Sosu aꞌi pe Jisas lu taune tomu neꞌese le maꞌe moꞌo umasiteye ape, siyeyei su, le omo hire maꞌe yaneye. Sosu le omo hire sahe onuwe su, lu disaipel lo le maꞌe ei taꞌuwerai. 2 Sosu le lowe maꞌe Owane Sitewi lo peri apou au teꞌe atuatuteye.

Meni ta meni tereꞌe aine teraꞌeyei su, awei lo meni owane lai meni ape etirowa. 22 Ahowa, ane fene maꞌe apou au teꞌesiya. Lu taune ta meni tereꞌe maꞌe ai marepi toteyei su, awei lo meni owane lai le etiyei. Aiwawe aꞌi meni ta meni tereꞌe maꞌe apou eiyei su, ‘Ne ipo meni luwaru poto aꞌi ne.’ Awei lo meni owane tutawe lai le etiyei. Sosu aiwawe aꞌi, meni ta meni tereꞌe maꞌe apou eiyei su, ‘Ne meni meremereye aꞌi ne.’ Meni ape weiyai! Le maꞌe atahe aꞌi irowa.^j 23-24 Nowe ta se fene Owane Sitewi maꞌe etiri neri aꞌi ta aitaiyei ne toteyei su, fene tu marepi fene lo au hese eti ereire! Fene meni tereꞌe ne ai marepi toteye su, fene etiri neri aꞌi fene lo arunatirowawe, meni ape maꞌe ai marepi ape si tame au fareraiyeyei ne ire. Fene ai marepi fene lo ape au fareraiyeyei su, fene faraꞌu etiri neri aꞌi ape Owane Sitewi maꞌe aure!^k 25 Meni ta fene maꞌe apou eiyei su, ‘Ne ane maꞌe au luwaruweye. Serai ne ane maꞌe maꞌaru tamo itiyaꞌu fu aure.’ Ne le mase yo sahe iteye su, ne yo seni luwaru aꞌi ape witane aꞌi se au fareraiyere. Ne yo seni luwaru aꞌi ape au fareraiyeyei taꞌama su, le fene meni owane ta maꞌe au hese ereiyei ne henetiyei. Le au hese erei tepaꞌasiyei su, le fene ai lu tamo maꞌe henetirowawe, fene kalabus wesi maꞌe eimawesawiyei. 26 Peri ano wiyeme aꞌi ne. Ane fene maꞌe au teꞌe areiyesiya. Ne kalabus wesi sato mi mi weriyei ironamitorowa. Fene maꞌaru werese werese si itiyaꞌu ete fetaneyere. Fene orese aꞌi ape ete fetaneyeyei su, fene kalabus wesi maꞌe henerairowa.”

Fene peri ape mi mi weriyei wanu tepaꞌasiye. 28 Ahowa, ane fene maꞌe au teꞌe areiyesiya. Fene menitani ta nihe se siye wisereyeyei su, serai fene menitani ape maꞌe tafaꞌe yo sene luwaru aꞌi irowei ne toteyei su, fene Moses lo yo peri marepi fene lo sahe arisiye. 29 Aiwawe aꞌi fene nihe se menitani ta tafaꞌe yo seni luwaru aꞌi siye wisereyeyei su, fene nihe fene lo ani tahe ani fusawire. Fene Owane Sitewi lo omo hire maꞌe wiyei su, fene nihe taꞌi se aꞌi wirowa. Etiri ape wisere aꞌi ne. Nihe fene lo yo seni luwaru aꞌi au irowei ape, ironamiteyei su, fene maꞌe irowa. Etiri ape luwaru aꞌi ne.^l 30 Aiwawe aꞌi fene ereti fene lo se seni luwaru aꞌi irowei su, fene ereti ape aine to fusawire. Fene Owane Sitewi lo omo hire maꞌe wiyei su, fene ereti taꞌi se aꞌi wirowa. Etiri ape wisere aꞌi ne. Ereti fene lo yo seni luwaru au irowei ape ironamiteye su, fene yehe omo maꞌe irowa. Etiri ape luwaru aꞌi ne.^m

One towe ape apou teꞌeyei, ‘Ane, menitani ape lo meni, ane lai tani ano si omo lo maꞌe eimawesawi.’ⁿ 32 Ahowa, ane fene maꞌe teꞌe areiyesiya. Meni ta tani lo yahowaꞌi aꞌi si omo lo maꞌe eimawesawiyei su, meni ape yo seni luwaru aꞌi irowei. Menitani ape meni tereꞌe naitu ene ayei su, menitani ape tafaꞌe yo seni luwaru aꞌi irowei. Meni tereꞌe ta menitani ape naituwei su, meni ape aiwawe aꞌi tafaꞌe yo seni luwaru aꞌi irowei. Tani fene lo lai meni tereꞌe tafaꞌe yo sene luwaru aꞌi irowei su, fene tani fene lo faraꞌu si omo lo maꞌe eimawesawire.”^o

