Jon saꞌi au hu siye meni lu tamo Jisas maꞌe eimawesawi.
11
Sosu aꞌi pe Jisas lu disaipel lo (12) maꞌe au teꞌe atuatu tepaꞌasiye su, le omo ape arunatiyewe, omo tereꞌe tereꞌe Galili sahe Owane Sitewi lo peri au teꞌe fiyariteye.2 Jon saꞌi au hu siye meni kalabus wesi iroteye ape, le Krais lo wiyawi ne wanuwe su, le lu disaipel lo tamo le maꞌe ei toweriyei ne eimawesawi. 3 Lowe le maꞌe apou teꞌe toweriye, “Tu naifa weriyei Owane Sitewi lai peri ta lu tewi Israel maꞌe au teꞌe naneiye. Le apou eiye, ‘Nowe meꞌiye su, ane meni eime ano fene maꞌe au pati aniyei ne eimawe arosairowa. Ne meni ape Owane Sitewi lai, hi awei sato eimawe arosairowa ape, ne meni ape awere? Nomo meni tereꞌe ninawe teirowa awere?’”
4 Sosu Jisas lowe maꞌe itiyaꞌu eiye, “Fene Jon maꞌe si tame ire! Fene etiri werese ape mo, fene siyeteye ape, fene wanuteye ape, le maꞌe au teꞌe areiyere. 5 Ane lu taune nihe pokowe tawesiye ape, nihe lowe lo au petaneye. Ane lu taune tamo lowe luwaruweye ape, ane lowe lowe lo au ani taꞌane fareraiyeye. Lu taune tamo enite kairefi aꞌi iroteye ape mo, ane enite werese au taꞌane niyemaiyeteye. Lu taune tamo apaniye teꞌeniye tawesiye ape, ane apaniye lowe lo ani tosowe. Lu taune tamo temeniyeye ape, ane lowe hene ani sineye. Sosu ane Owane Sitewi lo peri lu taune maꞌaru ariye aꞌi ape, au teꞌe fiyariteye.a 6 Meni ta ane ne marepi hesi se tote taꞌame su, marepi lo wisereye nineꞌinamisiya.”
7 Sosu aꞌi pe Jon lo lu feni Jisas arunati su, Jisas lu taune werese maꞌe Jon ne au teꞌe areiyeteye. Le lowe maꞌe au ei toweriye, “Fene pani ariye aꞌi maꞌe piye siyeyei ne fi awere? Fene menei towe wou aꞌi au nareyeyei siyeyei ne fi awere? Ahowa, fene meni ta marepi taꞌi aꞌi totesiya ape, siyeyei ne fi. 8 Fene pani ariye aꞌi maꞌe piye siyeyei ne fi awere? Meni ta ipari tahe wisere aꞌi ani asiteye ape, awere? Wanure! Lu werese ipari tahe wisere aꞌi ani asisiya ape, lowe lu owane tutawe lo wesi sato howeisiya. 9 Sosu ane fene maꞌe tame ei towerisiya, fene piyene pani ariye aꞌi maꞌe fi awere? Fene Owane Sitewi lo peri au teꞌe siye meni ta siyeyei ne fi awere? Ei, pefine! Ane fene maꞌe au teꞌesiya, meni ape Owane Sitewi lo peri au teꞌe siye lu werese ani ararowe. 10 Tu naifa weriyei meni ta Owane Sitewi lo one towe sahe apou leseye,
‘Wanure! Ane peri au teꞌe siye meni ano nihari no maꞌe eimawesawiyei. Meni ape aiyerowa su, le yo no au taꞌuwe naneirowa.’ Mal 3:1
11 Ane peri wiyeme aꞌi fene maꞌe au teꞌesiya. Lu werese awei sato irosiya ape, meni ape Jon saꞌi au hu siye meni lowe werese ani ararowe. Ahowa, fene werese Owane Sitewi lo marepi ne tote tawesi umasisiya ape, fene Owane Sitewi lo omo sahe fene iyape erasi aꞌi irosiya. Iyape fene lo Jon lo iyape ani ararosiya. Piyene awere? Fene Owane Sitewi lo marepi siye soꞌoruwe tepaꞌasiye.
