi aꞌi se le meni eime mai lo aiwawe aꞌi pani tewi Isip maꞌe hene iteroti. 15 Tu naifa weriyei Owane Sitewi lo peri au teꞌe areiyeyei siye meni apou leseye,
“Ane meni eime ano pani tewi Isip maꞌe si ei aniyei.” Hos 11:1
Sosu Josep, Maria, meni eime oso lowesi lo, lowe pani tewi Isip sahe iroteye. Nowe meꞌiye su meni Owane Herot temeniyeye su, lowe pani tewi Judia si tame fai. Sosu lowe pani tewi Isip arunatiyewe, pani tewi Judia maꞌe si tame fi su, Owane Sitewi lo peri ape, Owane Sitewi lo peri au teꞌe siye meni au teꞌeye ape, wiyeme aꞌi henerai.
Herot mitaru eimane oso omo Betlehem sahe aine teraꞌeteye.
16 Sosu aꞌi pe awei lo marepi wisere aꞌi siye lu ape, Jisas maꞌe au teꞌe wisereyeye ape, lowe meni owane Herot aweraꞌiyenati. Sosu Herot lu ape le ne areareye ape, wanuwe su, le ai marepi erasi aꞌi toteye. Le apou toteye, “Marepi wisere aꞌi siye lu, lowe eiwariyemi erasi tu iyu menei hesi aꞌi siyeteye. Serai mitaru eimane oso aꞌi ape mo iyu menei hesi aꞌi irosiya.” Le ai atu siye lu tamo omo Betlehem maꞌe lu wenei eimane oso werese aine teraꞌeyei ne eimawesawi. Le lowe maꞌe eiye, “Fene omo Betlehem, omo tereꞌe tereꞌe atahe aꞌi sahe lu wenei mitaru eimane oso iyu menei hesi aꞌi irosiya ape, sosu mitaru eimane heꞌi aꞌi auteiye ape mo, aiwawe aꞌi aine teraꞌere.”
17 Tu naifa weriyei Owane Sitewi lo au teꞌe siye meni tereꞌe iyape Jeremaia apou leseye,
18 “Peri ahi ta omo Rama sahe wanuwe. Mai tomu neꞌese luwei erasi irowei. Resel lo lu tewi eimane lo ne urunoruwei erasi iroteye. Lu taune tamo le ne marepi fetane aꞌi au irowei ne toteyei su, ahowa. Le urunoruwei erasi aꞌi ironamiteyei. Piyene awere? Eimane werese lowe lo temeniyeye.” Jer 31:15
19 Nowe meꞌiye su, meni owane Herot temeniyeye. Sosu Owane Sitewi lo ipari wisere aꞌi Josep maꞌe suwou se au teꞌeye. Le apou teꞌeye, 20 “Josep, ne sinere! Meni eime no tani no aiwawe aꞌi omo pani tewi
Israel maꞌe si tame henetire. Meni owane Herot meni eime ape aine teraꞌeyei ne toteye ape, temeniye tepaꞌasiye.” 21 Sosu Josep, meni eime lo, mai mase omo pani Israel maꞌe si tame heneti.
22 Herot temeniyeye su, meni eime lo iyape Arkelaus, Herot lo yaru aniyewe, awei meni owane tutawe henerai. Le meni luwaru aꞌi ne. Sosu Josep peri heneruwe ape wanuwe su, le atoweiye marepi tote henerai. Serai Owane Sitewi Josep maꞌe suwou se apou au teꞌeye. Fene pani tewi Judia aweraꞌiyenatire. Pani tewi Galili maꞌe henetire. 23 Lowe pani tewi Galili maꞌe henerai su, lowe omo Nasaret sahe iroteye. Tu naifa weriyei Owane Sitewi lo au teꞌe siye meni ta apou leseye, “Lowe le ne apou teꞌeyei, ‘Le omo Nasaret lo meni pefine aꞌi ne’.” Serai Owane Sitewi lo peri ape pefine wiyeme aꞌi henerai.c