34 Ahowa, ane fene maꞌe au teꞌe areiyesiya. Fene peri wiyeme aꞌi owe ape teꞌe naneite. Fene peri wiyeme aꞌi apou au teꞌe naneiyei su, ‘Niꞌarawe hire ape peri wiyeme aꞌi ano ne au kairefiyeyei.’ Fene peri eito eite owe ape teꞌe naneite. Piyene awere? Niꞌarawe hire werese ape sahe Owane Sitewi lai onunamisiya.^p 35 Aiwawe aꞌi fene peri ta owe ape teꞌe naneite. ‘Ane peri wiyeme aꞌi ta awei lo kairefi se au teꞌe naneisiya.’ Ahowa, fene peri apou owe ape teꞌe naneite. Piyene awere? Awei werese sahe Owane Sitewi Pefine aꞌi lai lowe lo hesi fa aro ato fetaneyenamisiya. Aiwawe aꞌi fene peri ta owe ape teꞌe naneite, ‘Ane peri wiyeme aꞌi ta omo Jerusalem lo kairefiyeyei se au teꞌe naneisiya.’ Ahowa, fene peri apou owe ape teꞌe naneite. Piyene awere? Omo Jerusalem sahe meni owane tutawe Owane Sitewi lai onunamisiya.^q 36 Aiwawe aꞌi fene mato fene lo se peri wiyeme aꞌi ta owe ape teꞌe naneite! Piyene awere? Fene faraꞌu mato towe fene lo wapo aꞌi heneraiyei ne irowei awere? Fene mato towe wapo aꞌi irowei su, fene faraꞌu mato towe fene lo iwise aꞌi heneraiyei ne irowei awere? Ahowa! Fene wiyawi eito eite au irorowata. Serai fene mato fene lo se peri wiyeme aꞌi ta owe ape teꞌe naneite. 37 Ahowa, fene peri ta apou toteyei su, ‘Nomo wiyawi ape irowei.’ Sosu fene apou fu eire, ‘Ei! Nomo wiyawi ape au irorowa!’ Aiwawe aꞌi fene peri ta apou toteyei su, ‘Nomo wiyawi ape irowei taꞌama.’ Sosu fene apou fu eire, ‘Nomo wiyawi ape irorowata.’ Fene peri wiyeme aꞌi ta au teꞌe naneiyei su, sosu moꞌo fene peri wiyeme aꞌi ape arisiyei. Yo seni fene lo sepei luwaru aꞌi Satan lo marepi maꞌe fai.”

Fene peri ape mi mi weriyei wanunamiteye. 39 Ahowa, ane fene maꞌe peri heꞌi aꞌi au teꞌe areiyesiya. Meni ta ahi si maꞌe ereti se aineyei su, fene le itiyaꞌu owe ape ainere. Ahowa, meni ta ahi si fene lo aineyei su, fene nihari feni fene lo atati tei awetore! Serai le faraꞌu ahi si feni maꞌe ereti se aineyei. 40 Sosu meni ta fene etiyei su, sosu peri etiyei siye meni owane fene maꞌe apou eiyei, ‘Ne meni ape maꞌe ipari tahe fene lo itiyaꞌu fa aure. Ei fene ipari tahe siot itiyaꞌu fu aure. Aiwawe aꞌi fene ipari tahe trauses le maꞌe aure.’ 41 Sosu meni owane ta fene maꞌe peri kairefi aꞌi apou eiyei su, ‘Ne etiri ano yo mai tewi oso eyeri maꞌe sutaitetire.’ Ei, fene pani eyeri tewi oso etiri lo fa sutaitetire. Ahowa, fene pani eyeri tewi erasi faraꞌu sutaitetire. 42 Sosu meni ta fene maꞌe etiri ta ne ei toweriyei su, fene etiri ape le maꞌe fu aure! Meni ta fene maꞌe etiri neri aꞌi fa au ne ei toweriyei su, fene le maꞌe etiri neri aꞌi fa aure!”

44 Ahowa, ane peri heꞌi aꞌi fene maꞌe au teꞌe areiyesiya. Fene airame fene lo marepi erasi aꞌi tote wawesiyenamisiya. Aiwawe lu tamo fene maꞌe au luwaruweyei su, fene lowe ne Owane Sitewi maꞌe au teꞌe towerite.^r 45 Piyene awere? Fene lowe ne Owane Sitewi maꞌe au teꞌe toweriyei su, lowe fene ne apou toteyei, ‘Lu ape mo lowe Owane Sitewi maꞌe fai.’ Owane Sitewi ape lai hire maꞌe ironamisiya ape, le poweiye ne, saꞌi ne apou teꞌesiya awere? ‘Ane lu taune aseyaro aꞌi maꞌe poweiye, saꞌi au ei ito arosairowa.’ Ahowa, Owane Sitewi lai poweiye saꞌi lu taune werese werese aꞌi maꞌe au ei ito arosairowa. Serai fene Owane Sitewi lo marepi aiwawe aꞌi fu totete. 46 Lu taune fene ne marepi erasi aꞌi tote wawesiyenamisiya ape, fene marepi lowe ne erasi aꞌi itiyaꞌu tote wawesiyenamiyei su, yo seni eito eite fene irowei ape, fene ne eiwerou irowei awere? Takis maꞌaru ani siye lu, lowe lu tewi towafi lowe lo, lowe ne aiwawe aꞌi marepi erasi aꞌi tote wawesiyenamisiya. Lowe takis maꞌaru fene lo yahowaꞌi taꞌarei aniteye. Lowe lu luwaru aꞌi tene! Serai fene yo seni eito eite irowei su, Owane Sitewi fene maꞌe etiri wisere aꞌi aurowa awere? Ahowa. 47 Sosu fene lu tewi fene lo aꞌi maꞌe none isafiyeyei su, fene wiyawi erasi aꞌi iro taꞌame. Ahowa, lu taune werese Owane Sitewi lo peri umasi taꞌame ape, yo seni eito eite aiwawe aꞌi lu tewi lowe lo maꞌe none isafiyenamisiya. 48 Serai fene marepi eito eite owe ape totete! Ahowa, tai fene lo hire maꞌe ironamisiya ape, marepi lo aseyaro aꞌi totenamisiya. Serai fene marepi waraꞌi lo fu umasinamite.”^s