12 Jon Owane Sitewi lo marepi lu taune maꞌe au teꞌe fiyariyei ne fai su, lu taune Owane Sitewi lo marepi umasisiya ape, ai atu siye lu tamo lai, lowe maꞌe fofowei erasi au luwaruwerowawe, apou toteteye, ‘Nomo Owane Sitewi lo au noweinoweiyei unahi ironamirowata. Nowe ape henerairowa su, nomo ai atu kairefiyerowa.’ Pereye nowe eite se lowe ai atunamisiya. 13 Owane Sitewi lo peri au teꞌe fiyari se lu werese sosu aiwawe aꞌi yo peri ape, Moses leseye ape, lowe etiri werese, meꞌiye su henerairowa ape, au teꞌeye. Jon henerai su, lowe peri lowe lo au teꞌe tepaꞌasiye.b 14 Lowe peri ape au teꞌeye su, lowe meni Elaija ne toteye. Fene peri ape wanuwei su, fene meni ape ne wanu tote tawesirowa. Fene peri ape wanu ani taꞌame su, fene marepi towafi fene lo umasirowa.c 15 Lu taune werese apaniye se, fene peri ape wanute.
16 Lu taune ape pereye nowe eite se irosiya ape, ane yo seni lowe lo ne au teꞌeyei su, ane peri anowe ta piye au teꞌerowa awere? Ei! Lowe eimane wou omo nepawe amerame sahe onuteye. Lowe eimane tereꞌe maꞌe uteyei. 17 Lowe apou uteyei,
‘Nomo meneꞌe fateye su, fene ureꞌi wou unei taꞌame. Nomo lu ewiteye su, fene lu ewite taꞌame.’
18 Jon fai su, le ayei a taꞌame, wain saꞌi a taꞌame. Sosu lu taune ape mo le ne apou au teꞌeye, ‘Meni ape sepei luwaru aꞌi papu irosiya.’ 19 Wanure! Ane, meni hire maꞌe itorai ape, ayei, wain saꞌi arai. Sosu lowe ane ne apou teꞌesiya, ‘Siyere! Meni ape ayei ahi aꞌi meni. Aiwawe aꞌi le wain saꞌi meremereyeyei. Le takis maꞌaru ani siye lu werese mase onunamisiya. Le lu taune yo seni luwaru aꞌi ironamisiya ape, le lowe lo kaiyemo mo irosiya.’ Etiri werese, ane irosiya ape, etiri ape mo lai ane meni pefine aꞌi ne au atuatusiya.”d
Anelu taune marepi lowe lo aresaiye taꞌame ape mo ne tote wirepuweyei.
