2 Lu feni ereti feni hesi lowe hesi aꞌi (12 aposel) lo iyape apou teꞌeye. Tutawe Saimon, iyape tereꞌe Pita. Pita lo paꞌise Andru. Jems, Sebedi lo meni eime. Sosu Jems lo paꞌise iyape Jon. 3 Filip, meni tereꞌe Bartolomyu, sosu Tomas, sosu Matyu, meni ape takis maꞌaru ani se meni. Meni tereꞌe iyape Jems, Alfius lo meni eime, sosu meni tereꞌe Tadius. 4 Meni tereꞌe Saimon Selot. Sosu meni yeꞌewi Judas Iskariot. Meni ape nowe meꞌiye su, le ai atu siye lu Jisas maꞌe henetirowa.

5 Sosu aꞌi pe Jisas lu disaipel lo (12) le maꞌe aiyeyei ne ei aniye. Le lowe maꞌe eiye, “Ane fene omo omo maꞌe eimawesawiyei. Fene lu tewi tereꞌe maꞌe owe ape ire. Ahowa, aiwawe aꞌi fene Samaria lo pani tewi maꞌe owe ape ire. 6 Ahowa, fene Israel lo lu taune maꞌe Owane Sitewi lo peri au teꞌeyei ne ire. Lowe fe sipsip owane se taꞌama wou aꞌi ne. Lowe Owane Sitewi lo yo peri werese iꞌaneye. Serai fene lowe Owane Sitewi maꞌe si tame henetaire.^b 7 Fene iyei su, fene lu taune werese maꞌe peri apou au teꞌe fiyarire. Nowe ape se Owane Sitewi lai lu taune werese maꞌe au noweinoweirowa ape ataheyewa.^c

8 Fene lu taune tamo u tahe se siyeyei su, fene faraꞌu u tahe lowe lo au taꞌane faraꞌuwere. Lu taune tamo, temeniyeye ape, fene faraꞌu lowe si tame hene ani sinere. Lu taune tamo enite kairefi aꞌi se, fene faraꞌu enite werese lowe lo au taꞌane niyemaiyere. Lu taune tamo sepei luwaru aꞌi iroteye ape, fene sepei luwaru aꞌi ape au eimawesawire. Ane fene maꞌe kairefiyeyei ape neri aꞌi auwei. Serai fene wiyawi ano ape irowei su, fene maꞌaru ta owe ape anire. 9 Fene iyei su, fene maꞌaru niye fene lo papu owe ape ani asitire.^d 10 Fene Owane Sitewi lo peri au teꞌeyei su, lu taune tamo fene maꞌe etiri ayei ta aurowa. Serai fene niye ta owe ape aiti. Fene apou owe ape totere, ‘Ane lowe tahe hesi aꞌi faraꞌu aitiyei. Ane ipari tahe hesi aꞌi aiwawe aꞌi aitirowa.’ Ahowa, fene iyei su, ipari tahe taꞌi ani asire. Sosu ire! Fene me epi owe ape aiti. Wiyawi meni ta wiyawi aniyei su, lu tamo etiri lo le maꞌe fa aure.^e

11 Fene omo ta heneriyei su, fene apou teꞌe toweriyei, ‘Eiwerai nomo au isafiyerowa awere?’ Meni ta fene au isafiyeyei su, fene meni ape lo wesi sahe irowei. Fene wesi tereꞌe tereꞌe sahe owe ape irote. Fene omo ape arunatiyei ne toterowa su, fene wesi ape aiwawe arunatirowa. 12 Fene wesi ape papu wiyei su, fene lu taune wesi sahe irowei ape, eriteyei.^f 13 Lu ape mo fene maꞌe isafiyeyei su, fene lowe maꞌe marepi fetane aꞌi au teꞌere. Ahowa, lu ape mo fene maꞌe isafiye taꞌame su, fene marepi fetane aꞌi owe ape teꞌere. 14 Lu tamo fene maꞌe isafiye taꞌame su, sosu peri fene lo wanu arisiyei su, fene wesi ape, omo ape arunatire. Fene wesi omo ape arunatiyei su, fene awei peperi lowe tahe irosiya ape, ato periperenatire.^g 15 Ane peri wiyeme aꞌi fene maꞌe au teꞌesiya. Wanure! Omo ta ape fene maꞌe au luwaruweyei su, nowe yeꞌewi su, lu taune omo ape sahe iroteye ape, Owane Sitewi lai lowe maꞌe fofowei erasi luwaru aꞌi aurowa. Lu taune, omo Sodom, omo Gomora sahe iroteye ape, nowe yeꞌewi su, lowe fofowei oso aꞌi teritetorowa.”^h

