Lu tamo nowe amou ne Jisas ne teꞌe toweriyei ne fai.
12
Sosu aꞌi pe Jisas peri tepaꞌasiye su, le lu disaipel lo aiwawe aꞌi nowe amou (Sabat) se taꞌaneyei awei ta sahe tei uwei aꞌi iroteye. Lu disaipel lo lau mase iroteye su, lowe kewi so ani toꞌote aniyewe, ene ateye.a 2 Sosu lu Farisi lowe kewi so ani toꞌote aniyewe, ene ateye ape, siyeye su, lowe Jisas maꞌe apou eiye, “Siyere! Lu disaipel no Moses lo yo peri arisisiya. Moses apou leseye, ‘Fene werese nowe amou (Sabat) se wiyawi werese owe ape taꞌanere.’”b 3 Ahowa, Jisas lowe maꞌe itiyaꞌu eiye. “Yaꞌariyei meni owane nomo lo Devit, le lu feni mase lau mase iroteye su, le piye irowe awere? Fene piye Owane Sitewi lo one towe sahe siye teꞌeye awere? 4 Wanure! Le lu feni lo mase Owane Sitewi lo wesi papu wiyewe, nau taꞌase amou aꞌi, Owane Sitewi maꞌe auwe ape, aniyewe, ene ateye. Le lu feni lo mase, lowe nau taꞌase amou ape ene ateye su, le Owane Sitewi lo yo peri arisiye. Au hesere meni owane tutawe, le aꞌi lai nau taꞌase amou ape anamiteye.c 5 Owane Sitewi lo yo peri Moses leseye ape, fene yo peri lo sitewi wanu soꞌoru taꞌama. Owane Sitewi lo wesi lu owane lowe nowe amou (Sabat) arisinamiteye. Owane Sitewi lo nihe se yo seni lowe lo aseyaro aꞌi ne.d 6 Ahowa, ane fene maꞌe peri wiyeme aꞌi au teꞌesiya. Owane Sitewi lo wesi lo wiyawi erasi aꞌi ne. Au heseyei lu owane, lowe Owane Sitewi lo wesi Owane Sitewi lo nowe amou (Sabat) se faraꞌu wiyawi taꞌanerowa. Etiri oso aꞌi ne. Ane aꞌi lai Owane Sitewi lo wesi ape ani araronamisiya. Ane Owane Sitewi lo nihe se erasi aꞌi ne.e 7 Owane Sitewi lo peri au teꞌe siye meni ta apou leseye,‘Ane, Owane Sitewi Pefine aꞌi fene maꞌe teꞌesiya, ane ayei fene lo ape au hesesiya ape, ane aniyei wou taꞌama. Ahowa, fene lu taune werese maꞌe au seremareyere.’ Hos 6:6
Fene peri lo sitewi ape wanu tote umasisiya su, fene lu feni ano ne peri teꞌe narurowata. Owane Sitewi lo nihe se lowe yo seni luwaru aꞌi irote taꞌame. 8 Ane, meni hire maꞌe itorai ape, ane nowe amou (Sabat) lo meni owane ne.”
Nowe Sabat se Jisas meni ta ereti afofo aꞌi se au taꞌane fareraiyeye.
