Lu taune etiri maꞌaru ariye aꞌi ne, fene etiri maꞌaru fene lo au nonete.
6
Fene weiyai! Ane fene maꞌe au teꞌe areiyesiya. Fene lu taune tamo, maꞌe au ferafereiyei su, fene marepi apou owe ape totete, ‘Ane lu tamo au ferafereiyei su, lu taune tereꞌe werese ane maꞌe au teꞌe wisereyeyei.’ Fene apou toteyei su, Tai fene lo niꞌarawe hire maꞌe irosiya ape, le fene maꞌe etiri wisere aꞌi ta aurowata.a2 Fene lu taune tamo etiri maꞌaru ariye aꞌi ape maꞌe etiri maꞌaru auwei ne toteyei su, fene meni ta tu wau aineyei ne owe ape eimawesawire. Ahowa, lu taune tomu neꞌese yo seni apou ape tote umasinamisiya. Lowe Owane Sitewi lo wesi sahe yo seni apou ape umasisiya. Aiwawe aꞌi lowe yo mai sahe peri neꞌese au teꞌe utesiya. ‘Fene ane siyere! Ane etiri maꞌaru tomu neꞌese lu maꞌaru ariye aꞌi ape maꞌe aunamisiya.’ Lowe lu taune werese lowe ne au siye wisereyereme. Wiyeme aꞌi! Ane peri pefine aꞌi fene maꞌe au teꞌe areiyesiya. Wanure! Lu taune ape yo seni apou ape tote umasisiya ape, lowe lu taune werese maꞌe areareyei ne totesiya. Lu taune lowe maꞌe au teꞌe wisereyeye. Ahowa, Owane Sitewi lai lowe au teꞌe wisereyerowata. 3-4 Fene etiri maꞌaru fene lo lu taune maꞌaru ariye aꞌi ape maꞌe auwei ne toteyei su, fene lowe maꞌe etiri maꞌaru eresene aꞌi aure. Lu taune tereꞌe fene owe ape siyere. Ahowa, fene etiri maꞌaru fene lo eresene aꞌi aunamite. Serai Owane Sitewi lai fene siye tepaꞌasiye. Sosu le lu taune werese maꞌe fene ne au teꞌe wisereyeyei. Le aꞌi lai fene maꞌe etiri wisere aꞌi itiyaꞌu aurowa.”
Owane Sitewi maꞌe au teꞌe tiyatiyei ne.
5 “Aiwawe aꞌi fene Owane Sitewi maꞌe au teꞌeyei ne toteyei su, fene lu marepi hesi aꞌi totesiya ape, yo seni owe ape umasite. Lowe Owane Sitewi lo wesi ponei sahe teinamisiya. Lowe peri erasi aꞌi Owane Sitewi maꞌe au teꞌesiya. Lowe Owane Sitewi maꞌe au teꞌeyei su, lu taune werese peri lowe lo wanuwei. Lowe nowe amerame sahe teisiya. Peri erasi se Owane Sitewi maꞌe au teꞌeyei. Lu taune werese peri lowe lo wanuwei su, lu tewi ape apou toteyei, ‘Ane Owane Sitewi maꞌe au teꞌeyei su, lu taune werese ane ne au teꞌe wisereyeyei.’ Wiyeme aꞌi ane peri pefine fene maꞌe au teꞌe areiyesiya. Wanure! Lu tewi ape lowe Owane Sitewi lo etiri neri aꞌi anirowata. Owane Sitewi lai peri lowe lo wanurowata.b 6 Ahowa, fene Owane Sitewi maꞌe, tai fene lo, au teꞌeyei ne toteyei su, fene tewi wesi papu wire. Yo anitiyei su, fene Owane Sitewi, Tai fene lo, maꞌe lu le ne siye taꞌame ape, au teꞌete. Serai Owane Sitewi lai fene eresene aꞌi tewi wesi papu siyeyei. Fene peri au teꞌeyei su, Owane Sitewi lai Tai fene lo etiri ta fene maꞌe aurowa.
7 Sosu fene Owane Sitewi maꞌe au teꞌeyei su, fene peri yahowaꞌi owe ape au teꞌe teꞌenamite. Lu taune, Moses lo yo peri umasi taꞌame ape, yo seni ape umasinamisiya. Lowe apou totesiya, ‘Nomo Owane Sitewi maꞌe peri tomu neꞌese au teꞌe teꞌeyei su, Owane Sitewi lai peri nomo lo ape wanuwei.’ Ahowa, Owane Sitewi lai peri lowe lo wanurowata.c 8 Serai fene yo seni lowe lo owe ape umasire. Tai fene lo le marepi fene lo siye soꞌoruwe tepaꞌasiye. Tu fene marepi fene lo Owane Sitewi maꞌe au teꞌe taꞌame su, Owane Sitewi lai etiri fene lo poꞌutesiya ape, siye soꞌoruwe tepaꞌasiye.d
9 Serai fene Owane Sitewi maꞌe au teꞌeyei su, fene apou eire,
‘Tai nomo lo, ne hire maꞌe onunamisiya. Nomo ne maꞌe au teꞌesiya, Iyape no mi mi weriyei waraꞌi aꞌi fa ironamite.’
