Sepei luwaru aꞌi Satan Jisas areareyei ne toteye.
4
Sosu aꞌi pe Jisas Saꞌi Mai Jordan arunatiyewe, Owane Sitewi lo Hepene Waraꞌi aꞌi omo pani tewi ariye aꞌi maꞌe heneti. Saro ahe sepei Satan luwaru aꞌi Jisas areareyei ne toteye.a 2 Omo pani tewi ariye aꞌi sahe, le mi pasi lu hesi lo ereti lowe werese ironamiteye. Le ayei werese a taꞌame. Serene Jisas lau erasi aꞌi iroteye.b 3 Sosu sepei Satan luwaru aꞌi Jisas maꞌe henerai apou eiye, “Ne Owane Sitewi lo meni eime taꞌame. Ne Owane Sitewi lo meni eime su, ne faraꞌu tapiye eite maꞌe au teꞌere, ‘Tapiye, nau taꞌase wou heneraire.’” 4 Sosu Jisas le maꞌe itiyaꞌu eiye, “Owane Sitewi lo peri one towe sahe apou leseye,‘Lu taune werese nau taꞌase aꞌi ene ateyei su, lowe marepi hepene se mi mi pasi pasi irorowata. Ahowa, lu taune hepene se mi mi pasi pasi ironamitereme su, lowe Owane Sitewi lo peri werese fa wanu umasite.’” Lo 8:3
5 Sosu sepei luwaru aꞌi Satan Jisas maꞌe eiye, “Notosi omo
Jerusalem maꞌe wiyei.” Sosu le Jisas Owane Sitewi lo wesi meꞌiye maꞌe hene teiteye. 6 Le Jisas maꞌe eiye,
“Ne Owane Sitewi lo meni eime taꞌame! Ne Owane Sitewi lo meni eime su, ne faraꞌu wesi meꞌiye hi awei maꞌe yeꞌi arore. Ne hi maꞌe yeꞌi arowei su, Owane Sitewi lo peri one towe sahe apou leseye, ‘Owane Sitewi lai le ne ipari wisere tomu neꞌese lo au noweinoweiyei ne eimawe arosaiyei. Lowe le ne ereti lowe lo se au noweinowei kairefiyeyei. Serai le tapiye sahe lowe lo ninapune winetairowata.’ Serai ne hi maꞌe yeꞌi arore. Ne fofowei erasi teriterowata.” Sng 91:11-12
7 Sosu Jisas le maꞌe itiyaꞌu eiye, “Wanure! Owane Sitewi lo peri tereꞌe one towe sahe apou leseye,
‘Ne Owane Sitewi Meni Owane Pefine aꞌi maꞌe owe ape arearete.’” Lo 6:16
8 Sosu sepei luwaru aꞌi Satan Jisas maꞌe eiye, “Notosi omo erasi hire maꞌe yaneyei.” Le Jisas maꞌe eiye, “Ne omo pani werese werese siyere! Omo pani werese ape mo ano ne. 9 Ne ane maꞌe lowe uporo apeꞌi onurowawe, sosu ane maꞌe au teꞌe wisereyeyei su, ane omo pani werese ano ne maꞌe auwei. Omo pani werese wisere aꞌi ne!” 10 Sosu Jisas le maꞌe itiyaꞌu eiye, “Satan, Ne ire! Ane marepi no umasirowata. Owane Sitewi lo peri one towe sahe apou leseye,
‘Ne Owane Sitewi Meni Owane Pefine aꞌi no ne au teꞌe wisereyete. Ne le ne aꞌi wiyawi au irote.’” Lo 6:13
11 Sosu sepei luwaru aꞌi Satan le arunatiyewe, fi. Owane Sitewi lo ipari wisere aꞌi le maꞌe au pati ani kairefiyeyei ne itorai.
Jisas lai wiyawi tutawe erasi aꞌi irowe.