16 Sosu aꞌi pe Jisas lu disaipel lo maꞌe apou au teꞌeye, “Fene weiyai! Ane fene lu taune maꞌe ai marepi Owane Sitewi se totesiya ape, au teꞌe fiyariyei ne eimawesawiyei. Fene fe sipsip wou aꞌi ne. Fene tahe pereꞌe aꞌi ne. Fene marepi wisere aꞌi totere. Marepi fene lo fetane aꞌi totesiya. Lu taune ape mo, lowe you erawe wou aꞌi ne. Lowe fene maꞌe atati teirowawe, ai erasi aturowa. Serai fene lowe maꞌe au teꞌeyei ne iyei su, fene marepi fetane aꞌi lowe maꞌe totere. Aiwawe aꞌi fene marepi wisere aꞌi totere. Fene lowe maꞌe iyei su, fene marepi momotei aꞌi totere. Fene yo seni luwaru aꞌi lowe maꞌe owe ape irote.ⁱ 17 Fene weiyai! Lu tamo peri fene lo wanuwei su, lowe fene etiyei ne henetirowa. Lowe fene taꞌuweyei wesi maꞌe henetirowawe, meꞌiyeni fene lo sahe wafei se ainerowa. 18 Lowe fene lu owane tamo maꞌe etiyei ne henetirowa. Lowe fene meni owane tutawe maꞌe henetirowawe, fene ne apou au fu teꞌerowa, ‘Lu tewi ape, lowe Jisas lo peri au teꞌe fiyari areiyesiya.’ Fene lowe maꞌe henerairowa su, fene peri ano lowe maꞌe au teꞌere. Fene peri ano lu tewi tereꞌe maꞌe aiwawe aurowawe, au teꞌere. 19 Ahowa, lowe fene etiyei ne henetirowa su, fene marepi fene lo auseriyeyei sawa. Fene peri teꞌeyei su, atoweiye sawa. Nowe ape se, Owane Sitewi lai fene maꞌe peri wiyeme aꞌi lo au teꞌerowa. Serai fene lowe maꞌe Owane Sitewi lo peri wiyeme aꞌi au teꞌe areiyerowa. 20 Lowe fene etirowa su, fene lai peri fene lo ape au teꞌeyei taꞌama. Ahowa, Owane Sitewi Tai fene lo, lo Hepene Waraꞌi aꞌi ape lai peri wiyeme aꞌi lo ape au teꞌerowa.^j

21 Nowe meꞌiye su, meni ta lai paꞌise meni lo etiyei ne henetirowa. Le lu owane maꞌe apou au teꞌerowa, ‘Fene paꞌise ano eite fu aine teraꞌere.’ Aiwawe aite ta lai meni eime lo etiyei ne henetirowa. Sosu eimane tamo lai tai mai lowe lo etiyei ne henetirowa. Lowe tai mai lowe lo ape aine teraꞌeyei ne toterowa.^k 22 Fene peri ano au teꞌe fiyarirowa su, lu taune werese fene ne ai marepi totenamirowa. Ahowa, lu taune tamo kairefi aꞌi teinamirowa su, Owane Sitewi lai lowe mo mi mi pasi pasi au ferafereirowa. 23 Sosu lu tamo omo ape sahe fene maꞌe au luwaruweyei su, fene omo tereꞌe maꞌe atoweiye iteroti. Peri pefine aꞌi ano wanure. Fene Israel lo omo pani werese maꞌe au teꞌeyei ne iyei su, fene wiyawi ape tepaꞌasiye taꞌama. Serai fene wiyawi ape ironamitorowa. Sosu ane, meni hire maꞌe itorai ape, si tame itorairowa su, sosu fene wiyawi ape iro tepaꞌasirowa.

24 Eimane ta lai atuatu siye meni lo ani fu ararorowata. Aiwawe aꞌi wiyawi yahowaꞌi siye meni lai meni owane lo ani fu ararowata.^l 25 Eimane ape lai atuatu siye meni lo wou henerairowa. Sosu wiyawi yahowaꞌi siye meni lai meni owane lo aiwawe aꞌi henerairowa. Etiri ape mo wisere aꞌi ne. Ne apou eisiya su, ‘Ne lai sepei luwaru aꞌi tutawe, Belsebul.^mn

26 Serai ane fene maꞌe peri pefine aꞌi ape au teꞌesiya, fene lowe ne owe ape atoweiyete. Lowe fene maꞌe etiri ta au luwaruweyei su, etiri ape amerame aꞌi henerairowa. Etiri werese lowe fareyareye iroteyei ape, Owane Sitewi lai etiri ape mo lu taune maꞌe au teꞌe atuatu areiye fiyarirowa.^o 27 Ane fene maꞌe eresene aꞌi peri ta au teꞌerowa su, fene lu taune werese maꞌe i au teꞌe areiyere. Sosu ane peri eresene aꞌi fene maꞌe au teꞌerowa su, fene peri ahi erasi aꞌi se lu taune werese maꞌe au teꞌe ute areiye fiyarire. 28 Lu tamo fene aine teraꞌeyei ne toterowa su, fene lowe ne owe ape atoweiyete. Lowe hepene fene lo ape mase aine teraꞌerowata. Ahowa, meni ape tahe paꞌare, hepene mase aine teraꞌerowa ape, sosu yehe omo maꞌe fu arosawirowa ape, fene meni ape fu atoweiyete. Meni ape Owane Sitewi pefine aꞌi tene.^p

