Jisas meni ta enite kairefi aꞌi au taꞌane niyemaiyeyei.
8
Sosu aꞌi pe Jisas peri au teꞌe tepaꞌasiye su, le omo hire maꞌe itorai. Lu taune tomu neꞌese le moꞌo itorai. 2 Omo hire maꞌe itorai su, Jisas meni ta enite kairefi aꞌi se siyeye. Meni ape Jisas maꞌe faiyewe, lowe uporo hi apeꞌi onurai. Le Jisas maꞌe eiye, “Meni Owane, Ne ane ne marepi erasi aꞌi ferafereiyei su, ne enite werese ano au ani taꞌane niyemaiyere.” 3 Sosu Jisas ereti lo tesisawiyewe, meni ape isawe aniteye. Sosu le meni ape maꞌe apou eiye, “Ane apou totesiya, Ei! Ane faraꞌu enite werese no au taꞌane niyemaiyeyei.” Sosu Jisas peri teꞌeye su, pereye aꞌi meni ape lo enite werese foroꞌowe tepaꞌasiye. 4 Sosu Jisas le maꞌe eiye. “Ne lu taune werese maꞌe owe ape teꞌe fiyarite. Ahowa, ne au heseyei meni owane maꞌe ire. Ne witane aꞌi au heseyei meni owane ape maꞌe tahe no au atuature. Sosu moꞌo ne Owane Sitewi maꞌe ayei ta au hesere. Ne Moses lo yo peri umasire. Tu naifa weriyei Moses apou leseye, ‘Enite kairefi no au niyemaiyeyei su, ne au heseyei meni owane maꞌe enite werese au atuatuwei ne ire. Sosu moꞌo ne ayei ta Owane Sitewi maꞌe au hesere. Au heseyei meni owane ape tahe no siyeye su, le apou eiyei, ane ne maꞌe eisiya, tahe werese no aseyarowe tepaꞌasiye.’”aJisas lai meni owane lo wiyawi meni au taꞌane faraꞌuweye.
5 Sosu aꞌi pe Jisas omo Kaperneam maꞌe fi. Sosu ai atu siye meni owane ta le maꞌe ei toweriyei ne fai. 6 Le apou ei toweriye, “Meni Owane, Wiyawi yahowaꞌi meni ano wesi ano howeisiya. Ereti lowe werese lo luwaru afofo aꞌi ne. Le fofowei erasi aꞌi teritenamisiya.” 7 Sosu Jisas itiyaꞌu eiye, “Ei, ane wesi no maꞌe wiyawi yahowaꞌi meni no au ani taꞌane faraꞌuweyei ne aiyerowa.” 8 Ahowa, ai atu siye meni owane le maꞌe itiyaꞌu apou eiye, “Ahowa, ne meni erasi aꞌi ne. Ane meni yahowaꞌi. Ne wesi ano papu wirairowata. Wesi ano luwaru aꞌi ne. Ahowa, ne peri ta apou eire. Sosu wiyawi yahowaꞌi meni ano wisere aꞌi henerairowa. 9 Wanure. Ane meni owane unahi irosiya. Sosu ai atu siye lu tomu neꞌese ane unahi irosiya. Ane ai atu siye meni ta apou eiyei su, ‘Ne fu ire!’ Meni ape peri ano wanu umasiyewe, serai le iyei. Sosu ane meni tereꞌe maꞌe apou eiyei su, ‘Ne aiya!’ Meni ape peri ano wanu umasiyewe, serai le aiyeyei. Sosu ane wiyawi meni yahowaꞌi ano maꞌe apou eiyei su, ‘Ne wiyawi ape taꞌanere!’ Sosu wiyawi meni yahowaꞌi ano peri ano wanuwe. Serai le wiyawi ano taꞌane tepaꞌasirowa.” 10 Sosu Jisas peri lo ape wanuwe su, le marepi erasi aꞌi toteye. Sosu le lu taune werese, umasiteye ape, maꞌe apou eiye, “Peri wiyeme ano wanure. Israel lo omo pani werese sahe meni ape lo tote tawesiyei lo erasi aꞌi ne. Tote tawesiyei lo lu taune tereꞌe ani ararowe.