12 Sosu aꞌi pe lu tamo apou eiye, “Jon saꞌi au hu siye meni, lowe le kalabus wesi maꞌe heneti.” Sosu Jisas peri ape wanuwe su, le pani tewi Galili maꞌe si tame fi.c 13 Le omo Nasaret arunatiyewe, omo Kaperneam sahe iroteye. Omo Kaperneam, pani tewi Sebulun, sosu pani tewi Naptali atahe aꞌi iroteye. Omo ape hare ite tewiye sahe iroteye. 14 Tu naifa weriyei Owane Sitewi lo peri au teꞌe siye meni, Aisaia, peri ta leseye, Peri ape wiyeme aꞌi henerai tepaꞌasiye. Le apou eiye,
15 “Lu taune pani tewi Sebulun sahe iroteye ape, lu taune pani tewi Naptali sahe iroteye ape, lu taune hare ite tewiye sahe iroteye ape, lu taune Saꞌi Mai Jordan feni eire maꞌe iroteye ape, lu tewi tereꞌe Moses lo yo peri umasi taꞌame ape, lowe omo pani tewi Galili sahe iroteye ape. Ais 9:1-2
16 Lu taune werese ape mo yo pasi aꞌi wou ironamiteye. Nowe meꞌiye su, lowe mi erasi wou siyeye. Lu taune ape mo yo pasi aꞌi ironamiteye su, lowe hepene lowe lo temeniyeye. Lowe mi erasi siyeye su, hepene lowe lo si tame sineteye.”
17 Nowe ape se Jisas lai nowe tutawe peri lo lu taune maꞌe au teꞌe fiyari areiyeteye. Le apou au teꞌeteye, “Fene werese yo seni luwaru aꞌi meꞌiyeni maꞌe atati arunatite. Piyene awere? Nowe ape se Owane Sitewi lai, lu taune lo yo seni werese au hese ereirowa ape, ataheye heneraiwa.”d
Jisas lu feni pefine aꞌi lo ei aniye.
18 Sosu aꞌi pe Jisas hare ite Galili tewiye sahe iteye su, le lu nairi hesi aꞌi siyeye. Lowesi lo iyape Saimon iyape tereꞌe, Pita, sosu paꞌise lo Andru. Lowesi hare honaiye saꞌi papu fu arosawiteye. Wiyawi lowesi lo hare ani siye lu ne. 19 Sosu le lowesi maꞌe eiye, “Fenesi ane moꞌo umasire. Serai ane fenesi lu taune Owane Sitewi maꞌe hene aniyei lo yo atuaturowa.” 20 Sosu lowesi pereye aꞌi hare honaiye awei sahe fu arowewe, Jisas moꞌo umasiti.
21 Sosu le lu nairi hesi aiwawe iteye. Le lu nairi tereꞌe hesi aꞌi siyeye. Lowesi lo tai iyape Sebedi. Lowesi lo iyape Jems, sosu paꞌise Jon. Lowesi tai mase wai erasi papu hare honaiye lo yo iwisiteye. Jisas lowesi ei aniye. 22 Sosu lowesi pereye aꞌi tai lowesi lo wai sahe arunatiyewe, Jisas moꞌo umasiti.
Jisas peri lo lu taune tomu neꞌese au teꞌe fiyariye.
23 Sosu aꞌi pe Jisas omo pani tewi Galili sahe iteye. Le Owane Sitewi lo peri taꞌuwe wesi sahe au teꞌe fiyariteye. Le Owane Sitewi lo peri heneruwe wisere aꞌi au teꞌe fiyariye. Le apou au teꞌeye, “Nowe ape se Owane Sitewi lu taune lo yo seni au hese ereirowa ape ataheye henerairowa.” Le lu taune lo u tahe apou ape mo au taꞌane faraꞌuweye.e 24 Lu taune Jisas lo wiyawi siyeye su, lowe peri heneruwe lo ne omo pani tewi Siria maꞌe au teꞌe fiyariteye. Serai lowe Jisas maꞌe lu taune tomu neꞌese u tahe se henetai. Lowe lu taune u tahe apou ape se, sepei luwaru aꞌi se, tahe auseriyeyei se, ereti lowe haroharo aꞌi se, serai Jisas lowe werese au taꞌane faraꞌuweye.f 25 Lu taune tomu neꞌese Jisas moꞌo umasiteye. Lowe omo pani tewi Galili omo pani tewi Dekapolis, omo Jerusalem, omo pani tewi Judia, sosu pani tewi feni maꞌe Saꞌi Mai Jordan maꞌe moꞌo umasiteye.g