20 Sosu aꞌi pe Jisas omo tereꞌe tereꞌe sahe wiyawi erasi pefine aꞌi irowe ape, lu taune tomu neꞌese yo seni luwaru aꞌi towafi lowe lo arunati taꞌame. Serai Jisas lowe werese ne ai marepi tote teꞌeye. 21 Le lu taune maꞌe ai marepi lo apou au teꞌe areiyeye, “Lu taune omo Korasin sahe irosiya ape, Weiyai! Lu taune omo Betsaida sahe irosiya ape, Weiyai! Wiyawi erasi pefine aꞌi ane omo fene lo sahe irowe ape, ane omo Tair, omo Saidon sahe aiwawe irorowa su, lowe witane se aꞌi yo seni luwaru aꞌi towafi lowe lo arunatirowa. Sosu lowe ipari tahe luwaru aꞌi ani asirowa su, lowe yesi yehe sahe onurowa. Ahowa, fene wiyawi erasi pefine aꞌi ano siyeye su, fene yo seni luwaru aꞌi fene lo meꞌiyeni maꞌe atati arunati taꞌame. 22 Ahowa, ane fene maꞌe au teꞌe areiyesiya. Wanure! Nowe yeꞌewi se Owane Sitewi lai lu taune werese yo seni luwaru aꞌi lowe lo ani hese ereirowa su, le lu taune maꞌe omo Saidon, omo Tair, iroteye ape, le fofowei erasi aꞌi au hese ereirowa. Fene yo seni luwaru aꞌi ironamisiya su, fene nowe ape se Owane Sitewi lai fene maꞌe fofowei luwaru erasi aꞌi fene maꞌe aurowa.e 23 Ane lu taune omo Kaperneam sahe fene maꞌe au teꞌe areiyesiya. Fene apou totesiya, ‘Nomo Owane Sitewi lo omo hire maꞌe wirowa.’ Ahowa, fene werese papu itorirowa. Meni ta wiyawi erasi pefine aꞌi, apou ape aiwawe aꞌi ane omo fene lo sahe irowe ape, omo Sodom sahe irowe su, omo ape weriyei ironamitorowa.f 24 Ahowa, ane fene maꞌe au teꞌe areiyesiya. Wanure! Nowe yeꞌewi se Owane Sitewi lai yo seni luwaru aꞌi au hese ereirowa su, lu taune omo Sodom iroteye ape, Owane Sitewi lai lowe maꞌe fofowei oso aꞌi aurowa. Fene Owane Sitewi lai fofowei luwaru erasi aꞌi fene maꞌe aurowa.”g
Jisas apou eiye, “Wiyawi ano fetane aꞌi ne.”
25 Nowe ape se Jisas Owane Sitewi tai lo maꞌe au teꞌe tiyatiteye. Le apou eiye, “Tai ano, ane ne maꞌe au teꞌe wisereyesiya. Ne omo hire maꞌe irosiya ape, ne meni owane tutawe ne. Ne hi awei sato meni owane tutawe ne. Ne peri no lu taune marepi wisere aꞌi toteye ape fareyareye aꞌi irowe. Ahowa, ne peri no lu taune maꞌe marepi eimane oso aꞌi wou au atuatu areiyeteye.h 26 Ei! Tai ano, ne peri no fareyareye aꞌi irowe su, sosu lu taune maꞌe eimane lo marepi wou au teꞌe atuatu areiyeye su, ne marepi wisere erasi aꞌi totenamisiya.
27 Tai ano, ne etiri werese ane maꞌe au tepaꞌasiye. Ne aꞌi lai meni eime no soꞌoruwe tepaꞌasiye. Lu taune werese werese lowe ane soꞌoru taꞌama. Aiwawe aꞌi lu taune werese werese lai ne, tai ano, soꞌoru taꞌama. Ane aꞌi lai ne soꞌoruwe tepaꞌasiye. Ane marepi no umasitereme. Ane lu taune maꞌe tai ano ne au atuatu areiyerowa su, lowe ne siye soꞌoruwerowa.i
28 Fene werese ane maꞌe aiyere. Fene, tahe onotaꞌano aꞌi irosiya ape, fene, marepi orese aꞌi totenamisiya ape, fene ane maꞌe aiyeyei su, ane marepi fetane aꞌi au irorowa.j 29 Fene wiyawi ano taꞌanere. Yo seni ano siye etire. Sosu yo seni ano tote umasite. Ane marepi momotei aꞌi irosiya. Fene marepi ano ani tote tawesiyei su, sosu peri ano wanu tote umasiyei su, ane fene maꞌe marepi fetane aꞌi au irorowa. 30 Wiyawi ape ane fene maꞌe aurowa ape, wiyawi ape orese se taꞌama. Fene wiyawi ape suterowa ape, fene fetane aꞌi suterowa.”k