Lu tereꞌe werese lo yo seni owe ape hese siye eti ereire.
7
“Fene lu tereꞌe lo yo seni owe ape hese ereite. Serai Owane Sitewi lai yo seni fene lo hese ereirowata.a 2 Aiwawe aꞌi fene lu tereꞌe lo yo seni marepi luwaru aꞌi se au hese siye eti ereiye su, Owane Sitewi lai yo seni luwaru aꞌi fene lo ape marepi luwaru aꞌi aiwawe aꞌi se itiyaꞌu hese siye eti ereirowa. Fene lu tereꞌe lo yo seni luwaru aꞌi nawiteyei su, Owane Sitewi aiwawe aꞌi yo seni fene lo itiyaꞌu nawiterowa.b 3 Fene me meni erasi ta nihe fene lo sahe irosiya ape, piyene fene meni tereꞌe ta oroꞌoru tewi oso aꞌi nihe lo sahe irosiya ape, ani tahe fusawiyei ne totesiya awere? 4 Ahowa, fene me meni erasi nihe fene lo sahe irosiya ape, fene meni tereꞌe maꞌe apou owe ape eire. ‘Kaiyemo, ane faraꞌu oroꞌoru tewi oso aꞌi, nihe no sahe irosiya ape, ani tahe fusawiyei.’ Fene me meni erasi nihe fene lo sahe irosiya ape, fene oroꞌoru tewi aꞌi meni tereꞌe lo nihe sahe siyerowata. 5 Fene marepi hesi aꞌi siye lu. Fene me meni erasi nihe fene lo sahe irosiya ape, tu ani tahe fusawire. Sosu fene me meni erasi, nihe fene lo sahe irosiya ape, ani tahe fusawi tepaꞌasiyei su, fene faraꞌu kaiyemo lo oroꞌoru tewi oso aꞌi nihe sahe irosiya ape, siye ani tahe fusawirowawe, siye etirowa.6 Fene Owane Sitewi lo yo seni waraꞌi aꞌi werese lu taune luwaru aꞌi maꞌe owe ape au teꞌere. Lowe you erawe wou aꞌi ne. Lowe Owane Sitewi lo yo seni waraꞌi aꞌi wanuwei su, lowe fene maꞌe atati teirowawe, sosu fene maꞌe au luwaruwerowa. Aiwawe aꞌi fene nokoro wisere aꞌi lu taune luwaru aꞌi tamo awei sahe owe ape ani fu arore. Lowe fe erawe wou aꞌi ne. Nokoro fene lo awei sahe wiyeineyei su, lowe hire ato tawesitiyei. Sosu lowe fene maꞌe atati teirowawe, fene maꞌe itiyaꞌu au luwaruweyei.”
Fene Owane Sitewi maꞌe etiri ta teꞌe toweriyei su, le fene maꞌe aurowa.
7 “Fene etiri ta aniyei ne toteyei su, fene Owane Sitewi maꞌe teꞌe towerirowawe, le fene maꞌe etiri ape aurowa. Fene Owane Sitewi lo marepi siye soꞌoruweyei ne toteyei su, le aꞌi lai fene maꞌe marepi lo ne au atuatu areiyerowa. Fene yo sahe ereti se aine taꞌaruwei su, yo ape fene maꞌe au tosorowa.c 8 Lu taune werese etiri ta Owane Sitewi maꞌe teꞌe toweriyei su, Owane Sitewi lai lowe maꞌe etiri ape aurowa. Lu taune werese etiri ta ani nehitiyei su, Owane Sitewi lai lowe maꞌe au atuaturowa. Lu taune werese yo sahe ereti se aine taꞌaruwei su, Owane Sitewi lai lowe maꞌe yo ape au tosorowa.d 9 Meni eime ta tai lo maꞌe nau taꞌase ne ei toweriyei su, le meni eime lo maꞌe tapiye auwei awere? Ahowa! 10 Sosu le tai lo hare ta ei toweriyei su, tai lo le maꞌe haru aimesi ta auwei awere? Ahowa. 11 Serai fene yo seni luwaru aꞌi ironamisiya ape, fene werese etiri wisere aꞌi eimane fene lo maꞌe auwei. Owane Sitewi, Tai fene lo hire maꞌe irosiya ape, fene le maꞌe teꞌe toweriyei su, le etiri wisere aꞌi fene maꞌe aurowa awere? Ei, wiyeme aꞌi. Le etiri wisere aꞌi fene maꞌe aurowa.e 12 Serai fene apou totesiya su, ‘Lu taune tereꞌe tamo lowe nomo maꞌe yo seni wisere aꞌi au ironamite.’ Sosu fene lowe maꞌe yo seni apou ape aiwawe aꞌi au ironamite. Peri eite lo sitewi Moses leseye. Sosu Owane Sitewi lo peri au teꞌe se lu lai leseye.”f
Fene Owane Sitewi lo yo oso aꞌi fu umasite.