9 Sosu aꞌi pe Jisas awei ape arunatiyewe, taꞌuweyei wesi lowe lo papu wiye. 10 Taꞌuweyei wesi papu wiye su, le meni ta ereti nonoꞌowe aꞌi se siyeye. Lu Farisi ape mo, lowe Jisas maꞌe teꞌe toweriye, “Nowe amou (Sabat) se ne faraꞌu meni ape ereti nonoꞌowe aꞌi au taꞌane faraꞌuweye awere? Piyete awere?” Lowe apou toteye. “Jisas meni ape lo ereti au taꞌane faraꞌuweyei su, nomo le etirowa.”f 11 Sosu Jisas lowe maꞌe itiyaꞌu eiye, “Ne fe sipsip taꞌi ta iroteyei su, nowe amou (Sabat) se fe sipsip no awei fisiye yo papu itori winetaiyei su, ne nowe amou (Sabat) se fe sipsip no, awei fisiye yo papu itori winetaiye ape, fene aro aniyei awere? 12 Fene marepi erasi totere! Meni ape fe sipsip ani ararowe. Ei! Owane Sitewi lo nowe waraꞌi aꞌi se fene wiyawi wisere aꞌi faraꞌu ani irorowa.”g 13 Sosu le meni ape maꞌe apou eiye, “Meni! Ne ereti no tesi fareraiyere.” Meni ape Jisas lo peri wanuwe su, le ereti lo tesi fareraiyeye. Sosu ereti lo wisere aꞌi ereti tereꞌe lo wou aꞌi henerai. 14 Ahowa, lu Farisi etiri ape siyeye su, lowe wesi nowe maꞌe fi. Lowe wesi tereꞌe maꞌe teꞌe eti naneiyei ne fi. Lowe Jisas aine teraꞌeyei ne toteye.h
15 Jisas lu Farisi lo marepi siye soꞌoruwe tepaꞌasiye. Serai le lu disaipel lo mase taꞌuwe wesi nowe maꞌe arunati. Lu taune tomu neꞌese Jisas moꞌo umasiti. Le lu taune tomu neꞌese u tahe se ape au taꞌane faraꞌuweteye. 16 Le lowe lo u tahe au taꞌane tepaꞌasiye su, le lowe maꞌe eiye, “Fene ane ne lu taune werese maꞌe owe ape au teꞌe fiyarire!”i 17 Tu naifa weriyei Owane Sitewi lo peri au teꞌe siye meni ta, iyape Aisaia, le apou leseye. Jisas peri ape au teꞌeye su, peri ape wiyeme aꞌi henerai tepaꞌasiye.
18 “Wanure! Wiyawi meni ano, ane le ariariye tepaꞌasiye. Ane le ne marepi erasi aꞌi tote wawesiyenamisiya. Ane marepi hepene lo marepi wisere aꞌi totenamisiya. Ane Hepene Waraꞌi aꞌi ano le maꞌe eimawe arosawi. Le lu taune Moses lo yo peri umasi taꞌame ape maꞌe apou au teꞌe areiyerowa. ‘Marepi ano wisere farere aꞌi ironamisiya.’
19 Le peri lo au teꞌe fiyarirowa su, le ai marepi se au teꞌerowata. Le peri erasi aꞌi yo mai sahe lu taune, peri ta wanuwei ne taꞌuwerairowa ape, le peri erasi aꞌi owe ape uterowata.
20 Lu taune tamo marepi lowe lo pereꞌe aꞌi irotorowa, menei lo loꞌu pereꞌe aiwawe aꞌi. Le lowe maꞌe au luwaruwerowata. Lu taune yehe mi oso wou aꞌi irotorowa su, le lowe lo mi ape aine noruwerowata. Meni ape aiyerowa su, le lai ferafereiyei lo lowe maꞌe au atuatunamirowa. Sosu marepi waraꞌi aꞌi yo seni luwaru aꞌi ani fu aro poꞌuterowa. Serai yo seni luwaru aꞌi poꞌuterowa su, yo seni waraꞌi aꞌi ape lai weriyei weriyei ironamirowa.
21 Lu taune omo omo werese peri lo wanu tote tawesi umasirowa su, meni ape lai lowe maꞌe marepi hepene heꞌi aꞌi au ironamitorowa.” Ais 42:1-4
Jisas sepei luwaru aꞌi, meni ta papu iroteye ape, au ani taꞌane sasarisawi.