29 Meni ta irowe mawe hesi aꞌi maꞌaru tau taꞌi aꞌi eterowa. Sosu irowe mawe taꞌi awei sahe wiyeinerowa su, tai fene lo, hire maꞌe irosiya ape, le marepi erasi aꞌi irowe mawe ne totenamirowa. 30 Aiwawe aꞌi Owane Sitewi tai fene lo le lai mato towe fene lo ape werese werese nawite tepaꞌasiye. Serai le fene marepi erasi aꞌi tote wawesiyenamisiya. 31 Serai fene owe ape atoweiyete! Owane Sitewi lo nihe se fene iyape erasi se ironamisiya. Fene irowe mawe tomu neꞌese ani fu ararowe.”^q

32 “Fene iyape ane ne lu taune werese maꞌe au teꞌe fiyariyei su, ane lai fene ne tai ano maꞌe omo hire maꞌe ironamisiya ape, au teꞌe areiyerowa. 33 Meni ta ane ne amerame aꞌi sahe apou teꞌerowa su, ‘Ane Jisas soꞌoru taꞌama.’ Ane le ne aiwawe aꞌi tai ano maꞌe omo hire maꞌe ironamisiya ape, apou teꞌerowa, ‘Ane meni ape soꞌoru taꞌama.’”^r

34 Sosu aꞌi pe Jisas lu disaipel lo maꞌe apou eiye, “Fene apou owe ape totere, ‘Jisas lu taune werese maꞌe marepi fetane aꞌi auwei ne fai.’ Ahowa, ane marepi fetane aꞌi auwei ne fai taꞌama. Ane lu taune maꞌe ai atuwei erasi au irowei ne fai. Ane lu taune lo ai marepi au ani atuwei ne fai. Ane hi awei maꞌe itorai su, peri wiyeme aꞌi ano lai lu taune ai atu tiyati au irorowa. 35 Ane ai marepi au ani atuwei ne fai.

37 Meni ta aite mai lo ne marepi erasi tote wawesiyeyei su, sosu ane ne marepi oso aꞌi tote wawesiyeyei su, ane le ne marepi erasi aꞌi tote wawesiyerowata. Aiwawe aꞌi meni ta eimane lo ne marepi erasi aꞌi tote wawesiyenamiyei su, sosu le ane ne marepi oso aꞌi tote wawesiyeyei su, ane lai meni ape marepi erasi aꞌi tote wawesiyerowata.

38 Meni ta me tapeꞌi sahe temeniyeyei ne tote taꞌame su, sosu ane moꞌo umasi taꞌame su, le lu feni ano taꞌama. 39 Meni ta apou aꞌi toteyei su, ‘Ane marepi hepene wisere aꞌi ironamisiya.’ Meni ape marepi hepene topo lo poꞌuterowa. Sosu meni ta iyape ano se wiyawi ano anitiyei ape, le temeniyeyei su, le marepi hepene heꞌi aꞌi mi mi pasi pasi ironamitorowa.”^s

40 “Lu taune tamo lai fene maꞌe au sewiye isafiyerowa su, lowe lai ane maꞌe aiwawe aꞌi au sewiye isafiyerowa. Sosu lu taune tamo ane maꞌe au sewiye isafiyenarairowa su, lowe tai ano, ane hi awei sato eimawe arosai ape, lowe le maꞌe au sewiye isafiyerowa.^t 41 Meni ta apou toteyei su, ‘Meni ape Owane Sitewi lo peri au teꞌe siye meni pefine aꞌi ne.’ Serai ane meni ape wesi ano papu hene wirowawe, le maꞌe au isafiye arowa. Fene apou wou aꞌi toteyei su, fene etiri wisere aꞌi Owane Sitewi lai au teꞌe siye lu maꞌe aurowa ape, fene etiri apou ape wou anirowa. Meni ta apou toteyei su, ‘Meni ape yo seni aseyaro aꞌi ironamisiya. Ane meni ape wesi ano hene wirowawe, le maꞌe au isafiye arowa. Fene apou toteyei su, Owane Sitewi lai etiri wisere aꞌi fene maꞌe aurowa. Etiri ape mo Owane Sitewi lai lu taune maꞌe, yo seni aseyaro iroteye ape, aurowa. 42 Peri ano wiyeme aꞌi ne, wanure! Meni ta saꞌi waraꞌi aꞌi eimane ta peri ano umasiteye ape, maꞌe au arowa su, Owane Sitewi lai meni ape maꞌe etiri wisere aꞌi aurowa. Etiri wisere aꞌi le aurowa ape, etiri wisere aꞌi poꞌuterowata.’”