10 Nowe yeꞌewi su, ne lu taune werese au noweinoweirowa ape, nowe ape se witane aꞌi fa henera. Marepi werese no hi awei sato fa henera. Aiwawe aꞌi omo hire maꞌe marepi werese no wou umasi tepaꞌasiye.e
11 Ne pereye nowe eite se nomo maꞌe ayei etiri nomo lo fa aute.
12 Lu taune tereꞌe nomo maꞌe yo seni luwaru aꞌi irowei su, nomo yo seni luwaru aꞌi lowe lo iꞌane tepaꞌasiye. Serai Nomo yo seni luwaru aꞌi irowei su, ne yo seni luwaru aꞌi nomo lo ani pamowete.f
13 Ne nomo yo seni luwaru aꞌi owe ape henetire. Nomo yo seni luwaru aꞌi umasiyei ne toteyei su, ne faraꞌu nomo maꞌe yo seni waraꞌi aꞌi au atuatute. Sosu ne nomo yo seni luwaru aꞌi hene aro anire. {Ne lu taune werese au noweinoweirowa su, ne lai mi mi pasi pasi fa ironamite. Kairefi no weriyei weriyei fa ironamite. Sosu nomo iyape no mi mi pasi pasi se teꞌe ani arowete. Peri wiyeme aꞌi ne.}gh
14 Wanure! Lu taune yo seni luwaru aꞌi fene maꞌe au irowei su, fene yo seni luwaru aꞌi lowe lo fa iꞌanete. Fene yo seni luwaru aꞌi lowe lo iꞌaneyei su, Tai fene lo, omo hire maꞌe ironamisiya ape, aiwawe aꞌi yo seni luwaru aꞌi fene lo iꞌanerowa.i 15 Aiwawe aꞌi fene yo seni luwaru aꞌi lowe lo iꞌane taꞌame su, Tai fene lo yo seni luwaru aꞌi fene lo ani pamowerowata.”
Jisas ayei siyenamiyei ape ne au teꞌe areiyesiya.
16 “Sosu aꞌi pe fene, Owane Sitewi maꞌe teꞌe towerirowawe, sosu ayei ta fene lo siyenamiyei su, fene ereme se owe ape irote. Ahowa, lu tamo, marepi hesi aꞌi totesiya ape, lowe yo seni ape umasisiya. Lowe nihari lowe lo ereme se au atuatuwei su, lowe apou totesiya. ‘Lu taune yo seni wisere aꞌi ano siyeyei. Serai lowe ane ne siye teꞌe wisereyeyei.’ Ahowa, Owane Sitewi lai lowe yo seni lowe lo siye wisereyerowata. Owane Sitewi lai etiri ta lowe maꞌe neri aꞌi aurowata.j 17 Ahowa, fene ayei ta siyenamiyei su, fene mato towe fene lo asi noweinoweire. Nihari fene lo saꞌi se au hure. Serene lu taune werese ereme se fene lo siyerowata. 18 Fene mato towe fene lo asi noweinoweiyei su, lu taune werese fene ayei siyenamiyei ape siyerowata. Ahowa, Tai fene lo lai lu le ne siye taꞌame ape, marepi fene lo eresene aꞌi siye tepaꞌasiye. Owane Sitewi lai marepi wisere aꞌi fene lo siyeyei su, le etiri ta fene maꞌe neri aꞌi itiyaꞌu aurowa.”
Etiri tomu neꞌese taꞌuwe ani fuwei lo peri.
19 “Fene awei lo etiri ne marepi erasi aꞌi totenamiyei su, fene awei lo marepi tote umasinamiyei. Aiwawe aꞌi fene etiri werese, Owane Sitewi maꞌe fai ape, marepi erasi aꞌi totenamirowa su, fene Owane Sitewi lo marepi tote umasinamirowa.k 20 Ahowa, fene etiri aseyaro wisere aꞌi Owane Sitewi lo omo hire yaro taꞌuwe ani fure. Fene Owane Sitewi lo omo hire yaro etiri werese fene lo taꞌuwe ani fuwei su, yaꞌe werese a poꞌuterowata. Aiwawe aꞌi etiri werese uwaserowata. Sosu taꞌarei lu werese aine apeti wirowata. Etiri werese taꞌarei anirowata.l 21 Fene awei sahe etiri tomu neꞌese taꞌuwe ani fuwei su, marepi fene lo aiwawe aꞌi awei lo etiri ape aꞌi toteyei. Fene etiri fene lo Owane Sitewi lo omo hire maꞌe taꞌuwe ani fuwei su, marepi fene lo Owane Sitewi ne totenamirowa.”
Nihe fene lo yehe erei wou aꞌi lo peri.