11 Sosu ane fene maꞌe eisiya. Lu taune tomu neꞌese omo pani poweiye itoriyei ape, sosu omo pani poweiye wirairowa ape, lowe omo hire maꞌe lu Abraham, Aisak, Jekop mase ene ayei ne taꞌuwerowa.b 12 Juda lo lu taune feni tewi Owane Sitewi tu naifa ariariyeye ape, lowe Owane Sitewi lai ani fusawirowa. Le lowe yehe omo pasi aꞌi maꞌe eimawesawirowa. Lowe omo pasi aꞌi ape maꞌe irowa su, lowe luwei erasi irotorowa. Mato pi lowe lo taꞌani tawesirowa.”c
13 Sosu Jisas ai atu siye meni owane maꞌe eiye, “Wesi no ire! Tote tawesiyei no kairefi aꞌi ne. Ane marepi no tote umasiyei. Wiyawi meni yahowaꞌi no wisere aꞌi heneraiyei.” Sosu aꞌi pe nowe ape se, wiyawi meni yahowaꞌi lo ape kairefi aꞌi henerai.
Jisas Pita lo mai pape au taꞌane faraꞌuweye.
14 Sosu aꞌi pe Jisas Pita lo wesi papu wiye. Le Pita lo mai pape u tahe se wari sahe howeiteye ape, siyeye. Tahe werese lo umeri aꞌi ne. Serai le wari sahe howeiteye. 15 Le menitani ape lo ereti sahe isawe aniteye. U tahe lo arunati tepaꞌasiye. Serai le sineyewe, Jisas lo ayei ta taꞌuwe naneiyewe, lowe maꞌe au ene aye.
Jisas sepei luwaru aꞌi au taꞌane sasarisawi.
16 Nowe neriwei henerai su, lowe lu taune tomu neꞌese sepei luwaru aꞌi iroteye ape, Jisas maꞌe fa au taꞌane sasariyei ne henetai. Sosu Jisas peri ta au teꞌeyewe, sepei luwaru aꞌi werese lowe lo au taꞌane sasariteye. Le lu taune tomu neꞌese, u tahe iroteye ape, au taꞌane faraꞌuweteye. 17 Jisas wiyawi ape iroteye su, le Owane Sitewi lo peri au teꞌe siye meni Aisaia lo peri umasiteye. Tu naifa weriyei, meni ape Aisaia Jisas ne apou leseye,
“Le enite werese nomo lo au taꞌane sasarisawi. Le u tahe werese nomo lo au taꞌane faraꞌuweteye.” Ais 53:4
Jisas lo yo seni umasiyei lo peri.
18 Sosu aꞌi pe lu taune tomu neꞌese Jisas maꞌe taꞌuwerai. Jisas lu taune werese siyeye su, le lu disaipel lo maꞌe apou eiye, “Nomo saꞌi feni eire maꞌe pei tonere.” 19 Sosu yo peri soꞌoruwe siye meni ta Jisas maꞌe eiyei ne fai. “Atuatu siye meni, ane lai ne eiwerou maꞌe iyei ape, mi mi werese ane ne mase umasinamirowa.” 20 Sosu Jisas le maꞌe itiyaꞌu apou eiye, “You erawe awei yo papu howeisiya. Irowe werese uri towafi lowe lo papu howeisiya. Ahowa, ane, meni omo hire maꞌe itorai ape, ane yaru howeiyei se taꞌama.”d 21 Sosu meni tereꞌe le aiwawe umasiyei ne toteye. Le Jisas maꞌe apou eiye, “Owane tai ano temeniyeyei su, ane le fisiye yo papu furowa. Sosu moꞌo ane ne meꞌiye umasirowa.”e 22 Ahowa, Jisas le maꞌe itiyaꞌu eiye, “Pereye aꞌi ne ane umasitaire. Lu ape mo Owane Sitewi ne tote tawesi taꞌame ape, lowe faraꞌu lu taune, temeniyeye ape, fisiye yo sahe fuwei.”