22 Sosu aꞌi pe Jisas peri tepaꞌasiye su, lu tamo meni ta sepei luwaru aꞌi papu iroteye ape, le maꞌe henetai. Sepei luwaru aꞌi ape lai meni ape lo ahi au tomoꞌuteye, nihe au pokoweye. Jisas meni ape siyeye su, le ahi lo aneye, nihe lo petaneye. Serai meni ape faraꞌu etiri werese siye areiyeye. Sosu faraꞌu peri teꞌeteye. 23 Lu taune werese meni ape siyeye su, lowe hepene se suꞌariye. Sosu lowe apou teꞌeye, “Siyere! Meni ape Devit lo meni eime awere? Piyete awere?” 24 Ahowa, lu Farisi tamo meni ahi, nihe luwaru aꞌi ape wisere aꞌi wanuwe su, lowe apou areare teꞌeye, “Meni ape, Jisas, le sepei luwaru aꞌi Belsebul lo kairefiyeyei se au taꞌane sasarisawi.” Belsebul sepei luwaru aꞌi tutawe ne, iyape tereꞌe Satan.j
25 Jisas lu Farisi lo marepi siye soꞌoruwe tepaꞌasiye su, le lowe maꞌe eiye, “Wanure! Ai atu siye lu weneri ponei erauwirowawe, ai atu siye lu tewi aꞌi tewi aꞌi lowe ai atu tiyatiyei su, lowe kairefiyeyei teirowata. Aiwawe aꞌi omo nepawe tewi aꞌi tewi aꞌi ponei sahe erauwiyei su, lowe ai atu tiyatiyei su, lowe kairefiyeyei se teirowata. Lu tewi ta ponei sahe tewi aꞌi tewi aꞌi erauwirowawe, lowe ai atu tiyatiyei su, lu tewi ape kairefiyeyei se teirowata. 26 Serai sepei luwaru aꞌi, Satan, le sepei luwaru aꞌi ape au ani taꞌane sasarisawirowa su, wiyawi lo ape ani sasarirowa su, wiyawi lo ape kairefiyeyei se teirowata. 27 Sosu ane Belsebul lo kairefi se sepei luwaru aꞌi au ani taꞌane sasarisawiyei su, ane fene maꞌe peri ta ei towerisiya. Eiwerou lo kairefiyeyei se, lu tewi fene lo sepei luwaru aꞌi au ani taꞌane sasarisawirowa awere? Lowe lai peri fene lo, areareye ape, au teꞌe atuatu areiyesiya. 28 Ahowa, ane sepei luwaru aꞌi Owane Sitewi lo Hepene Waraꞌi aꞌi lo kairefiyeyei se au ani taꞌane sasarisawiyei su, fene apou siye soꞌoruwe tepaꞌasiye. nowe amou (Sabat) lu taune maꞌe au noweinoweirowa ape, henerai tepaꞌasiye.k
29 Taꞌarei irosiya meni ta meni kairefi aꞌi lo wesi ta ani apeti wiyei ne toteyei su, le tu wesi ape lo meni kairefi aꞌi ape wafei se ti tawesirowa. Meni ape wafei se ti tawesiyei su, le faraꞌu wesi lo ape ani apeti wirowawe, etiri werese lo taꞌarei anirowa.
30 Lu taune tamo peri ano arisiyei su, lowe ane umasirowata. Aiwawe aꞌi lu taune tamo wiyawi ano ani taꞌame su, lowe lu feni ano eimawe fiyarisawirowa.l
31 Serai ane fene maꞌe au teꞌesiya. Yo seni luwaru werese aꞌi Owane Sitewi lai faraꞌu ani sasarirowa. Ahowa, yo seni luwaru taꞌi aꞌi irosiya ape, Owane Sitewi lai ani sasarirowata. Yo seni luwaru aꞌi ape apou aꞌi fene Hepene Waraꞌi aꞌi lo maꞌe owe ape teꞌe narute ape, Owane Sitewi lai meni ape lo yo seni luwaru aꞌi ape ani sasarirowata.m 32 Meni ta, menitani ta ane maꞌe, meni hire maꞌe itorai ape, teꞌe naruwei su, Owane Sitewi faraꞌu yo seni luwaru aꞌi lo ape ani sasarirowa. Ahowa, meni ta, menitani ta Owane Sitewi lo Hepene Waraꞌi aꞌi maꞌe teꞌe naruwei su, Owane Sitewi lai yo seni luwaru aꞌi ape, ani sasarirowata. Ei, yo seni luwaru aꞌi ape mi mi pasi pasi weriyei weriyei ironamitorowa.”