13 Sosu Jisas apou aꞌi teꞌeteye, “Yo hesi irosiya. Fene yo oso aꞌi papu wire. Fene yo erasi aꞌi papu wiyei su, fene yo luwaru aꞌi umasiyei. Lu taune tomu neꞌese yo erasi ape umasinamisiya. Sosu lowe maꞌe irowa. 14 Fene yo oso aꞌi papu wiyei su, fene marepi hepene heꞌi aꞌi anirowa. Yo ape oso aꞌi ne. Lu taune taꞌi taꞌi aꞌi lai yo oso ape umasirowa.”
Fene lu areareyei aꞌi ape mo ne, weiyaiya!
15 Sosu Jisas apou eiye, “Weiyai! Lu taune tomu neꞌese fene maꞌe peri areareyei ne aiyerowa. Lowe apou teꞌesiya, ‘Nomo fene maꞌe peri wisere aꞌi au teꞌeyei ne aiyerowa.’ Ahowa, peri werese lowe lo wawero aꞌi ne. Fene peri wawero lowe lo owe ape wanu umasite.g 16 Fene lu taune lo yo seni ape siyeyei su, fene yo seni lowe lo siye soꞌoruwerowa. Lowe yo seni luwaru aꞌi ironamirowa. Lu taune werese Owane Sitewi lo wiyawi anisiya ape, lowe yo seni aseyaro aꞌi ironamisiya. Fene iyu sepau lo loꞌu fiyarowe sahe anirowata. Aiwawe aꞌi, fene unere lo loꞌu wafei tohu sahe anirowata.h 17 Peri ape wiyeme aꞌi ne. Wanure! Me wisere aꞌi ta so wisere aꞌi taꞌesiya. Aiwawe aꞌi me luwaru aꞌi ta so luwaru aꞌi taꞌesiya. 18 Me wisere aꞌi ta so luwaru aꞌi taꞌerowata. Aiwawe aꞌi me luwaru aꞌi ta so wisere aꞌi taꞌerowata. 19 Me ta so luwaru aꞌi taꞌeyei su, meni ta me ape aine ou ani ererowa. Sosu yehe maꞌe ani fu arosawirowa.i 20 Serai lu taune tamo yo seni luwaru aꞌi irowei su, fene lowe ne siye soꞌoruwe tepaꞌasiyei. Lowe yo peri ano umasi se taꞌama.j
21 Fene apou owe ape totete, ‘Lu taune werese iyape ano ei ani arowesiya ape, lowe Tai ano lo omo hire maꞌe wirowa.’ Ahowa, lu taune tamo Tai ano lo marepi tote umasinamiyei su, lowe aꞌi lai Owane Sitewi lo omo hire maꞌe wirowa.k 22 Nowe yeꞌewi su, lu taune tomu neꞌese ane maꞌe apou teꞌerowa, ‘Owane, Owane! Nomo peri no lu taune werese maꞌe au teꞌe fiyariteye. Sosu nomo iyape no se sepei luwaru aꞌi tomu neꞌese pefine au taꞌane sasari arosawiteye. Sosu nomo iyape no se wiyawi erasi aꞌi iroteye.’ 23 Ane peri lowe lo wanurowa su, ane lowe maꞌe apou eirowa. ‘Ane fene werese soꞌoru taꞌama. Fene ane arunatire. Fene yo seni luwaru aꞌi ironamiteye.’”l
Meni ta marepi wisere aꞌi wesi ta taꞌaneye.
24 “Sosu aꞌi pe lu taune werese peri ano wanu tote umasinamisiya ape, lowe meni ta marepi wisere aꞌi wou aꞌi ne. Meni ta marepi wisere aꞌi totesiya ape, le wesi lo tapiye hire maꞌe taꞌanesiya. 25 Sosu meꞌiye su saꞌi erasi itorairowa. Fiyaru erasi wesi ape aine narowa. Saꞌi ei ape wesi lo maꞌe aine towesiyei ne totesiya. Ahowa, saꞌi ei wesi ape tewi apetirowata. Wesi ape tapiye erasi sahe kairefi se teinamiteye.”
Meni tereꞌe ta marepi meremereye aꞌi wesi ta taꞌaneye.
26 “Sosu aiwawe aꞌi lu taune tereꞌe tamo peri ano wanu arisisiya ape lowe meni marepi meremereye aꞌi wou aꞌi ne. Meni ta marepi meremereye aꞌi totesiya ape, le wesi lo yoꞌu eneri sahe taꞌaneye. 27 Sosu meꞌiye su saꞌi erasi itorairowa. Fiyaru erasi wesi ape aine towesi apetirowa. Saꞌi ei ape wesi lo maꞌe aine towesiyei ne totesiya. Saꞌi ei ape eneri werese wesi unahi iroteye ape, tewi koruwe aiti. Saꞌi ei ape wesi lo tewi towesi aniri.”
28 Sosu aꞌi pe Jisas peri werese au teꞌe fiyari tepaꞌasiye su, lu taune werese peri werese lo ne hepene se suꞌariye. 29 Piyene awere? Jisas peri lo au teꞌe areiyeye su, le meni iyape erasi se wou aꞌi ne. Yo peri teꞌe siye lu lowe peri au teꞌeye su, lowe marepi luwaru aꞌi se au teꞌeteye. Jisas lu ape mo wou taꞌama.m