22 “Nihe fene lo yehe erei wou aꞌi ne. Nihe fene lo amerame aꞌi siyeyei su, tahe paꞌare werese fene lo mitaiyeyei aꞌi ironamirowa. 23 Ahowa, nihe fene lo pokoweyei su, tahe paꞌare werese fene lo pasi aꞌi irorowa. Tahe paꞌare fene lo pasi aꞌi iroteyei su, pasi ape pefine aꞌi tene. Fene etiri werese siyerowata.”
Fene wiyawi lu owane hesi lo wiyawi owe ape taꞌanerowata.
24 “Meni ta wiyawi lu owane hesi lo wiyawi anirowata. Meni ape meni owane taꞌi aꞌi ne marepi erasi aꞌi tote wawesiyenamirowa. Sosu meni owane tereꞌe ne ai marepi erasi aꞌi totenamirowa. Le meni owane taꞌi lo marepi werese wanu umasirowa. Sosu meni owane tereꞌe, le peri werese lo wanu arisirowa. Fene werese etiri totenamirowa su, fene Owane Sitewi ne marepi erasi aꞌi toterowata. Serai fene awei lo maꞌaru ne erasi aꞌi toteyei su, fene Owane Sitewi ne toterowata.
Fene etiri ayei werese marepio erasi aꞌi owe ape totete.
25 Serene ane marepi sitewi fene maꞌe au teꞌe areiyesiya. Fene etiri werese fene lo marepi erasi owe ape totatote ewitete. Fene ayei fene lo, saꞌi ayei fene lo, ipari tahe fene lo ape ne owe ape totenamite. Ayei tamo, saꞌi ayei tamo, ipari tahe werese tamo, etiri ape mo lowe witane aꞌi uwaserowa. Marepi hepene fene lo mi mi pasi pasi ironamitorowa. Serai fene marepi erasi aꞌi marepi hepene fene lo ne fa totenamite.m 26 Fene irowe werese ne totere. Lowe werese sahe me so taꞌaneyei awei yehe same taꞌame. Lowe me so tamo ani tou anirowawe, wesi ta sahe ani taꞌuwe furowata. Ahowa, Owane Sitewi Tai fene lo hire maꞌe irosiya ape, le irowe werese mi mi werese au ene anamisiya. Owane Sitewi lai lowe werese au noweinoweinamisiya su, le lu feni lo aiwawe aꞌi au noweinoweinamisiya. Owane Sitewi lo nihe se fene werese irowe werese hi ani ararosiya.n 27 Fene marepi tote ewiteyei su, fene faraꞌu nowe mi tereꞌe ta tei irorowa awere? Ahowa, fene marepi orese aꞌi owe ape totere. 28 Fene piyene marepi orese aꞌi ipari tahe ne tote ewitesiya awere? Fene mesu ape siyere. Lowe wafei irirowata. Lowe wiyawi ta taꞌanerowata. Sosu siyere! Owane Sitewi lai mesu werese au lese tepaꞌasiye.
29 Peri ape wiyeme aꞌi ne. Wanure! Meni ta, iyape Solomon le ipari tahe wisere aꞌi ani asiteye. Ahowa, mesu werese Owane Sitewi lai lowe au lese tepaꞌasiye. Mesu lo leseyei lu lo leseyei ape wou taꞌama. Mesu lo leseyei tutawe aꞌi ne.o 30 Sosu Owane Sitewi lai senarepe su maꞌe au leseye su, fene apou owe ape totere. ‘Le ane ipari tahe au ani asirowata.’ Ahowa, Owane Sitewi lai fene werese marepi erasi aꞌi tote wawesiyenamisiya. Le lai fene maꞌe ipari tahe wisere aꞌi au ani asinamirowa. Mesu werese, senarepe su werese pereye nowe eite se lowe norohu aꞌi irosiya. Nowe meꞌiye su, nomo lowe yehe maꞌe ani fu arosawiyei. Fene werese Owane Sitewi ne tote tawesiyei fene lo oso aꞌi ne. 31 Serai fene marepi orese aꞌi owe ape totete, ‘Nomo ayei eiwerou maꞌe aniyei awere? Nomo piye saꞌi ayei awere? Nomo piye ipari tahe ani asiyei awere?’ 32 Etiri werese ape mo lu taune Owane Sitewi lo peri umasi taꞌame ape, lowe etiri ape mo siyeyei ne nehi tohotesiya. Tai fene lo hire maꞌe irosiya ape, etiri ape mo fene poꞌutesiya ape, le soꞌoruwe aꞌi ne. Fene etiri ape anirowa. Serai fene marepi orese aꞌi owe ape totete.p 33 Ahowa, fene tu Owane Sitewi lo marepi tote umasinamite. Sosu Owane Sitewi lo yo seni waraꞌi aꞌi fu umasinamite. Sosu fene etiri ape mo umasinamirowa su, le aꞌi lai etiri werese ape mo fene maꞌe aurowa.q 34 Serai fene nowe meꞌiye su marepi orese aꞌi owe ape totete. Ahowa, nowe meꞌiye ape, fa henera. Etiri orese tamo nowe pereye aꞌi heneraiyei ape, etiri orese ape lai nowe pereye aꞌi lo ne.”