Me luwaru aꞌi so luwaru aꞌi taꞌeyei.
33 “Iyu ta loꞌu wisere aꞌi taꞌeyei su, meni ta apou totesiya, ‘Iyu ape wisere aꞌi ne.’ Ahowa, iyu ta loꞌu luwaru aꞌi taꞌeyei su, meni ape apou totesiya, ‘Iyu ape luwaru aꞌi ne.’ Apou wou aꞌi meni ta, yo seni aseyaro irowei ape, fene apou totesiya, ‘Meni ape meni wisere aꞌi ne.’n 34 Fene werese haru aimesi wou aiwawe aꞌi ne. Yo seni werese fene lo luwaru aꞌi tene. Fene piyene peri waraꞌi aꞌi au teꞌesiya awere? Peri werese fene lo wawero aꞌi tene! Fene peri ta au teꞌeyei su, peri ape marepi papu maꞌe henerai.o 35 Meni wisere aꞌi ta marepi wisere aꞌi totenamirowa su, le yo seni waraꞌi aꞌi ironamirowa. Sosu aiwawe aꞌi meni luwaru aꞌi marepi luwaru aꞌi totenamirowa su, le yo seni luwaru aꞌi ironamirowa.
36 Ane fene maꞌe au teꞌesiya. Lu taune tamo peri luwaru aꞌi au teꞌeteyei su, nowe Owane Sitewi yo seni werese au hese ereirowa ape, peri luwaru aꞌi lowe lo ape Owane Sitewi lai au hese eti ereirowa. 37 Peri werese, fene au teꞌesiya ape, Owane Sitewi lai fene maꞌe au hese etirowa. Lu taune tamo Owane Sitewi lai lowe maꞌe lu taune aseyaro aꞌi au eirowa. Lu taune tereꞌe tamo Owane Sitewi lai lowe maꞌe ani fu arorowa.”
Jisas lai Jona lo yaru ape ne au teꞌe atuatuwe.
38 Sosu aꞌi pe lu Farisi, ani soꞌoruwe siye lu tamo Jisas maꞌe itiyaꞌu apou eiye, “Atuatu siye meni, Ne wiyawi erasi pefine aꞌi nomo maꞌe fa au atuature. Wiyawi erasi ne atuatuwei ape, nomo siye soꞌoruwerowawe, ne Owane Sitewi wiyeme aꞌi maꞌe itorai.”p
39 Ahowa, Jisas lowe maꞌe itiyaꞌu eiye, “Ane fene werese maꞌe wiyawi erasi pefine aꞌi au atuaturowata. Fene lu taune, yo seni luwaru aꞌi ironamisiya ape, tafaꞌe yo seni ironamisiya ape, fene wiyawi erasi pefine aꞌi siyeyei ne nehinamireme. Ei, ane etiri taꞌi aꞌi fene maꞌe au atuaturowa. Etiri ape Owane Sitewi lo peri au teꞌe siye meni Jona, le fene maꞌe au atuatu tepaꞌasiye.q 40 Meni ape Jona, le nowe mi pasi hesi heta hare erasi aꞌi lo lire papu iroteye. Aiwawe aꞌi ane, meni hire maꞌe itorai ape, ane awei papu wiyeme aꞌi maꞌe nowe mi pasi hesi heta iroteyei.r 41 Nowe ape se Owane Sitewi lai yo seni au hese ereirowa ape, lu taune werese omo Ninive sahe iroteye ape, lowe fene mase teirowawe, lowe aiwawe aꞌi yo seni luwaru aꞌi fene lo au hese ereirowa. Piyene awere? Meni Jona Owane Sitewi lo peri au teꞌe fiyariteye su, lowe yo seni