Jisas lai fiyaru erasi einamiye.
23 Sosu aꞌi pe Jisas hare ite maꞌe itori. Le wai erasi papu wi atowe. Lu disaipel lo ape mase wai papu aiwawe wi atowe. 24 Sosu lowe wai hare ite ponei sahe iyatu heneri. Hare ite ponei sahe heneri su, fiyaru, saꞌi ei erasi henerai. Saꞌi ei erasi lai wai si lowe lo ani awetu awetowe. Lu feni werese lo atoweiye erasi irowe. Ahowa, Jisas wai papu nihe howeiteye.f 25 Lu disaipel lo le maꞌe faiyewe, eisowerai. Lowe peri erasi teꞌeye, “Meni Owane, ne nomo ne ferafereire. Nomo werese temeniyeyei ne ataheyewa.” 26 Sosu Jisas lowe maꞌe itiyaꞌu eiye, “Fene piyene atoweiyesiya awere? Tote tawesiyei fene lo oso aꞌi ne.” Sosu le sineyewe, fiyaru, saꞌi ei maꞌe peri erasi se einamiye. Serai fiyaru, saꞌi ei ape titaneye.g 27 Lu disaipel lo le ne hepene se suꞌariye. Meni ape piye meni awere? Fiyaru, saꞌi ei peri lo wanuwe su, sosu saꞌi ei erasi ape titaneye.
Jisas sepei luwaru aꞌi tomu neꞌese au sasarisawi.
28 Sosu aꞌi pe lowe hare ite Galili saꞌi feni maꞌe iyatu toneri. Wai eneri sahe furi. Lowe omo pani tewi iyape Gadara heneri. Sosu lowe wai seni tewi arunati su, lowe lu hesi sepei luwaru aꞌi papu iroteye ape, fisiye yo tomo papu henerai ape, siyeye. Lu erawe hesi ape lowesi yo mai tei tawesiteye. Serai lu taune werese ape yo mai ape se eiwerou irowata. 29 Lowesi Jisas siyeye su, lowesi le maꞌe apou hare uteye, “Owane Sitewi lo meni eime, ne notosi maꞌe eiwerou irowei ne totesiya awere? Ne notosi maꞌe au luwaruweyei ne fai awere? Nowe notosi lo henerai se taꞌame ne.”h 30 Omo toꞌu feni maꞌe, fe tomu neꞌese awei peperi ene ateye. 31 Sosu sepei luwaru aꞌi ape lowesi Jisas maꞌe peri kairefi aꞌi uteye. “Ne notosi au eimawesawiyei su, ne faraꞌu fe ape mo papu, omo toꞌu feni maꞌe irosiya ape, papu wiyei ne eimawesawire.” 32 Sosu Jisas lowesi maꞌe itiyaꞌu eiye, “Ei, fe ape mo papu wiyei ne ire.” Sepei luwaru aꞌi ape mo lowe lu hesi arunatiyewe, fe werese papu wiye. Pereye aꞌi fe werese omo toꞌu iterotiyewe, hare ite maꞌe atenise itowe.
33 Fe werese saꞌi papu atenise itowe su, lu werese fe ape noweinoweiteye ape, lowe omo towafi lowe lo maꞌe itape iteroti. Lowe lu taune werese maꞌe etiri werese ape ne au teꞌe fiyariteye. Lowe sepei luwaru aꞌi ne aiwawe au teꞌe fiyariteye. 34 Lu taune werese peri lowe lo wanuwe su, lowe werese Jisas maꞌe siyeyei ne fai. Lowe le siyeye su, lowe le maꞌe ai marepi toteye. Serene lowe le maꞌe apou teꞌeye, “Ne omo pani nomo lo arunatire.”