luwaru werese aꞌi meꞌiyeni maꞌe atati arunati. Fene werese yo seni luwaru aꞌi fene lo meꞌiyeni maꞌe atati arunati taꞌame. Sosu ane, sato irosiya ape, ane meni Jona ani araro tepaꞌasiye.s 42 Fene werese peri ape wanu tepaꞌasiye. Menitani owane tutawe tu naifa weriyei omo tereꞌe tereꞌe iyape Siba, tamo aꞌi noweinoweiteye ape, menitani ape Israel lo meni owane tutawe Solomon maꞌe peri lo wanuwei ne fai. Nowe ape Owane Sitewi lai yo seni au hese ereirowa ape, menitani ape fene mase teirowawe. Le yo seni luwaru aꞌi fene lo au hese ereirowa, le fene werese yehe omo maꞌe eimawe arosawirowa. Ane, sato irosiya ape, meni owane Solomon hi ani araro tepaꞌasiye.t
Sepei luwaru aꞌi ta lai meni ape papu si tame wiye.
43 Sosu sepei luwaru aꞌi meni ta nowe maꞌe arunatiyei su, le awei pani foroꞌo aꞌi nehiyei ne uweitiye. Le onu fetaneyereme. Ahowa, le onu fetaneyerowata. 44 Sosu sepei luwaru aꞌi ape apou toteye, ‘Ane meni ano ape si tame wiyei ne totesiya.’ Sosu sepei luwaru aꞌi ape meni ape si tame fi. Meni ape maꞌe si tame wiyei ne fai su, le lirewawe lo ape wisere aꞌi iroteye ape siyeye. Etiri tereꞌe tamo meni ape maꞌe wi taꞌame. 45 Sosu sepei luwaru aꞌi ape meni ape arunatiyewe, sepei ape le pinasu lo tamo nehiyei ne fi. Le sepei pinasu luwaru aꞌi ereti feni werese feni hesi aꞌi meni ape papu hene wiye. Sosu meni ape lo lirewawe papu weriyei ironamiteye. Sepei luwaru aꞌi ape mo lowe lai meni ape au ani luwaruweteye. Serai meni ape yo seni luwaru werese werese aꞌi ironamiteye. Tu meni ape yo seni luwaru oso aꞌi iroteye.” Sosu aiwawe aꞌi lu taune pereye nowe eite se, yo seni luwaru erasi aꞌi marepi hepene lowe lo au luwaruwerowa.u
Jisas lo mai, lu paꞌise ape mo eiwerai awere?
46 Jisas lu taune maꞌe au teꞌe atuatuteye su, Jisas lo mai, paꞌise lu tamo, lowe wesi nowe maꞌe le se peri ta au teꞌeyei ne fai. 47 {Sosu meni ta Jisas maꞌe apou eiye, “Wanure! Mai no paꞌise no wesi nowe sato irosiya. Peri ta ne maꞌe au teꞌeyei ne fai.”}v 48 Ahowa, Jisas meni ape maꞌe itiyaꞌu eiye, “Mai ano, paꞌise ano. Eiwerai awere?” 49 Sosu Jisas ereti lo lu feni maꞌe tesi fareraiyesawi, apou eiye, “Siyere! Lu taune ape mo lowe mai ano, paꞌise ano sato irosiya. 50 Tai ano, omo hire maꞌe ironamisiya ape, lu taune tamo lai tai ano lo marepi tote umasi irorowa su, lowe mai ano, einei ano, lowe paꞌise ano ne.”w